لو إنت أب جديد أو أم جديدة .. الكلام ده هايفيدكم جدا .
أول ما ربنا بيرزقنا بمولود جديد .. بتبقى الامنية الاولى لأي حد فينا هي انه يسمع كلمة بابا وماما من طفله .. وتلاقي الأب ماسك الواد ابنه اللي عمره شهر .. ويقوله ( قووول بابا ياض يابن الكلب .. بقالك شهر بتاكل من خيري ومش راضي تنطق ) .. واما الواد ينطق ما بيقولش بابا .. لكن بيشتم زي أبوه !
امتى الاب والام يقلقوا بجد .. يقلقوا أول ما يلاحظوا فرق بينه وبين نفس اللي في عمره في الكلام .. يعني لما يلاقوا ابن الجيران صوته جايب اخر الشارع وابنه عامل سايلانت ولا بينطق .
او الواد هادي زيادة وقاعد دايما مبلم ومبحلق في السقف .
أو منعزل عن الكل وما بيحبش يختلط بحد وعايش في دنيا لوحده .. يعني مع نفسه جوه نفسه .
او مابيكررش ورا ابوه وامه ابسط انواع الكلام .. لحد ما السنة الاولى تخلص وما بيسمعوش منه كلمه تبل ريقهم .. لحد ما يبقوا عايزين يرموه من كتر ما هو مالوش لازمة .
ايه أسباب تأخر النطق عندالأطفال !؟
اب طحش بيتمقلت على كل لفظ الواد يحاول ينطقه .. وكل ما يقول حاجة يقوم الاب متقمص دور بوحه الصباحي ويقولوا ( يالله ياعم الحاج اتكل على الله احنا ناقصين لبخة في الكلام ).. يقوم الواد متعقد ويخاف يفتح بقه .
مشكلة تانية ان يكون الاب برنس ومتجوز ام يابانية .. يبقى الاب بيتكلم عبري والام بتتكلم لاوندي .. والواد ولا فاهم يتكلم زي مين فيهم .. وبيبقى عايز يولع فيهم الاتنين .. وحتى لو كبر بتلاقي نص كلامه من ده والنص التاني من دي .. يعني بيتحول مازنجر وهو بيتكلم .
سبب تاني يكون وراثة .. عنده جد سابع عشر اخرس او اهبل .. فتلاقي الواد مش عارف هو مابيتكلمش ليه .
او ان الواد يتولد بمشكلة في لسانه أو لسان مربوط .. ودي عايزه جراحة سريعة .. وياريت ابوه مايستخسرش فيه الفلوس .
أو انه يكون عنده مشكله في ودنه وسمعه ضعيف .. ولما صوت اللي بينده عليه يتنبح ما بيردش .
او خد له اصابة في دماغه من دكتوره او ممرضة تعبانه وهي بتولد امه .
أو انه يتولد اصلا حامل لمتلازمة ( ريت) .. ( اسبرجر) .. ( توحد كامل ) .. أو (داون) اللى هو تأخر عقلي .. ودول علاجهم عايز نفس طويييل جدا .. لان منهم له علاقة بالكروموسمات وجينات الجسم نفسه .
طرق علاج تأخر النطق عند الأطفال
لازم تبني ثقة مالهاش حدود للطفل من هو صغير انه يقدر يعمل اي حاجة .. والمقلته عليه مابتوصلش الا لنتيجة اسوأ منها مافي .. لأن حافز ( التحدي ) مش بييجي للطفل في سن صغير الا ما ندر .
لازم الكل يتكلم حوالين الطفل كتير جدا .. باللذات لو الاسرة مسافرة او بعيدة عن الاختلاط بالناس .. يعني الام تبقى زي معلقين كورة القدم .. اي حاجة بتعملها تنطقها قدامه ( شوف ياسكر انا بطبخ ازاي لأبوك .. شوف ياعسل انا بغسل إزاي هدوم اللي خلفوك .. وهكذا ) الطفل يتعلم الكلام .. لكن يطلع يكره أمه …
أما لو كل ده ما فلحش يبقى الواد ياخد ( جلسات تخاطب ) وده لو فاتت سنتين مانطقش خالص .. وأفضل كورس تخاطب موجود عالنت هو اللي عمله الدكتور / ماهر ابراهيم .. ببرنامج كبير ومتعدد .. هو قديم بس فوق الممتاز .. تقدروا تشوفوه من هنا تقعدوا الواد قدامه مايقمش غير وهو ناطق ان شاء الله .
حل بيئي بقى وهو انه يروح حضانة أو نادي فيه اطفال او يشوف ناس كتير معاهم اطفال ويلعب معاهم .. او الام تجيب له لعب من العاب النطق والذكاء .. وفيه كروت مشهورة في الموضوع ده اسمها ( المجموعة الضمنية ) موجودة عند اي اخصائي تخاطب وتقدروا تشتروها من ( شركة اللوتس للتخاطب ) بالجيزة .
أخيرا :
كل الكلام اللي انا كاتبه علمي وطبي .. ورغم انه مكتوب بالهجايص وبالعامية الفحيتة .. بس كله كلام بالمراجع والأدلة العلمية .
