في اليومين اللي فاتوا دكتور مجدي يعقوب كان واحد من الشخصيات المتصدرة الترند على مواقع السوشيال ميديا في مصر والإمارات، وده بعد تكريمه من قبل الشيخ محمد بن راشد آل مكتوم حاكم دبى، ومنحة وشاح محمد بن راشد للعمل الإنسانى مقابل جهوده فى العمل الخيرى والإنسانى وإنجازاته الطبية والعلمية.
وصحيح معظم الناس بتحب دكتور مجدي يعقوب وبتعمل شير لأخباره عشان إنسانيته الغير محدودة ومجهوداته العظيمة في عمليات جراحة القلب، إلا أني في اليومين دول كل ما أقابل فيديو بيتكلم فيه أو بوست بيتكلم عنه، أحس إني مش بس شايفاه مثال للإنسانية، انا كمان شايفاه مثال حي للقائد المُلهم،
القائد اللي عنده قدرة على خلق هدف عام وتوليد حماس حقيقي عند الأفراد لتحقيق الهدف ده، وبالتالي كل شخص في منصب قيادي لازم يحتذي به ويتعلم منه، وده لأنه بيمتلك صفات زي:
– العطاء وحب مشاركة المعرفة:
“لما بشوفهم بيعملوا عمليات دقيقة بطريقة أحسن مني ده بيديني سعادة، عايز أدي كل المعلومات اللي اعرفها للشباب مش عايز حاجه تضيع لما اموت “، القائد الناجح مش بس بيعمل حاجات عظيمة لا ده كمان بيدفع اللي حواليه للتغيير وتحقيق نجاحات وأشياء عظيمة، وده اللي بيعمله دكتور مجدي يعقوب باستمرار مع كل تلاميذه وكل اللي بيشتغلوا معاه لأنه عايز يشوف العالم مكان أفضل، ده إلى جانب حرصه الدائم على نقل خبراته ومشاركة معرفته مع مئات الجراحين من العرب والأجانب، بهدف نشر المعرفة ورفع مستوى عمليات جراحة القلب في كل مكان في العالم.
– يمتلك الشغف:
في مقابلة للدكتور مجدى يعقوب مع مجلة، Biologists قال أنه كان مغرم بمهنة الجراحة لأن والده كان جراح عام، والسبب اللي خلاه يختار مجال جراحة القلب، أنه لما كان عمره حوالي 5 سنين، عمته توفيت فجأة وهي في العشرينات بسبب ضيق في صمام القلب، ووالده فضل سنين حزين عليها، عشان كده قرر أنه لما يكبر هيشتغل جراح قلب عشان ينقذ الناس من الموت.
وشغفه لأنقاذ الناس خلاه يقوم بـ 3500 عملية زراعة قلب و 20 ألف عملية قلب مفتوح، وبقى واحد من أشهر أطباء جراحة قلب في العالم، ولحد النهاردة بيساعد في إنقاذ مئات الأطفال والكبار من الموت من خلال مستشفى مجدي يعقوب للقلب في أسوان ومؤسسة سلاسل الأمل في بريطانيا.
الحماس لمهمة الشركة أو المنظمة صفة لازم تتوافر في كل قائد، لأن مهمة القائد الناجح هي إلهام الناس للعمل في خدمة شيء أكبر من أنفسهم، يعني لازم الموظفين يكونوا مؤمنين برسالة الشركة وهدفها وعارفين قيمة العمل اللي بيقدموه عشان يقدموه بأفضل شكل ممكن، وده بيحصل بشكل تلقائي لما الموظف يكون حاسس أن مديره بيحب شغله، وشايف هو أزاي متحمس وعارف أهمية الشئ اللي بيعمله.
– التجديد والتطوير:
حصل الدكتور مجدي يعقوب طوال سنوات عمله على عدد هائل من الأوسمة والجوائز ونشر عدد كبير من الدراسات والأبحاث المتعلقة بجراحات القلب، وعلى الرغم من كل ده، لحد النهاردة مازال عنده رغبة في البحث والوصول لاكتشافات جديدة سواء في طرق العلاج أو في التقنيات المستخدمة في الجراحة. لأنه شايف أنه طول ما احنا عايشين لازم نواصل البحث والتعلم.
وهو ده دور القائد، أنه يسعى باستمرار لتطوير العمل واكتشاف طرق جديدة لتحسين الأداء ومساعدة الموظفين على تنمية مهاراتهم وقدراتهم بالإضافة لكسر التكرار والروتين اللي بيؤدي لضعف وتراجع العمل.
– الإيجابية:
لو اتفرجت على أي فيديو لدكتور مجدي يعقوب وهو بيتكلم عن مستشفى القلب هتحس بإيجابية، وهتشوف بنفسك أد أيه هو شخص إيجابي ومتفائل وبيحب الحياة وعنده هدف واحد وهو مساعدة الناس ومنحهم الأمل ورسم الابتسامة على وجوههم وبيحاول يحقق الهدف ده بكل الطرق الممكنة.
