ملخص الحرب الباردة .. مقامرة على العالم

دي حرب الهيمنة وفرض النفوذ بين أمريكا والاتحاد السوفيتي وقعدتلها قرب الخمسين سنة ، وعشان قعدتلها قرب الخمسين سنة فمش هنعرف نقول كل حاجة فيها – ده الحرب العالمية التانية خمس ست سنين وكتبنا فيها عشر صفح 😀 – فهنكتفي هنا بأهم أحداث الحرب دي حدث حدث وهنسيبنا من مين قال ايه لمين عشان الرغي بيجيب صداع 🙂 ، فهنقول الأفعال وبس . توكلنا على الله …

قبل وبعد الحرب العالمية التانية كانت أمريكا والاتحاد السوفييتي بيقلبوا نور لبقية الدول العظمى عشان يوسعوا طريق للي جاي يفرم الكل ، واما انتهت الحرب بقت أمريكا والاتحاد السوفيتي فعليا هما قطبي كوكب الارض قوة وتأثيرا .

– أمريكا متبنية ” النظام الرأسمالي ” يعني ( معاك فلوس تدوس الناس تحضن تبوس ) والمبني على احتكار المال والنفوذ والمكانة على مستوى الدول ” والنظام ده مناسب لأصحاب المال والمصالح في الحكومات والافراد ” .
– الاتحاد السوفييتي متبني ” النظام الشيوعي الاشتراكي ” يعني ( يانعيش عيشة فل يانموت احنا الكل ) والمبني على احتكار السوفييت للشعوب والاشتراك في املاك الدول والافراد بعضهم في بعض ” والنظام ده مناسب للغلابة والمعدمين وأصحاب الصوت العالي ” .

طيب عملوا ايه عشان يوصلوا لغاياتهم هم الاتنين ؟ .. عملوا كل الاحداث اللي جايه دي :

1947 مكتب كونفورم :

وده مكتب كان فاتحه ستالين رئيس الاتحاد السوفييتي في يوغسلافيا وكان مهمته انه ينسق بين الاحزاب الشيوعية في كل دول العالم ، يعني اي ثورة او انقلاب اساسه شيوعي او اشتراكي تلاقي المكتب ده مدعمه بالفلوس والخطط والمعلومات من المخابرات السوفييتية رأسا .. واللي كانت مجندة عملاء وصلوا بعدين رؤساء دول 😀 ، وعمل كل البلاوي اللي جايه بعدين ، المهم انه اتحل في سنة 1956 بعد موت ستالين .

1947 مبدأ ترومان :

الرئيس هاري ترومان اللي فرقع اليابان بالنووي جه مره في خطبة كده وخدته الجلالة وراح قايل ان امريكا لازم تساعد اي حد عشان تصد خطر مباشر او غير مباشر عليها وسماه ( سياسة الاحتواء ) ، وراح صارف 400 مليون دولار ساعتها على حربين تلاتة لدول تانية – والحكومات اللي جت من بعده صرفت مليارات – وده في كذا حرب كانت اطرافها دايما حزبين واحد تبع امريكا وواحد تبع السوفييت .

1947 مشروع مارشال :

ده مشروع عمله جورج مارشال وزير الخارجية في حكومة ترومان ورئيس هيئة الأركان بالجيش الامريكي وقت الحرب العالمية التانية .. وكان الهدف المعلن منه إعادة إعمار أوربا بما فيهم الدول اللي داخله في ملكية الاتحاد السوفيتي وضيف عليهم اليابان ، والهدف اللي مش معلن هو صرف فلوس وعمل ترتيبات عشان أمريكا تمنع المد الشيوعي في دول أوربا واليابان ، وصرفت أمريكا 12.9925 مليار دولار في اوربا بس تحت اسم ” منظمة التعاون والاقتصادي الاوربي” .

