ملخص الحرب العالمية الثانية

( المجنون يخالف القانون بالقانون )

من الآخر .. واحد أهبل داخل على ناس برشاش فرتكهم .. فالقانون قال لأهاليهم .. ده أهبل هتعملوا عقلكم بعقله ! ، قام الأهبل زاط فيها ودور تقتيل فى أهاليهم وبتوع القانون كمان ، ومن هنا تبدأ الحرب العالمية الثانية .

برغم ان شرارة الحرب العالمية التانية مختلف عليها تاريخيا ، لكن أهمها على الاطلاق ان ( هتلر ) مسك ألمانيا ، هتلر ده كان طفولة بائسة يائسة ، أبوه رباه على العلق – جمع علقة – لحد ما ابوه اللي تعب ومات 😀 ، فكان هتلر متعلق بامه اوي فماتت هي كمان بالسرطان 🙁 ، فراح يقدم في مدرسة الفنون في فيينا فاترفض مرتين ونصحوه انه يدرس الهندسة المعمارية عشان رسوماته هندسية مش فنيه وكان اقتنع خلاص بس دخل الجيش وقعد يترقى لحد ما بقى مؤسس الحزب النازي اللي ولع في اوربا والدنيا بحالها ، وبدل مايبقى مهندس معماري بقى مهندس استعماري واحتل معظم أوربا أقوى وأعرق الدول العسكرية وقتها .

برغم اقتناعي الكامل إن المانيا هي اللي كانت بتحارب الدنيا كلها بمساعدة شوية ناس تانيين ، لكن هنعرض آراء المحايديين لتقسيمة أطراف الحرب ، وهم كالتالي :

دول الحلفاء : ( أمريكا – الاتحاد السوفييتي – بريطانيا – فرنسا – الصين – بولندا – كندا – استراليا – نيوزلاندا – النرويج – الدنمارك – بلجيكا – هولاندا – اليونان – يوغسلافيا – تشيكوسلوفاكيا – البرازيل – الارجنتين – أثيوبيا – جنوب أفريقيا – الهند – الفلبين ) وغيرهم كتير والله 

دول المحور : ( المانيا – إيطاليا – اليابان – المجر – بلغاريا – رومانيا ) والحقيقة ان المانيا واليابان هم اللي بيحاربوا والباقي بيدخل وبيطلع وبيشجع اللعبة الحلوة 😀

أولا : اليابان ( بلد الساموراي والنينجا .. يعني كله في السخان ) :

تاريخيا ابتدت الحرب في اليابان سنة 1931م .. اليابان عايزة تدخل الصين وبرغم مساحتها الاصغر بس قوتها أكبر بكتييير موووت من قوة الصين ، فعملت زي حركة النمر اللي مش عاجبوا ودن الارنب الطويلة وواخدها حجة عشان ياكلوا ، اليابان خلت ظابط زرع قنبلة على خط سكة حديد تجاري لها مع الصين ، ورغم القنبلة كانت فستك وما عملتش حاجة في الخط والقطرات عدت عليه عادي ، بس اليابان اعلنت الحرب عالصين كده رخامة وقالت كمان ان الضابط واصحابه اتخطفوا وهانجيبهم من الصينيين …

بعدها دخلوا الصين وفعلوا بأهلها الافاعيل قتل وحرق واغتصاب لحد ما وصلوا للعاصمة بتاعتهم والجرايم في الموضوع ده الكتب والمراجع متتحملهاش … وفي الاخر بقت المناطق الصينية اللي دخلوها فعليا تحت حكم وسيادة الامبراطورية اليابانية ( زي اللون الاصفر في الخريطة ) … حاولت بعدها اليابان تدخل على روسيا من جهة منغوليا بس اما فشلت في اول اشتباك حدودي ، قالت لأ خلينا بعيد عن الروس عشان مايساعدوش الصين .

