اتمني نشر التجربة لان هيحسها ناس كتير .. اتجوزته عن قصة حب رهيبة من الجامعة غّمت عينه و عيني عن حاجات كتيييير مشوفنهاش غير بعد ما اتقفل علينا باب واحد.. بدأت المشاكل مع الارتباط الرسمي و كنا بنطنش .. افتكرنا حبنا اقوي من كل الاختلافات بس ده محصلش..
من اول سنة فكرنا في الطلاق اكتر من مرة.. اتطلقنا فعلا بعد يوم الـ anniversary الاول !! حبنا اتقضي عليه و مات بسبب اننا غمينا عنينا عن عيوب قاتلة و انجرفنا ورا حب مراهق …
كل اهلي هاجموني .. كل الناس بقت بتلسّن عليا… كل الناس بقت بتتكلم في ضهري !! حتي اقرب صحابي!! بقيت اسمع اني مش بتاعه فتح بيت و لا قد المسئولية و اني بتبطر علي النعمة مع ان ولا حد فيهم يعرف اي تفصيلة عن حياتي !! حاكموني مع انهم ممكن جدا ميستحملوش رٌبع اللي استحملته …
اتحديت كل ده لاني كنت دخلت في اكتئاب و لف علي دكاترة نفسيين و مفيش تحسن .. اتحديت كل ده لاني كنت بنهار و محدش حس بيا و لا فكر يحس بيا !! كله شايفني بتدلع و خلاص !! مع اني عيشت خيانة و ظلم و اهانه و طرد في الشارع في عز الفجر !! عيشت مع واحد خدعني بدل المرة ١٠٠٠ و كل مرة بسامح و بشوف خيانته بعيني و في بيتي و علي سريري و احنا لسه عرسان جداد !!
ارجوكو ارحموا اي ست قررت الانفصال، ارحموا نفسية كل واحدة تقول فعلا مش قادرة اكمل !! انا اتصدمت في حبيب عمري و محدش حس كام مرة اتوجعت و كام مرة نمت مقهورة و كام مرة كان نفسي اسيب البيت و محدش يعرفلي سكة !! ارحمو واحدة ممكن تفكر في الانتحار مع انه كٌفر لمجرد ان اهلها بيهاجموها انها بتدلع و هي شايلة كتير بس مش راضية تحكي عشان اصيلة … و يوم ما هتنسحب هتنسحب باحترام …
انا حياتي بدأت بعد الانفصال.. بعد ما شيلت هم تقيييييل اوي من علي ضهري.. مكنتش بعرف انام و لا آكل.. كنت بتعزم علي اغلي أكل و بيقف في زوري كإنه دبش و بيوجع بطني كإنه مياه نار … كنت بطّبق بالكام يوم من غير نوم و بقيت شخص بارد حزين ميت !!!
الانفصال مش شرط يكون دلع ممكن يكون عضو لازم نبتره عشان نقدر نعيش !!! بلاش النظرة الدٌونية المتخلفة لاي واحدة انفصلت ، في متجوزين متدمرين نفسيا يصعبوا عليك اكتر من كتير قرروا ينفصلوا عشان فعلا خلاص كفاية لحد كده … من بعد الانفصال رجعتلي ضحكتي.. رجعلي حب الحياه… تفوقت في شغلي …. لو الجوازة مش صح و طرفيها اسوياء و محترمين يبقي ليه نموت نفسنا لمجرد ارضاء مجتمع سطحي مريض مبيعجبوش العجب ….
الجواز حلو اوي بس لو جواز فيه احترام و ناس عارفة ربنا و ناس فاهمة يعني ايه اصلا جواز .. اياكو تتجوزوا بقلبكو و بس !! الحب ده اسهل و اول حاجة بتنهار في الجواز لو في عيوب مميتة !! استخيروا علطول و ركزوا في العلامات اللي ربنا بيبعتهالكو.. متغموش عنيكو و تقولو الوقت بيغير !! محدش بيتغير !!
انا مش بدعو للانفصال ابدا بس بقول للمجتمع و للناس اهدوا شوية و ارحموا !!!! ربنا هيحاسبكم علي سوء ظنكم … علي الغيبة…. علي وصف الناس بما ليس فيهم عشان انتو بتحبوا اللت و الخوض في اعراض الناس !! فعلاً …اللي ميعرفش يقول عدس !