1947 خطة مولوتوف :

لأ .. ده مش ازازة البيبس اللي بتتحدف وتولع ، ده وزير خارجية الاتحاد السوفييتي في السنة دي ، والخطة دي زي المشروع اللي فوق بالضبط .. بس من جهة الاتحاد السوفييتي للدول اللي داخلة في ارابيز الشيوعية وحضن السوفييت واتسمى ” مجلس التعاون الاقتصادي الاشتراكي ” .

نتايج الحاجات دي : 

فوز أمريكا في كلا من :

الحرب الاهلية اليونانية ، الحكومة الايطالية الجديدة ، إعادة إعمار الدول الاوربية صناعيا وتجاريا ، الدولار الأمريكي أصبح رقم واحد عالميا معلما تعليما اصيلا على الجنيه الاسترليني والمارك الألماني .
فوز الاتحاد السوفييتي في كلا من : تقوية الروابط بينه وبين الدول اللي دخلت الاتحاد حديثا والحكومات الشيوعية العميلة للاتحاد السوفييتي زي تشيكوسلوفاكيا .

1947 حصار برلين :

لما ألمانيا اتقسمت على المنتصرين في الحرب ( من الشرق السوفييت – ومن الجنوب امريكا – ومن الجنوب الغربي فرنسا – ومن الشمال الغربي بريطانيا ) .. ستالين مكانش حابب إعادة إعمار ألمانيا زي ما ترومان كان عايز برغم ان ستالين نفسه كان عرض الموضوع ده في الاول ، لكنه شاف ان ممكن المانيا تعيد قوتها وتحاربه من تاني – تعملها والله 🙂 ، ففرض حصار عسكري على غرب برلين يمنع دخول المساعدات الغربية لها من اكل وشرب وعلاج واي حاجة تانية ، فامريكا وحلفائها عملوا جسر جوي ضخم لدخول المساعدات لبرلين الغربية وفك الحصار عنها ، والشعب الالماني نفسه عمل مظاهرات ضخمة ضد ستالين ، ففي الاخر استجاب لهم سنة 1949 ورفع الحصار .

1949 حلف الناتو وحلف وارسو :

امريكا وبريطانيا وفرنسا وكندا قعدوا مع بعض عملوا اتفاقية حلف وتعاون عسكري ضد التمدد الشيوعي وسموه بعدين ( حلف الناتو ) ، وقعد ينضم له دول تباعا لحد مابقى زي ما انتوا شايفين دلوقتي بقى اكبر حلف عسكري على مستوى العالم ، السوفيت ردوا عالحلف ده باعلان المنطقة الغربية من المانيا دولة مستقلة باسم ( جمهورية المانيا الديموقراطية ) وبعده بكام سنة جمعت الدول بتاعتها وعملت حلف عسكري لوجستي وسمته ( حلف وارسوا ) بهدف الرد على اي تهديد من حلف الناتو .

1949 إذاعة أوربا الحرة و الاعلام الشيوعي :

الشيوعيين لم يبرعوا في شيء بقدر براعتهم في الكتابة والصحافة وإقناع الشعوب بالاشتركية والماركسية ، وكانت حربهم الفكرية اقوى واكثر تأثيرا لأنها كانت بتتكلم مع الفقرا وهم اكتر الناس عددا وكمان كانوا متفوقين جدا في زرع الجواسيس وقدرتهم على كشف الاسرار وانهم يجيبوا المعلومة من الهوا الطاير ، اما التأثير الغربي وفي مقدمتهم امريكا فكان محدود على الاشخاص العاديين … بالغ الاثر على الحكومات عشان الفلوس والمم ، فا اما الغرب لقوا نفسهم كده فعملوا اذاعة اسمها ( اذاعة اوروبا الحرة ) كانت بتستهدف عقول الشعوب اللي الاتحاد السوفييتي مهيمن على حكوماتها وصحافتها .. واشتغلت المخابرات المركزية الامريكية على الاذاعة دي كأن لم تعمل من قبل وبالفعل قدرت تحجم المد الشيوعي في كتير من الدول .