اليابان برغم انها كانت بتحارب المانيا في الحرب العالمية الاولى – بس شوف حكمة ربنا يامؤمن – عقدت معها اتفاقية حماية مشتركة وبقت المانيا بتساعد اليابان في حربها ضد الصين ، فالكلام زعل أمريكا وبريطانيا واللي لهم مصالح في الدول دي ، فأعلنوا على اليابان حظر اقتصادي ، فاليابان بدل ما تعلن عليهم الحرب وتعمل شبورة مالهاش لازمة راحت ضاربة لامريكا ميناء ( بيرل هاربر ) بالطيران سنة 1940 وده كان قاعدة عسكرية متينة لأمريكا في هاواي ، فالموضوع احلو عند اليابان وراحت واخدالها كام جزيرة كده على ما قسم منهم ( ماليزيا واندونيسيا والفلبين وسنغافورا ) .

راحت امريكا راده عليها بالاستيلاء على جزر محيطة باليابان عشان تمنع عنها اي امدادات عسكرية او غذائية وده بمساعدة استرالية نيوزلاندية بريطانية ، فشلت فيها حركة اليابان للتوسع ، وقعدوا يضربوا في بعض بالطيران وشوية معارك برية على ما قسم .. فجت امريكا في الاواخر بعد ما الحرب العالمية التانية خلصت واليابان مارضيتش تستسلم راحت ضرباها بقنبلتين نوويتين في هيروشيما ونجازاكي سنة 1945 وكانوا مركزين استراتيجيين لليابان فأعلنت استسلامها على طول .

غالب الدول اللي كانت اليابان محتلاها في الحرب العالمية الثانية رجعتها لاهلها تاني بما فيهم شبه الجزيرة الكورية اللي كانت مستعمرة يابانية من 1910 واللي اتقسمت سنة 1950 لكوريا الشمالية بقيادة الاتحاد السوفييتي وكوريا الجنوبية بقيادة الامم المتحدة وخاصة الولايات المتحدة .

ثانيا : ايطاليا ( عصابة حكمت دولة ) :

مسكها واحد مخبول اسمه ( موسوليني ) كان اساسه فرد لعصابة بتقتل في الخلق بس البلية لعبت معاهم وعرفوا يمسكوا الحكم ، وبعد ما مسكوا ولقوا انهم مش عارفين يجيبوا المم للناس قالوا نبحبح عن نفسنا شوية ونحتل دول كمان .. في سنة 1935 راح هاجم موسوليني على اثيوبيا واكتسحها اكتساح لحد أديس أبابا العاصمة والامبراطور بتاعها فلسع ، وقعدت اثيوبيا تستنجد بعصبة الامم اللي كانت إثيوبيا وإيطاليا مشتركين فيها من الحرب العالمية الأولى .. بس الدول العظمى عملت نفسها نايمة .

ايطاليا بعد ما جالها موسوليني كان لها طموح استعماري زي اي مخبول في الحرب العالمية الثانية ، فضغط على فرنسا فسلمته جيبوتي واريتريا في افريقيا وضمهم لاثيوبيا ، وادته فوقيهم كمان تشاد فوق البيعة ، وده كله عشان ايطاليا تساعد فرنسا في الحرب ، بس موسوليني كان واخد هتلر مثله الاعلى فراح معاه ، وراحوا مجربين هم الاتنين اسلحتهم وكافة خططهم العسكرية في أسبانيا لدعم تمرد واحد اسمه ( فرانكو ) ضد الحكومة الاسبانية الموالية للاتحاد السوفيتي ، ونجحوا نجاح باهر ، وفرانكو ده خد حكم اسبانيا وخلى نفسه ديكتاتور عليها وادى لهتلر وموسوليني بالشالوط 🙂 .. وخلى نفسه عالحياد في الحرب العالمية الثانية ( يعني باللون الاصفر الفاتح ) .

لما موسوليني لقى هتلر عمال يكسب في بلاد مالها اول من اخر فقال في نفسه وليه لأ ، فراح عامل زيه وداخل محتلة ألبانيا ( مش ألمانيا ) وده سنة 1939 فبريطانيا زعلت فراح موسوليني معلن عليها الحرب ، وراح مساعد هتلر في فرنسا ، وكمان رايح سايىء فيها وقال ادخل من ألبانيا عاليونان أخدها هي كمان ، وكمان راح محاصر جزيرة مالطا ، وقعد فترة عالحياد … فقوات التحالف بقيادة بريطانيا ادولوا علقة حلوة لحد ما في سنة 1943 خدوا كل المستعمرات الإيطالية في افريقيا وأوروبا ..

