تطبيقات للموبايل تساعدك في انجاز عملك وتطوير شركتك

إزاي يبقى موبيلك مساعدك في الشغل

الموبايل دلوقتي جزء أساسي من استخدامنا اليومي، بس في البزنس ممكن نعتبره من أهم أدواتنا، فخلونا نطرح مع بعض الأفكار عشان تخلي تليفونك مكتبك:

1- تنظم المهام هو عامل مهم جدا في استفادتنا من الوقت وكمان في انتاجيتنا:

Any.do :

ده تطبيق ممكن تعتبره مدير لحياتك، لأنه ببساطة هايسحب أي موعد او مهمة او تذكير موجودة في بريدك الإلكتروني او أي برنامج اخر، سواء على الموبايل أو حاسبك الشخصي أو حتى كمبيوتر شركتك ويجمعهم كلهم في مكان واحد ويفكرك بيهم، وهاينظملك يومك واسبوعك وشهرك، ويكون متاح سواء على موبايلك أو الكمبيوتر، وفي أكتر من نسخة للتطبيق علي حسب نظام تشغيلك وكمان في نسخة مجانية ومتقدمة تكلفتها حوالي 3 $ في الشهر.

Pushover :

ده تطبيق بيشتغل مدير بس للإخطارات، لأنه هايجمعها كلها من على موبايلك، سواء كانت رسالة أو إيميل أو أي إشعار من أي تطبيق تاني في مكان واحد، في منه نسخه مجانية ل 7 أيام من اب ستور او جوجل ستور او من موقع التطبيق وبعد كدة بتكلفك حوالي 5 $ لمرة واحدة.

Rescue Time :

ده تطبيق بيعمل تتبع لوقتك عشان يخليك تفهم عادات شغلك اليومية، وبيطلع تقارير عنه عشان تزود تركيزك وإنتاجيتك، فممكن تشغله في الخلفية سواء في موبايلك أو حاسبك الشخصي، وها يعرفك بالضبط الوقت اللي بتقضيه في كل مهمة أو كل موقع ويب وكمان بيديك تنبيه لما الوقت اللي انت محددة لأي مهمة ينتهي، في نسخة مجانية ونسخه متقدمة بتكون تكلفتها حوالي 70 $ في السنة.

2-تنظيم العمل داخل أي شركة بيوفر كتير في وقت العمل ويزود الإنتاجية:

Click Meeting

التطبيق ده ها يسمح ليك إنك تعمل اجتماع على الفيديو مع موظفين الشركة أو عملائك أو حتى تعمل محاضرات، سواء كانوا عشرات أو الاف في نفس الوقت، وكمان ممكن تشارك معهم صور أو فيديوهات أو عروض توضيحية أو حتى كتابة حره، التطبيق ده هايكلفك 16$.

Citrix Share File Business

التطبيق ده متميز في نقل الملفات الكبيرة من جهاز لجهاز سواء بين موبايلك أو حاسبك الشخصي او العكس، ويسمح كمان لإدارة ال IT انهم يتحكموا في الأجهزة حاسب المكتبية، والملفات هاتكون متاحة لكل زملاء العمل، التطبيق ده هايكلفك 16$.

Flow:

ده تطبيق لإدارة المشاريع، وبيسمحلك بتقسم المهام بين أعضاء فريقك أو تشاركهم فيها، كمان أنك تتابع انجازهم بغض النظر عن مكان وجودهم، ويسمح كمان أنك تعمل جدول أعمال منفرد ليهم، وده ممكن تستخدمه بشكل مجاني وفي نسخة تانيه متقدمة ممكن تكلفك في المتوسط 300$ حسب حجم المستخدمين او حجم فريقك.

3-التواصل الفعال مع العملاء بيكون مفيد دايما لأي بزنس:

Survey Monkey

التطبيق بيخليك تعمل أي استطلاع بين عملائك أو بين الموظفين بكل سهولة، وممكن تعمل وتشارك الاستطلاع ده كمان على الإنترنت، بالإضافة إلى أنك ممكن تعمل تقارير لنتائج تحليل الاستطلاع من موبايلك أو حاسبك الشخصي، التطبيق ده بيكلف 25$.

Happy Fox:

التطبيق ده ها يسمح لمندوبين شركتك يشوفوا بيانات محدودة عن العملاء من الموبايل أو الكمبيوتر الشخصي والأهم أنهم ممكن يستقبلوا مكالمات العملاء أو يكلموهم كأنهم على سيستم الشركة وكمان يردوا على مطالبات العملاء ويسيبوا تعليقاتهم عنها، التطبيق ده ها كلفك في المتوسط 30$.

دي كانت أفكار تساعدك عشان تعظم الاستفادة من الموبايل في شغلك وتوفر وقت أكبر وكمان تعلي انتاجيتك وبالتالي عائد مشروعك، خلي دايما تليفونك مكتبك.