1949 الحرب الأهلية الصينية :

كانت امريكا مدعمة حكومة الحزب الوطني الصيني الحاكم ( يعني مبارك الصيني وجمال وعز الصينيين 😀 ) والسوفييت مدعمين الحزب الشيوعي الصيني بقوة ، الاتنين قعدوا يدبوا في بعض كام سنة ، ولما الرئيس الصيني انهكته الحرب مع اليابان وغلط كام غلطة مع بتوع المصالح في البلد – عمل فيها مرسي يعني 😀 – فكان البديل على طول هم الشيوعيين ومسكوا الحكم وادو الحزب الوطني الصيني بالشلوت وامريكا معاه ..

برغم ان امريكا بعد كده بذلت الغالي والنفيس لاحتواء الصينيين بالفلوس والجيوش والاسلحة لكن برضه الصين فضلت شيوعية وتحالفها مع الاتحاد السوفييتي والروس قائم حتى هذه اللحظة ، لكن امريكا ماسكتتش وعقدت تحالفات مع الدول المحيطة بالصين زي اليابان واستراليا ونيوزلاندا وتايلاند والفلبين وانشئت عندهم قواعد عسكرية تمنع التمدد الشيوعي الصيني مهما عمل .

1950 الحرب الكورية :

( كم إل سونج ) جد الواد الاهبل بتاع كوريا الشمالية اجتاح كوريا الجنوبية بدعم كامل وشامل من ستالين حاكم السوفييت ، فأمريكا وحزب الناتو وقفوا له ورجعوه تاني لبلده ، وجابو واحد يحكم كوريا الجنوبية بدعم كامل وشامل منهم اسمه ( اي سنج مان ) لحد ماسقط نظامه سنة 1960 ، هو اه كان الراجل ده ديكتاتور ومش كويس .. بس الليفيل اللي كان بيلعب فيه جد الواد بتاع كوريا الشمالية محدش عرف يتخطاه لحد النهاردة عشان هو اتبنى سياسة عبادة الرئيس الإله ، وجه ابنه وابن ابنه على نفس الشكل واللون والطعم والريحة 😀 ، ولو بصة صغيرة على الكوريتين من القمر الصناعي بالليل هتشوف فرق النور من الظلام الدامس بين اللي تحت واللي فوق .

1953 خروتشوف وايزنهاور :

بعد ما ستالين مات وترومان مشي ، مسك ( خروتشوف ) الاتحاد السوفييتي بعد اعدام الراجل اللي جه بعد ستالين ، ومسك امريكا ( ايزنهاور ) ، وهم الاتنين كانوا مجانين نووي ، خروتشوف في مؤتمر له في موسكو قال لامريكا وحلفائها ( هندفنكم مكانكم ) ودي كانت إشارة للنووي وبعدها بكام سنة ضربوا في شمال روسيا قنبلة القيصر 1961 كأكبر تجربة لأكبر قنبلة نووية هيدروجينية رعبت العالم من قوتها وتأثيرها ( 3000 مرة قوة هيروشيما ) ، فالحاج أيزنهاور مكذبش خبر وضاعف الإنفاق العسكري النووي عنده اربع مرات وبقى في زمنه عدد الرؤوس النووي اكتر بكتير من الاتحاد السوفيتي ، وكل العالم كان منتظر حرب نووية بين الاتنين ، وده اللي خلى امريكا تحافظ على فرض سيطرتها في الشرق الاوسط وباللذات وقت العدوان الثلاثي على مصر سنة 1956 ومقدرتش روسيا تتدخل برغم احتوائها لعبد الناصر ساعتها .

1956 الثورة المجرية :

الشعب ثار عالحكومة الدلدولة للسوفيت والنظام الجديد اعلن عن الغاء التبعية للشيوعية ، قام خروتشوف باعت عليهم جيشه واعتقلوا 200.000 مجري من الثوريين ، واعدم القائد بتاعهم ( ايمري ناج ) على مرأى ومسمع أمريكا وحلفائها .