وبالرغم ان ألمانيا ساعدته شوية عشان تجنبه السقوط السريع الفظيع وبالذات في شمال افريقيا بقيادة ( روميل ) ثعلب الصحراء ، لكن في النهاية دخلوا ايطاليا ذات نفسها وقبضوا على موسوليني في الاول ، لكن هتلر خلصه منهم ، وخلاه حاكم على شمال ايطاليا اللي مادخلتهاش قوى التحالف ، بريطانيا من جانب والمانيا من جانب اخر مسكوا الايطاليين قتلوا منهم نص مليون بنى ادم ، كل واحد بيقتل اللى بيقاومه ، وفي اخر الحرب لما انسحبت المانيا من ايطاليا اتقفش موسوليني واتعدم هو ومراته واتعلقوا على محطة بنزين في ميلانو .

ثالثا : ألمانيا ( مجنون بـ 50 مليون عاقل ) :

من بعد الحرب العالمية الأولى كانت المانيا بتكح تراب من العقوبات الاقتصادية عليها وتسليحها القليل اللى اتفرض عليها يعني 100 الف جندي وبس ! .. فاما جه هتلر قال بس بس ياجماعة اردمولي عاللي فات وبصوا شوفوا انا هعمل ايه ، أول هام خلى الشعب الالماني على قلب رجل مجنون واحد 😀 ، اوهم الشعب انه العرق الفريد من نوعه على مستوى العالم واي حد تاني ييجي في منزلة تحته ( والكل اقتنع 🙁 طبعا بمساعدة جوبلز داهية الاعلام الالماني ) فبقت حملات الابادة لأي جنس مخالف على قدم وساق ( يهود – بولنديين – أجناس اخرى .. الخ ) ، فبقى الالماني اللي مع هتلر يوازي دبابة المانية بكل ما تحمله الكلمة من معنى ، الجندي الالماني يقدر على عشرة والشهادة دي بالارقام النهائية للحرب .

هتلر اعاد تسليح المانيا وقوى اقتصادها واعاد هيكلة صناعتها وبقت من اكبر البلدان العلمية في العالم وتوجيه علومها للحرب فقط لا غير ، بعد مابقت المانيا قوى عظمى من جديد فكل البلاد اللي كانت قبل كده كانت بتحاربها خافت منها بمعنى الكلمة ، وكمان ضيف على كده علمهم بجنون هتلر ، طيب نشوف ريحوه في الاول ازاي ؟

هتلر صحي من النوم بيتاوب قال ياجماعة الخير هي مش النمسا دي كانت بتحارب معانا في الحرب العالمية الاولى ، قالوله ايوه ، قال تبقى بتاعتنا 🙂 ، فراح ضاممها لالمانيا ولا حد نطق سنة 1938 ، لقى اللعبة حلوة فقال لبريطانيا معلش هستسمحكوا في تشيكوسلوفاكيا فبريطانيا قالت له لأ .. بس اكمنك مجنون فخد اقليم السوديت غرب تشيكوسلوفاكيا عشان ده ناسه بتتكلم الماني ، قال طيب ( وكتمها في نفسه ) ، وقالوله دي اخر حاجة هتاخدها ، قال طيب برضه ، بس في نفس السنة راح قال لتشيكوسلوفاكيا فيه ناس عندكم كتير مجريين ( من المجر ) فمنطقتهم دي تبعي برضه ، قالت له ومالو – مجبرا اخاك لا بطل – فهتلر قال مابدهاش بقى وراح واخد تشيكوسلوفاكيا بالكامل في السنة الجديدة 1939 .

