الحلم الأمريكي بعيون مصرية .. ( الحلقة الثانية)

بما ان البوست اللي فات شجع ناس كتير للسفر لامريكا .. فخدوا بقى شوية مواقف من اللي شفتها بعيني خلال المدة الطويلة اللي عشتها هنا في امريكا.. هحاول ارسم لكم بيها الصورة الكاملة للعرب والمسلمين والمصريين داخل المجتمع الامريكي .. اعملوا كوباية شاي تقيلة او قهوة واسمعوا واعوا 

1 – ابنك الامريكي من حقك ولا من حق أمريكا ؟

أسرة مصرية جت أميركا بطفلين في الابتدائي .. حاولوا يربوهم على عادات المجتمع الأمريكي من لغة وتقاليد غربية .. لدرجة ان اولادهم نسيوا انهم مصريين كلغة او عادات او دين .. المهم ربنا رزق الابوين بمولود جديد في امريكا .. بعد كام شهر .. كده بالقضاء والقدر سابو الطفل عالكنبة لوحده وانشغلوا عنه .. قعد يرفس ويلعب شوية فوقع من عالكنبة عالارض وهاتك ياصريخ .. طلبوا الدكتور بسرعة .. ولما جه قال إن ايده مكسورة ولازم يروح المستشفى .. بس كده وسابهم الدكتور الأمريكي ؟ .. لأ ازاي .. بلغ الشرطة وقلهم ان الابوين مهملين وهم اللي كسروا دراع البيبي !!!

جت الشرطة وحققوا مع الأبوين لساعات وساعات .. وفي الاخر اتحولت الحكاية للقضاء وصرفوا صرف محاميين ومرواح ومجي .. فلما اتنرفز الاب المصري مرة عالقاضي اللي كان بيتهمه انهم هم اللي قاصدين يكسروا دراع الولد مش وقع ولا حاجة .. فصرخ الأب في وشه وقاله ده ابني الرضيع انت شايفني اييييه ؟!! ..

فقام القاضي طسه حكم ( نزع حضانة ) .. والشرطة جت خدت الولد من حضن امه واودعته الملجأ هو واخواته .. مش بس كده لأ ده كمان خدوا الطفلين التانيين معاه .. والاب يعيط ووقع عالارض .. والام تلطم ويغمى عليها ولا حياة لمن تنادي .

التربية الأمريكية ظهرت على طفلين .. ولا حس ولا خبر ولا أدنى تأثر .. راحوا مع الشرطة بدون أي امتعاض ولو حتى بسيط او اي شفقة بحال امهم وابوهم .. بل ان الطفلة الكبيرة انا بنفسي سألتها وقلتلها هتسيبي ماما كده بالساهل ؟ .. قالتلي بالانجليزي بكل بجاحة مهو الشرطة جابت لي هدايا احسن من بابا وماما وعنيها مليانة تحدي !!!

بعد فترة طويلة طلع تقرير طبي من المستشفى ان الطفل البيبي عنده نقص كالسيوم في العضم وده اللي سبب كسره السريع .. الاب والام خدوا الولاد من هنا .. وفوووووووووو على مصر ومعتبوش امريكا تاني من يوميها .. وغنوا يا حبيبتي يا مصر بصوت شادية .

2 – السوداني وابنه ..

عائلة سودانية لهم طفل في الروضة .. المهم الام بتطبخ فغصب عنها وقعت حاجة سخنة على ضهر الطفل فاتلسع لسعة كده .. خافوا يودوه لدكتور او مستشفى وجابوا هم مراهم وعلاج وغيبوه من المدرسة فترة علاجه .. بعد فترة المشرفة في المدرسة اكتشفت اللسعة في ضهر الولد .. بلغت المديرة .. المديرة بلغت الشرطة .. دخلوهم في قضية والقضية كبرت .. والشرطة اخدت الولد برضه .. بس المرة دي ودوه لاسرة ترعاه ( تبني يعني ) .. المهم الاب خد الطفل اداله منوم وسافر هو وزوجته وابنه عالسودان .. ومحدش شافه برضه من يوميها ..

