طفلك اليوم .. رائد أعمال المستقبل

من كام أسبوع انتشرت صورة على الفيس بوك لولد صغير بيشتغل كاشير في سوبر ماركت معروف، والقصة ورا الصورة كانت إن أبو الولد كان حابب يعلم ابنه حاجة جديدة تخليه يعرف يعتمد على نفسه ويتحمل المسئولية ويعرف قيمة الفلوس، عشان كده أول ما الولد أخد أجازة الصيف، باباه اتفق معاه إنه ينزل يتدرب في السوبر ماركت…الصورة والفكرة اللي وراها نالت إعجاب وتشجيع آلاف الآباء والأمهات على الفيس بوك.

لكن اللافت للنظر في قصة الصورة إنها خلتنا ناخد بالنا من نقطة مهمة جدا، وهي إن أي أب وأم أكيد عايزين يشوفوا ولادهم أحسن حاجة في الدنيا، بس رغم كده عدد كبير منهم بيكتفي بالتعليم المدرسي، ومش بيحاول ينمي ويطور مهارات ولاده، ولا بيعلمهم من وهما صغيرين إزاي ممكن ينجحوا في حياتهم وازاي يخلقوا لنفسهم فرص جديدة بعيداً عن فكرة الوظيفة التقليدية، في حين أن ده بقى شئ مهم وضروري في ظل انتشار البطالة في المجتمع بشكل كبير.

وبما إن المدرسة عمرها ما هتعلم أولادك يعني إيه ريادة أعمال ويعني إيه قيادة ويعني إيه يكون عنده هدف ويخطط لتحقيقه، يبقى ده دورك ومسئوليتك إنت.

دي أفكار هتساعدك تنمي روح ومهارات ريادة الأعمال في أولادك من وهما صغيرين:

1- عرفهم قيمة الفلوس والادخار:

علم ابنك أو بنتك أهمية وقيمة الفلوس، وإنها مش بتيجي بالساهل عشان كده، وبالتالي مينفعش تروح بالساهل.

وعشان يفهموا الفكرة دي خليهم يكسبوا فلوس بنفسهم من خلال إنك تدور لهم على فرصة عمل مناسبة لسنهم، أو من خلال إنك تكلفهم ببعض الأعمال في البيت وتتفاوض معاهم على السعر وبعدين تديلهم الفلوس في مقابل الشغل.

لازم كمان تعلمهم معنى الادخار والاستثمار، من خلال إنك تعرفهم من صغرهم إنهم لو عايزين يشتروا لعبة مثلا محتاجين يحوشوا جزء من المبلغ وانت هتكملهم الباقي.

وممكن كمان تجيب لهم حصلتين واحدة يحوشوا فيها للادخار وواحدة تانية يحوشوا فيها للإنفاق، وأي فلوس الولد بيحصل عليها يتم تقسيمها بالنص بين الحصلتين.

وتشجعهم في النهاية على استثمار الفلوس اللي تم تحويشها في حصالة الادخار في أي مشروعات صغيرة.

2 – دربهم على تحديد الأهداف:

اسأل ابنك باستمرار عن أهدافه وأحلامه، خليه يكتب الأهداف اللي عايز يحققها كل سنة وكل شهر وكل أسبوع، زي إنه يتعلم عدد معين من الكلمات، أو يشوف كورس، أو يقرأ كتاب، أو يتعلم حاجة جديدة.
المهم إنك تشجعه باستمرارعلى تحقيق الأهداف دي وعدم تأجيلها، والطريقة دي هتخليه يفهم معنى تحقيق الأهداف ويحس بالإنجاز ومع كل هدف هيتحقق هيكون عنده حماس لتحقيق أهداف أكتر.

3 – علمهم فن البيع والتسويق:

علم أولادك يعني إيه بيع وشراء ببساطة، من خلال تشجيعهم إنهم يبيعوا أي حاجه هما مش محتاجين لها زي ألعابهم القديمة، وممكن كمان تشجعهم إنهم ينفذوا منتجات بسيطه بإيدهم زي رسومات أو اكسسورات أو مخبوزات أو عصائر وبعدين يحطوا لها السعر المناسب، ويروحوا بنفسهم يبيعوها للجيران والأصدقاء.

وعشان تنمي مهاراتهم التسويقية ممكن تخليهم يركزوا مع الإعلانات في التلفزيون واليوتيوب، واللوحات اللي على الطريق وتخليهم يلاحظوا إزاي بيستخدموا القصص والشعارات لإقناع العملاء، وشجعهم على ابتكار طريقة تسويق خاصة لمنتجاتهم.

4 – علمهم إن الفشل خطوة في طريق النجاح:

في المدرسة بنتعلم إن الفشل حاجه سيئة ومحبطة، عشان كده لازم نغير المفهوم ده عند ولادنا، ونعلمهم إن الفشل في أي مهمة مطلوبة منهم أو أي حاجه عايزين ينفذوها هو فرصة كبيرة للتعلم وتحقيق نجاح أكبر. وده هيتم من خلال إنك تتناقش معاهم بدل ما تعاقبهم، تتناقش معاهم في أسباب الفشل والدروس المستفادة منه، والطريقة دي هتخليهم دايماً يفكروا بطريقة إيجابية ويتأقلموا مع كل فشل بيحصل في حياتهم.

5 – شجعهم على التفكير والتواصل والقيادة:

لو ابنك عنده أي فكرة مهما كانت بسيطة، ادعمه وفكر معاه إزاي ممكن ينفذها ويخطط لها، وشجعه كمان إنه يعرضها قدام الناس، ولو معندوش أفكار شجعه دايماً إنه يقول قصص أو خطابات قدام جميع أفراد الأسرة عشان يكتسب مهارات العرض والتحدث قدام عدد كبير من الناس.

وفي نفس الوقت لو واجه أي مشكله سيبه يفكر إزاي يحلها بنفسه من غير ما تتدخل عشان تساعده ينمي طريقة تفكيره.

خلي الولد يركز إزاي الموظفين في المطاعم بتتعامل مع العملاء، علق على تصرفاتهم عرفه إن ده تصرف لطيف وده تصرف سئ، وبالتالي الولد هيتكون في دماغه فكرة عن الطريقة الصحيحة للتعامل مع العملاء، وإلى جانب كده حاول تنمي جواه روح القيادة والعمل الجماعي من خلال مشاركته في ألعاب جماعية أو الاشتراك مع أصحابه في تنفيذ مشاريع صغيرة.

في مقولة بتقول ” الطفل الذي اقتصر تعليمه على المدرسة هو طفل لم يتعلم “، ابنك في المدرسة بيتعلم عربي وحساب وانجليزي، لكن مش بيتعلم إزاي يكتشف نفسه، إزاي يكون واثق في نفسه، إزاى يفكر ويبدع، عشان كده أولادك محتاجين إنك تعلمهم حاجات كتير غير الدراسة، ومع شوية اهتمام منك بمهاراتهم وقدراتهم هيكونوا ناجحين في حياتهم ويمكن يكونوا هما رواد أعمال المستقبل