صحي برضه في يوم تاني من السنة الجديدة وقال والله حلوة بولندا وراح مدلدل لسانه 😀 ، البولنديين قالوا يانهار اسود 🙁 ، وراحوا مستنجدين ببريطانيا وفرنسا ، فطلب منهم هتلر مدينة حدودية لبولندا اسمها ( دانزيغ ) وقال عليها عشان انتوا كده بتحجموني ياكككماعة مش عارف اطمطع واخد راحتي وانا بفرد دراعي وانا بتاوب ، فاما لقى العملية محكومة وبريطانيا وفرنسا على رايهم ، راح رايح ماضي معاهدة عدم اعتداء مع السوفييت ( روسيا ) لو دخل بولندا ،

وكمان راح ماضي معاهدة مع ايطاليا سماها هو وموسوليني ( التحالف الفولاذي ) ، فبريطانيا ياعين امها قالت لبولاندا ما تريحيه يا ماما وتخلصينا وتديلوا اللي هو عايزه 🙂 ، فاما عيطت بولندا واتدعفلت في الارض ، فصعبت على بريطانيا وفرنسا تاني ، بس هتلر قال خلاص بلاها لعب عيال وراح داخل بتقله على بولندا ، فبريطانيا وفرنسا اعلنوا عليه الحرب على طول سنة 1939 .

بالرغم ان البريطانيين والفرنسيين اعلنوا على المانيا الحرب عشان دخولها بولندا بس في الحقيقة ماعملوش ايوتها حاجة عشان يساعدوا ( البنية من اللي بيغتصبها ) ، وظهر مصطلح تاريخي اسمه ( الحرب الزائفة ) ودي يعني شوية حشود من الجيش الفرنسي والبريطاني على حدود بولندا والمانيا ولا لهم تلاتين لازمة ، زي الحارس الشهم الحمش ابو شنبات على بيوت الدعارة 😀 ، فراح هتلر مقسم بولندا عليه وعلى الاتحاد السوفييتي بالعدل والاحسان وايتاء ذي القربى .

لما اتقسمت البلد الاتحاد السوفييتي قال لفنلندا ( ايوه هي بتاعة نوكيا ) ياريت تحطلنا شوية العساكر والدبابات والمدافع دي عندك ، فقالت لأ ، فراحوا داخلينها حاطين عليها على مسمع ومرأى من الجميع ، والاتنين خسروا ومحدش كسب ، فجت فنلندا وقالت للسوفييت خدوا بقى حتة الارض دي نظير انتهاء الحرب وهي حتة ارض اكبر من اللي خسرتها فنلندا اثناء الحرب نفسها ( شفتوا ازاي ) .

بريطانيا قعدت تحارب المانيا من بعيد لبعيد ، فهاجمت تلات سفن المانية كبيرة على حدود الارجنتين ، فقائد السفن أمر بأغراقها ولا انها تقع في ايد البريطانيين ، وقعدوا يعملوا حاجات خايبة عشان يحاصروا المانيا اقتصاديا بقطع خطوط الامداد لها من النرويج والدنمارك ، فراح هتلر داخل على الدولتين دول بتقله ، فالدنمارك استسلمت بعد كام ساعة بس – قادرين وفاجرين الالمان دول ساعتها – والنرويج لحقتها بريطانيا ورئيس الوزراء البريطاني راهن عليها انها مش هتقع في ايد هتلر ، لكن بعد كام شهر وقعت وكانت بريطانيا منيت بهزيمة ملىء السمع والبصر ، فاستقال رئيس الوزراء ده وجه من بعده تشرشل .

سنة 1940 المانيا شنت هجوم على 3 دول مرة واحدة وهم ( لوكسبمورج – هولاندا – بلجيكا ) ومكانوش برضه ياعيني قد الالمان فسقطوا كلهم … وفي حركة خاطفة .. ومن وسط الغابات راحوا مهاجمين فرنسا نفسها ، فالفرنسيين من هول الصدمة الغير متوقعة سابوا دباباتهم بأسلحتهم واجرررري يامجدي 😀 ، وراحت كمان ايطاليا داخله من ناحيتها على فرنسا ، فاستسلمت فرنسا في أقل من شهر ، وبقت فرنسا المانية 100 % ، وقسموها جزء شمالي وجزء جنوبي ، وبقت الحكومة الفرنسية بقيادة شارل ديجول ساعتها تسمعوا منها احلى خطب على راديو لندن في بريطانيا ولا الاخوان من تركيا دلوقتي ( محدش يزعل انا بضوحك معاكم 😀 ) .

