المحل دة جامد جداً ،
الصفحة دي على الفيس بوك اتفرج عليها هتفيدك جداً،
المطعم دة بيعمل أكل رهيب.. جربه ومش هتندم!!
مين فينا مبيسمعش الكلام دة من اصحابه أو قرايبه؟؟ طبعاً مش هنلاقي حد مسمعش الكلام دة في مختلف الاعمار والنوع دة من الكلام بيسمى التسويق بالكلام أو التسويق الشفوي أو الشفهي (Word Of Mouth)..
بس يا ترى ايه هو التسويق بالكلام ده ؟؟
التسويق بالكلام هو عبارة عن نوع من انواع العمليات الترويجية الغير مكتوبة سواء مسموعة أو مرئية واللي بيحصل فيه إنك بتلاقي واحد من اصحابك اشترى لبس من براند معين وعجبه فبيحكيلك عليه وبيبتدي يمدح في المجل دة وبالتالي الكلام بيشدك جداً وبيثير إهتمامك وبناءً عليه هتروح تشتري من المحل دة أو على اقل تقدير هتروح تشوف جودة منتجات المحل!!
هل التسويق الشفهي مهم للبراند؟
اسلوب التسويق الشفهي بيعتمد بنسبة كبيرة جداً على علاقة العميل وثقته في البراند اللي بيتعامل معاه وفي الوقت دة بيبتدي يتكلم ويعرف اصحابة وقرايبه عن البراند ده وفي هذة الحالة يعتبر العملاء هم المسوقين للمحلات بس دي بتتوقف على جودة المنتج ليه … ؟
لان التسويق بالكلام نوعين النوع الاول انك بتمدح المنتج وبكدة بتعمل دعاية إيجابية للمنج والبراند والنوع الثاني انك بتذم المنتج أو بالعربي بتتكلم عن البراند بصورة سيئة ودي بتكون راجعة عن ردائة المنتج أو سوء الخدمة..
وطبعاً اكبر مثال حي على استخدام البراندات للتسويق الشفهي هو LC Waikiki اللي عمرنا ما شوفنا اعلاناته على الفيسبوك ولا التليفزيون ولا الراديو ولا اي حاجة خالص بس بيعتمد دائماً على التسويق بالكلام من خلال تقديم جودة مميزة وسعر في المتناول للمستهلك…
طب إزاي اخلي العملاء يتكلموا عني؟؟
1- تقديم منتجات عالية الجودة مع التركيز على تجربة العميل للمنتج لان رأي العميل هو المهم بالنسبة لشركتي.
2- خدمة ما بعد البيع من النقط اللي لازم تركز عليها مع العميل فمن المهم انك تسأل عميلك دائما عن تقييم منتجتك من خلال خدمة العملاء بتاعتك عشان مهم انك تسمع رأيه بالذات لو في مشكلة فحاول دائما انك تحل مشكاكل العملاء واسعى لراحته عشان بجد هتفرق معاك في كلام العميل
3- استخدم وسائل جذب العملاء من خلال عمل الخصومات والسحب على شراء عدد من المنتجات مع عمل هدايا قيمة لان الهدايا من العوامل المحفزة جداً ان العميل يتكلم كويس عليك!!
4- اتعامل مع عملائك بصدق في توضيح نقاط القوة والضعف إن وجدت في منتجك عشان صراحتك مع العميل هتجبره على احترامك
5- في زمن الابتكار والابداع حاليا حاول تفكر في ابداعية لتقديم منتجك أو لفكرة جديدة لعميلك ودة لان تجربة العميل لفكرة جديدة بتفضل دايماً في ذهنه
6- حاول تتوقع المنتج اللي بيلبي احتياج العميل ودة بيأتي من خلال اجراء البحوث والدراسات التسويقي أو من خلال الاتصال بالعملاء دراسة شكاوي العملاء والاستفادة منها ودة بيخلي شركتك في وضع تنافسي اعلى.
في النهاية لازم تعرف ان كلام العميل ورأيه هو المهم بالنسبة ليك في كل الاحوال ولازم تشتغل على راحة العميل وخدمته ومش عيب ان العميل يشتكي منك وتعتذره وتصلح الاخطاء اللي عندك فس سبيل راحته..
- اعرف أكتر عن استهداف الجمهور من خبير التسويق محمد أنور