3 – العائلة السعودية ..

اب وام سعوديين عندهم طفلة ثلاث سنين وطفلة تانية عمرها سنة .. كانوا قاعدين في فندق ونزلت الام تجيب حاجة من استقبال الفندق وسابت الطفلتين في الشقة .. رجعت لقت الطفل الكبيرة حبت تحمي اختها الصغيرة فغرقتها في البانيو .. للاسف ماتت الله يرحمها ويصبر اهلها .. الشرطة جت وقبضت عالام .. والمحكمة سجنتها .. وخدت الطفلة الكبيرة للرعاية والتبني .. والأب ولا عرف يعمل حاجة .

4 – التركي وابنه ..

تركي مسلم ضرب ابنه بس بدون ادنى اصابات نهائي .. حد بلغ من الجواسيس اللي حواليه .. جت الشرطة خدت الاب والمحكمة حكمت عليه انه مايقربش من البيت المقيم فيه الولد وامه ويسكن في بيت تاني .. وقد كان ..

5 – الانفصال للأبناء البالغين ..

مرة واحدة صديقة عربية مسلمة عزيزة عليا جالها ابنها اللي عمره 16 سنة وطلب منها انه ينفصل عنهم ويطلب اعانة من الحكومة في سكن خاص عشان مش مستريح معاهم في البيت .. الام اتجنت وحست ان سنين عمرها راحت هدر .. حاولت مرة والتانية مع ابنها .. ابدا .. وبالرغم من تدين ابنها وانه ملوش صديقة امريكية عايز يقعد معاها في البيت الجديد يعني .. لكن نفذ اللي في دماغه وساب البيت والقانون والدستور بيحموه .. الام عاشت ايام صعبة جدا هي والاب .. ولما حصل له حادث ما راحوش زاروه .. لحد اما هو اللي رجع لوحده للبيت وبكى في حضن مامته وباس راسها .. لكن للاسف الى الان قلبها مش قادر ينساله اللي عمله فيها ده .

6 – الابن المصري والبنت الأمريكية ..

شاب مقدرش يقاوم رغبته في الانفصال عن الواقع اللي عايش فيه كعربي مسلم محافظ في مجتمع امريكي منفتح .. قام مصاحب بنت امريكية في الاصل والمولد .. وعاش معاها التجربة الأمريكية اللي كانت تربيته وحفظه لآيات الله مانعاه منها .. هوت شورت .. فل ميكب .. تسريحات خزعبلية .. تصرفات جنونية .. لكن يوم ورا يوم لقى نفسه هيمشي في السكة الغلط .. 

اتواصل مع امه وقالها انه عايز يتجوز صديقته الامريكية .. بعد صدمة اهله وافقوا بكسرة النفس .. لكن شرطوا عليها ان رعاية المواليد تبقى حقهم .. وطلبوا انهم يتقابلوا عندهم في البيت مش بره .. وعرضوا عليها انها تسلم .. وافقت ع الشرط الاول بكل اريحية لانها مالهاش في الاحساس بالامومة .. والطلب الثاني مكنش عندها عليه مانع .. والطلب التالت وعدت بالمحاولة .. 

يوم ورا يوم .. ابتدت تتأفف من عادات المسلمين في اللبس والتصرفات .. شوية بشوية ابتدت تتمرد .. سابت ابنهم الشاب بلا رجعة .. فانهار الابن كليا .. ٦ شهور توقفت حياته بالكامل ومش قادر يكمل .. خسر وزنه بشكل كبير .. واكتئب بشكل أكبر .. وفي النهاية ملقاش غير حجر امه ينام عليه ودموعه مالية عنيه .. وحمد ربنا وشكر فضله على عناية اهله له ..

خاتمة :

أصعب حاجة في أمريكا هي تربية الأولاد والحفاظ عليهم .. فلو رايحين امريكا فكروا الف مرة هتخططوا لتربيتهم ازاي والا هيضيعوا منكم .. سواء بالقانون الامريكي اللي بياخدهم لانهم امريكان .. أو بضياع هويتهم الاصلية منهم .