بريطانيا اما خافت على روحها خدت شوية بلاد جنبها زي ايسلاندا وجرين لاند ، والسوفييت خدوا شوية من بلاد البلطيق زي استوانيا وليتوانيا ، لكن كانت الاسفنجة شربت المية ، فعرض هتلر على بريطانيا معاهدة سلام بعد ما كوش على معظم اوربا ، لكن بريطانيا رفضت على مضض ، فراح هتلر حاطط عليها بالقوات الجوية الالمانية بعملية عرفت ب ( اسد البحر ) وضربوا لها بالطيران مدينيتين اسمهم ( برمنجهام وكوفنتري ) لمدة شهر كل يوم ليل نهار .

على الجنب الغربي لاوربا اتعمل انقلاب عسكري في يوغسلافيا وساعدوا اليونان ضد ايطاليا ، فراح هتلر مساعد ايطاليا وجاب معاه المجر وبلغاريا ، وراحوا طاحنين اليونان وواخدين كمان يوغسلافيا .. والانقلاب لم يترنج بل اتفسخ 🙂 ، بريطانيا بعتت قوات عسكرية من مصر عشان يساندوا اليونان بس اما لقوا يوغسلافيا هي كمان سقطت ، فراحوا محودين على جزيرة تكريت وقعدوا هناك يصيفوا .

اتجن هتلر أكتر وقال كده تمام اوربا في جيبي ، هاتولي اسيا ، وبالرغم انه عامل اتفاقية تعاون مع الاتحاد السوفيتي ، بس خلى القطة تاكلها وعمل دعاية فظيعة قال ان السوفييت هايهاجموا المانيا ، ( باللزمة هايهاجموها ازاي وهي بقت في نص الدول اللي محتلاهم !! والناس صدقت ) ، وراح هاجم على الاراضي السوفييتية في صيف 1941 ، ودي كانت اكبر عملية اجتياح عسكري في التاريخ واسمها عملية ( بارباروسا )

استخدم فيها الالمان 4.5 مليون جندي منها ومن حلفائها ، على جبهة طولها 2900 كيلو ، قسمت القيادة الالمانية الحملة على تلات جيوش ( جيش الشمال والوسط والجنوب ) ، الحملة مشيت بالضبط زي دراسة القمح تأتي على اي شيء في طريقها ومات فيها بشر بالملايين ، لحد ماوصلت لمدينة ليننجارد ( اسمها دلوقتي سانت بطرس بتاعة الطيارة الروسية اللي اتضربت في مصر ) ، وهتلر من كتر ما تعب من مقاومة السوفييت فقال للقوات امسحوا البلد دي من الخريطة .

فعملوا عليها حصار مات فيه مليون مدني ، منهم 800 الف بسبب المجاعة ( قال وزعلانين على متين واحد مات في الطيارة 🙂 ) ، بعدها ركز هتلر عالجنوب في بلد تانية اسمها ستالينجارد عشان يستولوا منها على حقول النفط السوفييتي ، بس المدينة اتحولت لحرب شوارع واتقتل حوالي مليون ونص بنى آدم بكل وسائل الموت اللي تيجي في بالكم ، بس لان الالمان بعدوا اوي عن خطوط الامداد بالمؤن وكمان السوفييت اعتمدوا سياسة الارض المحروقة للعدو ، اي بلد يسيبوها للألمان يحرقوها ، فدبت في الجيش الالماني مجاعة وامراض كتير ، وهتلر ما قدرش ينقذهم بل وكمان قال لهم يقاتلوا لحد اخر جندي الماني وهذا ما كان ، لحد ما ابيدوا عن بكرة ابيهم .