1957 سباق الفضاء :

ابتدت العملية دي بعد تطوير صواريخ عابرة للقارات برؤوس نووية تقدر توصل اي مكان في العالم ، فالسوفييت طوروا الصواريخ دي للخروج من الغلاف الجوي وبالفعل قدروا انهم يطلعوا الكلبة لايكا الفضاء الخارجي لكوكب الارض – وكان حديث الساعة ساعتها – ومن بعدها امريكا طلعت شمابنزي ، وكل شوية حرب اعلامية لغزو الفضاء بين الدولتين اشي اقمار صناعية واشي مسابير فضاء واشي اكتشافات فضائية لم يكن للانسان له بها اي علم ، لحد ما امريكا طلعت ( نيل ارمسترونج ) كأول رائد فضاء تنزل رجله على القمر سنة 1967 ، وبعدها اتعاونت امريكا والاتحاد السوفييتي في مشروع ( ابولو – سبوز ) سنة 1975 بتلاحم مركبيتين واحدة امريكية وواحدة روسية في الفضاء وده يدخل عند ده وده يدخل عند ده ، ودي كانت نهاية سباق الفضاء ما بينهم وامريكا هي اللي كملت بعد كده بوكالة ناسا .

1959 الثورة الكوبية وازمة الصواريخ النووية :

فيدل كاسترو و صديقه جيفارا كانوا شيوعيين ضد حكم باتيستا المدعم من أمريكا في كوبا ، عملوا ثورة قدروا بيها يشيلوا باتيستا ويحكم كاسترو بداله ، فامريكا ماسكتتش وهاتك يارخامة على كوبا بكذا طريقة منها غزو خليج الخنازير وحظر اقتصادي ، لكن اما كلها فشلت فالاتحاد السوفييتي عمل اتفاق مع كوبا يبنوا قواعد صواريخ متوسطة المدى يقدروا بيها يضربوا كل حتة في امريكا ، زي ما امريكا كانت عاملة من كام سنة في تركيا وايطاليا وبريطانيا وتقدر تضرب روسيا بأكثر من 100 صاروخ نووي ، فلما عرفت امريكا بالاتفاق بقت المواجهة محتومة بين اكبر قوتين في العالم وكل الدنيا كانت مرعوبة من حرب نووية تأتي على الكل ، لكن بعد عمل حظر اقتصادي وعسكري كامل على كوبا ودخول الرئيس كيندي في اللعبة .. السوفيت رضيوا انهم يشيلوا قواعد الصواريخ بتاعتهم في أكبر انتصار دبلوماسي دولي لامريكا .

1961 جدار برلين وأزمة ألمانيا :

اما الاتحاد السوفييتي لقى الناس عمالة تهاجر من ألمانيا الشرقية بتاعتها لألمانيا الغربية بتاعة اوربا وامريكا راحوا بانيين سور محصن بيقسم المانيا ، فلا ده يروح لده ولا ده يروح لده ، وكانت الازمة دي من اشد الازمات واطولها بين أمريكا والاتحاد السوفييتي وما انتهتش إلا في سنة 1989 بانهيار الجدار .

حروب العالم الثالث :

ودي حروب كتييييييييير مووووت مات فيها ناس بالهبولي وكانت حروب أكثرها بالوكالة بين أمريكا والاتحاد السوفييتي ، اللي فاكروا فيها دول :

1 – حرب فيتنام : بين فيتنام الشمالية الموالية للسوفييت والصين ، وفيتنام الجنوبية الموالية لأمريكا ، استمرت الحرب من 1957 لحااد 1973 ومات فيها قرب الاتنين مليون من الجهتين بما فيهم قرب ال 50 الف جندي امريكي و20 الف جندي صيني و16 روسي بس 🙂 ، وانتهت بفوز فيتنام الشمالية وهزيمة امريكا وحلفائها .

