النهاردة جالى والد تلميذة عندى ف الفصل وانا نازلة اقابلة متوقعة انها شكوى وتلاكيك فاضية واليوم كان مشحون،فنازله مستعده للهجوم التام أول مانزلت كان مدينى ضهره ،فبقوله احم … معاك ميس سالى يافندم اتفضل …
الراجل لف وشه ،راجل أربعينى مش كبير، بس ملامح الحزن والتعب على وشه تحسسك انه كهل فوق ال٨٠ سنة
قالى انا والد التلميذة ….
وجاى لحضرتك عشان اقولك على حاجة مهمة
انا طبعا حكمت بسرعة ورديت من غير ماأفهم وقولتلة طبعا حضرتك هتقول ان البنت خايفة ومش عايزه تيجى المدرسة وان احنا بنعذبها
الراجل بصلى باستغراب وقالى بنتى تقريبا مش بتتكلم
انا جاى أفهم حضرتك وضعها
البنت مامتها بعد ولادتها جالها جلطه
عملت معاها شلل ومش بتتحرك تقريبا
وارجوكى انا عارف ان البنت ضعيفة
وانا قعدت اختها من المدرسة عشان تراعينا
لانى بشتغل ومعندناش حد ووضعنا ف البيت فووووق الصعب
بس من فضلك يعنى..وسكت مقدرش يكمل عينه اتملت دموع وكبرياءه كراجل منعها من النزول
وانا الدموع خنقانى لدرجه انى مش عارفة اتنغس وهيبتى قدامه كمدرسة منعتنى بردوه انى افرج عنها
تمالكت نفسى وجمعت اعصابى
وقولتله تمام انا استوعبت الموضوع كله ومفيش داعى حضرتك تكمل
انا هفهم بقية زمايلى ومتخفش
قالى طيب انا هديها دروس
بصتله وقولتله لا
الراجل استغرب وقالى ليه
قولتله البنت مش ضعيفه
هنتبع معاها اسلوب جديد ونهتم بيها بزياده مراعاه لوضعها وهتجيب نتيجة هايلة من غير دروس
الراجل ملامحة اتغيرت تماما والسعادة ملت وشه
وقعد يدعيلنا دعوات ربنا يتقبلها
وانا طلعت للبنت الفصل ،بصيت لها بصة مختلفة عن كل يوم
لاحظت ان هدومها ملخبطة وشعرها مش متسرح وانها ساكته .. دايما ساكته
ندهتلها وخدتها فـ حضنى جامد .. كانت بتترعش وانا قلبى كمان اتنفض لخوفها
حاولت اسوى لها وضعها على قد مااقدر وقولت لها هاتى معاكى كل يوم مشط وفوطه وصابونه وانا هسرحلك شعرك .
انتم مش متخيلين اد ايه هى فرحت ونفسيتها اتغيرت وغيرت مكانها وقولت لها اتصحابى على زمايلك واضحكى والعبى وركزى وافهمى
الموقف دا خلانى احس انى مقصرة جداااااااااااااا
وزعلت من نفسى اوى
وبصيت لكل الفصل بنظرة تانية …
- احنا شغلتنا رسالة وواجب وأمانه
- أينعم هى بقت شغلانه زفت
- لكن طالما احنا شغالين فيها يبقى نكمل رسالتنا وألأجر والثواب دا عند ربنا
- يبارك لنا ف ولادنا وحياتنا
- سامحنى يارب لو مقصره
- واغفرلى وأهدينى الرشاد
المزيد حول أهمية التنشئة الاجماعية للطفل في موسو عة المعلومات ويكيبيديا
بناء شخصية الطالب – فيديو تربوي تعليمي