والروح الإيجابية هي واحدة من أهم الصفات اللي بتميز القائد المُلهم، لأن القائد لازم يكون مُدرك أن أي عمل أكيد هيواجه مشكلات وتحديات وفشل، وبالتالي لازم يبقى قادر يشوف الجانب المشرق أو الإيجابي في أي مشكلة، عشان يقدر يشجع الموظفين أنهم يكملوا في الأوقات الصعبة، ويخليهم يتعلموا من أخطائهم بدل ما يشعروا باليأس والاستسلام.
– يقدر فريق عمله:
دكتور مجدي يعقوب دايماً بيقول ” لوحدي عمري ما كنت هعمل حاجة أهم حاجة فريق العمل المتفاهم “. وكل فرد بيشتغل فى مؤسسة مجدي يعقوب بداية من عامل التنظيف ولحد مدير المستشفى، عارف أهمية دوره وقيمة اللي بيعمله وأهمية دور كل فرد، وده بسبب روح العمل الجماعي اللي بينشرها دكتور مجدي في المؤسسة.
مفيش حاجه ممكن تخلي الموظفين مش ملتزمين بالعمل أكتر من شعورهم بأن مجهودهم غير مقدر وغير ملاحظ، وبالتالي القادة لازم يظهروا التقدير للموظفين اللي بيشتغلوا معاهم باستمرار، واستخدام كلمات بسيطة زي ” شكراً لك ” أو ” انا عارف أنك بتبذل مجهود كبير ” أو ” لم يكن هذا العمل ليتم بدونك ” هتخلي الموظفين يشعروا بالتقدير والاهتمام وبالتالي هيقدموا عمل وإنتاج أفضل.
– يتعامل مع الجميع باحترام:
في الفيديو اللي اتذاع في حفلة التكريم، واحدة من العاملين في المستشفى بتقول ” اتعلمت حاجات كتيره جدا من ضمنها الأنسانية اللي دكتور مجدي يعقوب بيعلمها لنا كلنا “
أفضل القادة هم اللي بيمتلكوا صفة التواضع، والمصداقية، والطيبة والاحترام، لأنهم عارفين أهمية وتأثير معاملة الموظفين بطريقة جيدة. وهم القادرين على رؤية إيجابيات الأفراد ومواهبهم، ودفعهم لتعزيز طموحهم وتقديم أفضل ما لديهم.
– مستمع جيد:
” أحنا طول الوقت بيكون في بينا مناقشة، طول ما أحنا شغالين في الحالة بيكون في مناقشة ” ده كلام واحدة من الدكاترة اللي شغالين في مستشفى مجدي يعقوب.
القائد المُلهم بيسمع للجميع، وبيدعم اتباع سياسة الباب المفتوح من خلال التعرف على أراء كل فرد في فريق العمل، وتشجيعهم على المساهمة في تحقيق الأهداف المشتركة.
– شخص يعمل بجد:
معروف عن دكتور مجدي أنه شخص مجتهد ومخلص جداً لشغله لدرجة أنه كان ممكن مينمش ويطبق باليومين والتلاته بشكل متواصل ويسافر من مكان لمكان تاني عشان يكمل العمليات وينقذ الحالات الحرجه أو عشان يحضر مؤتمر أو يناقش بحث. ولحد النهاردة مازال بيقوم بإجراء العمليات الدقيقة والمعقدة للأطفال بنفسه وبيشرف على باقي العمليات.
والاجتهاد ورؤية الموظفين لتفاني المدير في عمله ودوره في نجاح الشركة، بيخليهم عايزين يشتغلوا بنفس القدر من الأجتهاد وبيخلي عندهم الرغبة في تحقيق نجاحات أكبر.
لديه رؤية للمستقبل:
دكتور مجدي بيقول أن التوسعة في المركز الجديد، الهدف منها إلى جانب مساعدة مرضى أمراض القلب، هو التوسع في خلق جيل جديد من الكوادر الشابة من العلماء والأطباء وأعضاء هيئة التمريض وتوفير مزيد من فرص التدريب لهم. من أجل وضع مصر على الخريطة العالمية للأبحاث المتعلقة بأمراض القلب.
القادة المُلهمين عندهم رؤية للمستقبل، عارفين الأهداف اللي بيسعوا لتحقيقها بشكل واضح، عارفين المستقبل اللي هما عايزينه شكله أيه، وقادرين يرشدوا الآخرين على طريق الوصول إليه. ووجود خطة وأهداف محددة وتفصيلية للمستقبل يعتبر أهم حافز لإلهام الموظفين للعمل والسعي.
القائد المُلهم هو اللي بيأسس منظومة ناجحة ومتكاملة، وقادر يلهم الأخرين أنهم يمشوا في نفس الطريق ويسعوا لتحقيق نفس الحلم، والدكتور مجدي يعقوب مش بس قادر يلهم مجموعة من الموظفين، ده قادر يلهم الملايين.
