الحلم الأمريكي بعيون مصرية .. ( الحلقة الثالثة)

دي شوية مواقف حصلت قدامي عن سلبيات الحياة الاجتماعية في امريكا .. وبرغم ان مش كل الدنيا هنا كده لكن دي ابرز السلبيات عشان اللي ييجي ميتفاجئش .

أولا : الجنس والتحرش ..

كيفين طفل جميل في الحضانة .. المعلمة بتاعته لاحظت حرق في رجله .. ولما سألته عليه خاف واترعش لكن في الاخر قال دي ماما .. مامته امريكية عايشه بدون اب مع صديقها في شقتها .. ولما كانوا سكرانين هي وهو بالليل كانو عايزين يبعدوا الولد ويختلوا بنفسهم فهددوه بالاستشوار فاتحرق .. والام والعشيق اتمسكوا ودخلوا السجن والطفل دخل رعاية .

مديرة في المدرسة جالها طفل يشتكي لها ان صاحبه مسكه من مكان حساس .. فزعقت للطفل التاني وهددته لكن معملتش تقرير ومبلغتش الحكومة .. ولما الام اشتكت جت الشرطة وعملت محضر واترفدت المديرة للاهمال .. وزيه موقف مع معلمة طفل جالها اشتكا لها من طفل بيتحرش بيه وقالها اسمه .. وبعد تحقيق طويل مع المعلمة طلع ان اللي عمل له كده جارهم ومش زميله في المدرسة فراحوا قبضوا عليه وعلى ابوه .

طفل مسلم كل شوية زميل امريكي يبعت له انه بيحبه وعايز يعيش معاه طول عمره ونفسه انه يبقى مراته حسب القانون الامريكي الجديد .. والطفل قال لابوه وامه وهم اتصرعوا لما عرفوا .. وللاسف الحكايات اللي زي دي مبيبقاش لها حل الا بابعاد الطفل عن صديقه المثلي ده .

عائلة خليجية لهم ابن شاب اتمسك في قضية من أخطر قضايا المجتمع الأمريكي وهي التحرش بالقصر .. الأسرة بالكامل بقرايبهم سافروا من امريكا ورجع السبب ان فيه خال أمريكي لبنت عندها 13 سنة وواصي عليها كان بيتلذذ انه يستضيف كل من هب ودب عنده ويعرض عليه بنت اخته دي للمتعة بدون مقابل بشرط انه يتفرج عليهم .. البنت فاقت بعد فترة وبلغت واتسجن الخال وكل اللي جم له وشارك معاه في الجريمة دي ..

ثانيا : التنصير ..

اللي بيتقربوا من المصريين نوعين .. منهم اللي بيحب اكل المصريين وكل شوية يجيلك بيتك عايزك تأكله .. وفيه منهم اللي بيتقرب جدا منك تجنيدا من الكنيسة .. وده منتشر جدا .. اخرهم صورة كبيرة متعلقة في الكنيسة لشاب سعودي جه في منحة دراسية واتنصر ودخل المسيحية .. وغيره كتير من اللي انبهروا بالسلام الاجتماعي والكرم والسخاء من الحكومة الامريكية في بعض الحاجات اللي ملقهاش في بلده الأم .

ثالثا : انفلات الابناء ..

شابة تونسية مسلمة اول ما وصلت الثانوي حبت شاب امريكي مش مسلم وبعدها هربت معاه في عمر الـ 17 سنة .. حاولوا اهلها بكل الطرق انها ترجع لهم وتسيب حبيبها .. ابدا .. والقانون والدستور بيحموها من أهلها .. رجعت لهم بعد 5 سنين عذاب وقهر معاه .. وشايله على ايديها طفل رضيع منه بدون زواج .. وكان أهلها ساعتها حالتهم النفسية اتدمرت تماما .. لكن اما اتماسكوا جابوا الولد وكتب عليها شرعي وحفظوا حقوق بنتهم ..

