من كام سنة كان ظهر كشف أثرى لتمثال من تماثيل الملك رمسيس الثاني فى المطرية.. الوزارة بدأت تتعامل مع التمثال بالطرق المعتادة بتاعتها.. شفنا الونش ازاى كان بيطلع التمثال ولا كأنه المعلم بيومي ابو الهدد وهو بيشيل كسر الحجارة علشان يبنى مكانه برج..
الموضوع انتشر على السوشيال ميديا .. فالوزارة علطول لمت نفسها وبدأت بناء على تعليمات السيد الرئيس تستخدم طرق محترمة علشان تطلع التمثال سليم.
بعد مستوانا في التعليم ما أصبح ال 139 من 140 دولة اشتركت فى التصنيف.. قرر وزير التعليم “بناء على تعليمات السيد الرئيس” انه يطور التعليم.. حضرته شاف فى المنام ان التكنولوجيا هى الحل..
نام وصحى وراح جايب اى باد للطلبة علشان تمتحن عليه مره واحده كده.. طبعا محدش ناسي المسخرة بتاعة الغش والمواقع اللى مش بتفتح والسيرفرات اللى كل شوية يتعملها ريستارت علشان المواقع مش شغاله.. كانت مهزلة حقيقي.. بس الحمد لله طورنا التعليم اهو.
الانسان البائس لا يرى حل للزحام الا مزيد من الكباري.. كل ما تتزنق اديها كوبرى وصلى على النبى.. بس لو لقيت الكوبرى داخل على الناس بيوتها.. ميهمكش.. قول ان العمارات مخالفة وهنعوضهم.. ولما تطلع الناس معاها تراخيص البناء ويكشفوا كم الفساد والقرف اللى ضارب فى اعماق جذور الدولة..
ابقى قول انه مخطط أخواني للوقيعة بين الشعب اللى فرحان بالكباري وجيشه اللى فرحان بالفلوس وتعليمات السيد الرئيس اللى احنا عايشين فى خيرها.
طواقم الأطباء والتمريض بقالهم فترة بيصرخوا من ضعف الامكانيات وعدم وجود ظروف مناسبة للتعامل مع مصيبة كورونا.. مش بس انهم مش عارفين يعالجوا الناس ولا يوقفوا انتشار الفيرس.. لا.. هما نفسهم كمان اصبحوا غير آمنين على حياتهم..
وادينا كل كام يوم بنسمع ان مستشفى اتقفلت بسبب العدوي او ان حد مات من مضاعفات الفيرس زى ما حصل مع دكتور وليد يحيى (32 سنة) في مستشفى المنيرة رغم انه مشى على الخطوات اللى الوزارة قالتها بالظبط بس محدش عبره لحد ما مات..
الموضوع انتشر على السوشيال ميديا واتقدم بعض الأطباء الشجعان باستقالتهم من المسخرة دى.. الوزارة استشعرت الخطر فقررت تجيب ورا وتبدأ تنفذ “بعض” مطالب الدكاترة.. اللى هى أساسا علشان حماية الناس.. مش علاوات زيادة ولا معاشات ولا نوادي مثلا زى الاسياد.
هل سمعت قبل كده عن مصطلحات العشوائية والتخبط؟؟
قابلوك الكلمتين دول قبل كده؟؟
اهو مواقف الحكومة دى واللى قبلها واللى قبلهم ومواقف القيادة السياسية للدولة المنكوبة مصر هى الوصف الدقيق جدا لكلمات العشوائية والتخبط.. مثال واضح على ان مفيش حاجه بتتعمل الا بعد الجملة الكئيبة “بناء على تعليمات السيد الرئيس”..
مش فارق بقى صح وللا غلط.. المهم اننا نبدأ بيها الكلام.. كل كلب فيهم قاعد على كرسيه مش علشان يشتغل ولا يحل مشاكل ولا اى حاجه الا “بناء على تعليمات السيد الرئيس”.. كل جردل قاعد وعينه على “تعليمات السيد الرئيس”..
مجرد اراجوزات او عرايس ماريونيت بتحركها “تعليمات السيد الرئيس”.. عك زى ما تحب ولما تنفضح على السوشيال ميديا ابقى اطلع قول الجملة السحرية اللى هتخلى الكل يخرس “بناء على تعليمات السيد الرئيس”.. ولا يخلو الأمر برضه من شوية تمثيل وناس بتستغيث بالسيد الرئيس على الهواء علشان يصرفوا علاج او معاش او اى طلب.. وطبعا السيد الرئيس لازم يتدخل بلمسته السحرية علشان فجأة كل شيء يتحل والناس تتبسط وترقص على انغام تسلم الأيادي.
العامل المشترك فى كل القذرة دى هو مجموعة من الدولجية اللى دايما تخرج تهاجم اى حد بيشتكى.. كتير منهم لجان اليكترونية شغالة لصالح النظام اكيد.. لكن فى فئة تانية منهم بتأدى المهمة بمنتهى الاقتناع والاخلاص..
فئة احط من مستوى الزبالة احتكرت الوطنية لنفسهم وعلى نفسهم.. منين ما حد يتكلم تلاقى ردود معلبة غبية ملخصها فى الاخر انك تموت او تتسرق من سكات.
طيب فى كل مرة الحكومة بتجيب ورا وتبدأ تصلح العك اللى هى عملته نتيجة العشوائية والتخبط.. الجماعة الدولجية دول بيبقى موقفهم ايه؟؟
هل بيخرسوا لوجه الله؟؟
هل بيقتنعوا ان المعارضة او الشكوى حق طبيعي من حقوق البشر؟؟
هل استوعبوا ان الشاكي مش خاين ولا عميل؟؟
هل ادركوا ان مفيش اى مخطط لاسقاط البلد اللهم الا تعريصهم وغباء حكومتهم ومن قبلهم جبروت السيد الرئيس وتعليماته؟؟
ابدا.. ولا الهوى..
لا حياة لمن تنادى..
ما زال عندهم السفالة والصفاقة انهم يطلعوا على الناس ويوزعوا اتهامات بالباطل ما بين تخوين وفتنه ومخططات وهمية واى كلام فارغ من عقولهم الضحلة اللى بتحاول بكل الطرق انها تكسر نفسك وتكتم صوتك وبس.
لكن كل ده مش مهم..
المهم اننا.. بناء على تعليمات السيد الرئيس.. بقينا كده.
وأشار بأصبعه الأوسط.
