أحد خطوط مايكروسوفت يتسبب في سجن رئيس وزراء وفضيحة ابنته!!

طبعًا على اعتبار إنك مش متابع كل فَسفوسَة فى العالم زي حالاتى خلينى أشرح لك الموضوع عامل إزاي!  😀

من أغرب و أعجب الحاجات اللى الواحد سمع عنها الفترة الأخيرة موضوع  FontGate 😀

من كام شهر ظهرت مستندات بتقول إن سياسيين و رجال أعمال كتير عندهم ممتلكات و استثمارات فى دولة بَنَما، و إنهم بيعملوا كدة كنوع من غسيل الأموال و علشان يتهربوا من الضرايب و الكلام اللى أكيد تعرفه لو كنت لسة بتشغل بالك بالسياسة يعنى!  😀

من الناس اللى اتورطوا فى الموضوع دا واحدة اسمها “Mariam Nawaz Sharif” بنت رئيس وزراء باكستان الأستاذ “Mian Muhammad Nawaz Sharif”   😀 

الأستاذة مريم لما تم مواجهتها بقضايا الفساد و تهريب الأموال و الكلام الجميل دا رَدَّت بإن عندها مستندات تثبت إن لها ممتلكات فى بَنَما من 2006، و إن الكلام دا من قبل ما أبوها يبقى رئيس وزراء باكستان فى 2013، و نشرت المستندات و عقود الملكية دى على Twitter و عملت هيصة و كدة!

لحد هنا و الدنيا تمام، لكن اللى مش تمام إن المستندات دى مكتوبة بخط من الخطوط الموجودة على نظام Windows اسمه Calibri، و الخط دا على الرغم إنه متصمم من 2004، إلا إنه أول مرة يُستَخدَم كخط افتراضي كان فى Microsoft Office 2007، و اللى صَدَر رسميًا سنة 2007؛ إذن المستندات دى اتعملت بَعد 2007 مش فى 2006 يا مَريومَة!  😀 

فد تتخيل إن موضوع زي دا تافه و كدة، لكن الموضوع أكبر من كدة بكتير لدرجة بتهدد بعَزل رئيس وزراء باكستان و محاسبته بتهمة الفساد!! 

يا أخى التكنولوجيا دى زعلها وحش أوي!