شابة سورية عملت نفس الموضوع اللي عملته التونسية لكن مع شاب من العصابات .. العائلة حبست بنتهم وضربوها .. فاتصلت هي بصاحبها فجالها البيت ومعاه الشرطة وخدوا البنت غصب عنهم .. ووسط دموع اهلها طلعت مع صاحبها .. وبرضه رجعت بطفل بعد كذا سنة لبيت اهلها بعد هروب صاحبها منها ..

بنت وصلت امريكا للدراسة ومعاها والدها كمرافق .. الاب اكتشف انها بتعرف شاب امريكي وبتروح وتيجي معاه لبيته .. الاب اتجنن وزعق لبنته ويقال انه ضربها .. راحت اشتكته للشرطة .. الراجل اترحل لبلده بعد بهدلة .. والبنت فضلت مع صديقها الامريكي بحماية القانون والدستور .

اب سعودي اكتشف صداقة بين بنته وشاب امريكي وكانوا بيتفقوا عالهرب .. فابوها كتم السر في قلبه واقنعها والدها انهم يروحوا يزوروا اهلهم بالسعودية ويرجعوا على طول .. اول ما نزل مطار الرياض مسكها اداها علقة فرج عليها امة لا اله الا الله .. وقطع جوازات السفر بالاقامة الدايمة ومجوش تاني امريكا لان البنت كان معاها اقامة بس اما لو معاها الجنسية كانت امريكا خدتها من ابوها ومن أي حد يتشدد لها وده طبقا للقانون والدستور الامريكي ..

رابعا : العنصرية ..

بعد هجمات سبتمبر 2001 .. غالب المجتمع الامريكي قلب ع المسلمين والعرب .. في الاعلام اليهودي شعلل الموضوع ع الجاليات العربية والاسلامية .. وجت اكتر من فتوى لقلع الحجاب للستات لكني مرضيتش الصراحة رغم الكلام اللي كان بيوجعني في الشوارع من ده ومن ده .. بس كنت بلبس كاب عالطرحة للتخفي والتمويه ..

لكن الشهادة لله بعدها بـ 4 ايام الشرطة عملت معانا اجتماع في المسجد وقالت لنا انهم هيحمونا من أي تعدي مهما كان عدد وقوة اللي هيتعدى علينا .. وللاسف اتضرب جنبنا مسجدين من متشددين امريكان .. فخففنا جدا من الخروجات بره البيت وكنا عايشين في زعر وقلق دائم علينا وعلى اولادنا .. لكن الحمد لله عدت على خير ..

في نفس الاحداث حصلي مرة ان فيه سيارة جريت ورايا وزنقت عليا وبالعافية اما فلت منها واما بلغت الشرطة كنت من كتر الرعب والخوف اللي انا فيه نسيت رقم السيارة .. ومن بعدها اتغير التعامل في المطارات من تفتيش واجراءات روتينية زيادة اوي عالعرب والمسلمين بعد 2001 .. 

دلوقتي امريكا فيها رعب بعد وصول ( ترامب ) المعتوه وان ممكن نرجع تاني لاحداث 2001 في كراهية العرب والمسلمين خصوصا وان كذا حادث قريب حصل من اتباع ترامب ميقلش ابدا عن أي ارهاب بيحصل في العالم .. منهم ان واحد من انصار ترامب قتل شيخ وإمام مسجد في نيويورك والمساعد بتاعه في شارع عام بالمسدس في راسهم من ورا .. ومن غير ما حد يتحرك من اللي ماشيين .. واخيرا واحد حرق المسجد القريب من بيتنا .. لكن الحكومة امرت بترميمه الفوري .. وربنا يستر ..

خاتمة ..

مش كل اللي جه امريكا قدر يحقق الحلم الامريكي للغنى والثراء والسعادة الابدية زي ما الكل بيحلم .. فيه اللي عاش مشتت بين تقاليد دينه وعاداته في بلده وبين المجتمع الأمريكي .. وفيه اللي عاش كويس وكافي خيره شره وبياكل ويشرب وعايش على قده .. وفيه اللى دخل جامد في المجتمع الامريكي وعاش امريكي هو وعيلته .. كسب فلوس اه .. لكن للاسف خسر نفسه .