فيلم تشي
عمر الشريف قدم في مسيرته فيلم تشي عن الثائر الشهير تشي جيفارا.. ورغم التشابه اللي بيوصل حد التطابق شكليا .. إلا أن عمر الشريف مبيحبش الفيلم دا.. خالص.. لانهم خدعوه..
وقع في الفخ
عمر الشريف بيحكي في نهاية حياته.. ان جيفارا مات سنة 67.. 9 أكتوبر 1967.. هما اشتغلوا في الفيلم سنة 1968.. فمفيش وقت كبير يقرا.. ولا يشتغل على الشخصية وابعادها.. الفيلم كمان من انتاج المخابرات الامريكية .. او Central Intelligence Agency واللي بتتقال اختصارا « سي آي أي » .. فالفيلم هدفه انه يشوه اصلا جيفارا.. وعمر الشريف شرب الطعم وشارك في فيلم يشوه رمز ثوري زي جيفارا.. لذلك هو مش بيحب فيلم جيفارا اصلا..
قد يهمك: ما لا تعرفه عن شاعر اللافتات أحمد مطر
اعترافات
وقال عمر الشريف في مؤتمر صحفي سنة 2007 .. انه مينفعش نعمل سيرة ذاتية قبل مرور 30 سنة.. يكون حياة الشخص دا اتهضمت.. مساؤئه مميزاته.. عيوبه.. جوانب شخصية في حياته ظهرت مكناش نعرفها.. وقال ان السير الذاتية عيبها انها بتتناول حياة الشخص من يوم ما اتولد لحد ما يموت ودا ممل.. الافضل نتناول الاحداث البارزة في حياته.. او ناخد حدث ونركز عليه..
على سبيل المثال .. فيلم ناصر 56 بيركز على سنة 56 في حياة عبد الناصر… في حين فيلم ايام السادات بيحكي قصة السادات كلها لوكشة واحدة.. ودا ليه جمهور ودا ليه جمهور.
وبيقول انه بيعتذر للمناضل الكبير اللي شوه سيرته من غير ما يقصد وانه معرفش قصة حياته غير متأخر..
طيب هي ليه امريكا تشوه جيفارا يعني ؟
علاقة أمريكا بجيفارا
اولا جيفارا رمز ثوري.. وثانيا تشي جيفارا مع رفيق كفاحه فيدل كاسترو.. كانوا بيحاربوا نظام الجنرال باتيستا.. اهو باتيستا دا كانت امريكا هي اللي بتدعمه.. فمهم قوي اننا نشوه جيفارا علشان ميبقاش رمز ولا محدش يقلده..
في الوقت دا كان احمد فؤاد نجم بيكتب والشيخ امام بيغني
جيفارا مات..
اخر خبر ف الراديوهات و ف الكنايس والجوامع و ف الحواري و الشوارع و ع القهاوي وع البارات
جيفارا مات
عيني عليه ساعة القضا من غير رفاقة تودعه
يطلع أنينه للفضا يزعق و لا مين يسمعه
يمكن صرخ من الألم من لسعة النار ف الحشا
يمكن ضحك او ابتسم او ارتعش او انتشى
يمكن لَفَظ اخر نفس كلمة وداع لجل الجياع
يمكن وصية للي حاضنين القضية بالصراع
صور كثير ملو الخيال و الف مليون احتمال
لكن أكيد و لا جدال جيفارا مات موتة رجال