الايطاليين كانوا بيحاربوا في ليبيا البريطانيين في مصر ، ولان خبرة الايطاليين العسكرية اقل ، فكاد ان ينحط عليهم ، فهتلر بعت لهم روميل ثعلب الصحراء فاجتاج المنطقة لحد العلمين في مصر ، وكسب حرب العلمين الاولى سنة 1942 ، لكن بعد ضعف القوات الالمانية في حربها مع السوفييت وقلة الإمدادات انهزم روميل في حرب العلمين التانية ، فبقت افريقيا زي المنطة اللي بتنط منها بريطانيا وحليفتها امريكا على الألمان والطليان في أوروبا ، سنة 1943 الحلفاء هاجموا صقلية جنوب ايطاليا وخدوها ، راح الالمان حطين خط دفاع في وسط ايطاليا صعب اختراقه وأعادوا تشكيل الجيش الايطالي اللي كان مع موسوليني بعد ما اتمسك ، وكان خط الدفاع ده صلب جدا ومقدروش الحلفاء يخترقوه الا بعد اربع شهور غلب .

سنة 1944 دخل الحلفاء روما العاصمة الايطالية واعدموا موسوليني زي ماقولنا قبل كده ، وبعد كده باتحاد كلا من بريطانيا وامريكا واستراليا وكندا تم انزال حملة ( نورماندي ون … مش تو 😀 ) ودي كانت 6900 سفينة و 12000 طيارة حربية ، ومليون جندي وصلوا بعد كده لتلاتة مليون في فرنسا اللى كانت تحت الاحتلال الالماني ، والضرب اشتغل على راس برلين العاصمة الالمانية وموضع هتلر نفسه ، الطيارات بتاعة الدول دي كلها كانت شغاله جهارا نهارا ليلا وسهارى ، وبرغم كده كانت القوات الالمانية شغالة برضه الله ينور صد ورد ، لكن في الاخر قلت قوة الجيش الالماني قدام كل دول – والكترة تغلب الشجاعة – وسقطت المانيا سنة 1945 ولقوا هتلر منتحر في بيته وانتهت الحرب بموته .

نتائج الحرب العالمية الثانية :

• من 50 : 65 مليون بني آدم ماتوا في الحرب دي من مختلف دول العالم إما بالقتل المباشر او المرض او المجاعة ، واتضرر من الحرب أكثر من 80 مليون بني آدم ( جرحى ومشردين ) ، منهم بتوع الهولوكوست اللي لحد دلوقتي مختلف على عددهم .
• معظم دول أوروبا ضربت تفليسة وشحتت من امريكا .
• سقوط نجم بريطانيا كدولة مهيمنة وعلو نجم أمريكا والاتحاد السوفييتي وبدء الحرب الباردة مابينهم لحد سقوط الاتحاد السوفييتي بداية التسعينات .
• اتقسمت المانيا نصين .. نص للاتحاد السوفييتي ونص لقوات الحلفاء وبنوا مابينهم سور برلين ، لحد ما اتهدم نهاية الثمانينات واتوحدت المانيا من جديد .
• كترت حركة الاستقلال عن الاحتلال من بريطانيا وفرنسا لان من الاخر هم ماكانوش لاقيين ياكلوا .
• تأسست الأمم المتحدة من 50 دولة على مستوى العالم وعملت لها منظمات فرعية زي ( مجلس الأمن والمحكمة الدولية .. الخ )
• العرب قبل وبعد الحرب كانوا عبارة عن دمى تحركهم الدول ماعدا اللى اعلنوا الحياد زي السعودية واليمن ، يعني مثلا سوريا ولبنان كانوا تحت الاحتلال الفرنسي ، فخدوهم الألمان ، وأما خلصت الحرب رجعوهم للفرنسيين ، والمصريين حاربوا مع بريطانيا طبعا ، وكان كتير منهم بيتمنى بريطانيا تتغلب من هتلر عشان يخلصوا منها في مصر .
• آه .. العرب عملوا جامعة الدول العربية سنة 1945 بعد انتهاء الحرب وكان هدفه اتحاد الدول العربية لمجابهة أي تحديات ، فبفضل الله إسرائيل خدت أرض فلسطين سنة 1948 يعني بعدها بتلات سنين وبقت دولة الامر الواقع رغم انف الجامعة العربية .