2 – الحرب الاندونيسية الماليزية 1962 : 1966 : بين اندونيسيا المدعومة من السوفييت وماليزيا المدعومة من امريكا ، ومات فيها قرب النص مليون بني ادم ، وانتهت بانسحاب اندونيسيا .

3 – حرب اكتوبر 1973 : رغم ان غالب المؤرخين المصريين بينكروا دعم الروس في الحرب واسرائيل بتنكر دعم امريكا ، لكن يكفي ان التسليح والتجهيز العسكري كان من الدولتين لحد قبل بداية الحرب ، ومات فيها 8000 شهيد مصري ، و 10.000 قتيل اسرائيلي ، وانتهت بانتصار مصر .

4 – حرب اوغادين 1977 : ودي كانت بين الصومال المدعومة من امريكا واثيوبيا المدعومة من السوفييت وكوبا ومات فيها 12000 جندي من الطرفين ، وانتهت بانتصار اثيوبيا وانسحاب الصومال .

5 – الحرب الاهلية الانغولية 1974 : 2002 : وكانت بين الجيش الانجولي التابع للسوفييت وكوبا والصين والحزب الديمقراطي المعارض التابع لامريكا ومات فيها 15000 وانتهت بفوز الجيش الانجولي .

6 – الحرب السوفييتية في افغانستان 1979 : 1989 : ودي كانت بدخول الجيش السوفييتي لافغانستان عشان يدعم الحكومة الافغانية الموالية له ضد قوات الجهاد الافغاني الاسلامي المدعومة من امريكا – ومحدش يزعل دي حقايق 😀 ، واستمرت الحرب عشر سنين اتبهدل فيها الجيش السوفييتي اخر بهدلة واتقتل فيها قرب 30 الف روسي وافغاني موالي لهم ، و 90 الف مجاهد افغاني على الطرف التاني وانتهت بفوز المجاهدين الافغان بالحكم وبعدها انهار الاتحاد السوفييتي على طول .

فيه شغل اتصرف فيه مليارات بين القوتين زي حرب النجوم اللي اعتمدت على حماية الفضاء لأمريكا بالصواريخ البالستية واترصدت لها 26 مليار دولار سنة 1983 ، واستكمال مبادرة ترومان ومشروع مارشال اللي قعدوا يصرفوا على اوربا لحد ما بقت اوربا امتداد اصيل للهيمنة الامريكية ، ومفيش حرب بتدخلها امريكا الا وتلاقي معظم دول اوربا في جيبها من ساعتها ، والمثل بيقولك ( اطعم الفم تستحي العين ) 🙂 .

اخيرا وفي أواخر الثمانينات كانت الـ ( money talking ) هي القاعدة العالمية الأكثر قبولا ، واللي معاه قرش يسوى قرش ، وبقت فيه دول كتير مش لاقية تاكل بمعنى الكلمة ومستنية معونات الدول الغنية وفي مقدمتها امريكا ، فالكلام الحلو بتاع الشيوعيين ماعدش بيأكل عيش في كل بلاد العالم وقاعدة ( النضال من اجل الحرية ) اتبدلت بقاعدة ( ابجني تجدني ) ..

فأمريكا ودول أوربا عملوا حظر اقتصادي على الاتحاد السوفييتي والدول المتعاونة معاه – ولا زال .. وبوتين بيكح تراب – فاضطر الرئيس ( ميخائيل جورباتشوف ) لعمل مبادرة مع امريكا اسمها مبادرة ( بيريستوريكا ) والخلاصة فيها انها بتقول لـ( العم سام ) انت المعلم ومنك نتعلم ، ومن بعدها على طول اعلن انهيار الاتحاد السوفييتي سنة 1991 ، وبقت أمريكا القوة العظمى الوحيدة في العالم من يوميها وحتى الان حتى ولو مسكها أرنب بلدي 😀 .