بدء مؤخرًا وفى وقت بتتوجه فيه الدول للتحول الرقمي زيادة انتشار وتشجيع استخدام البطاقات الإلكترونية بمختلف أنواعها سواء مسبقة الدفع أو ميزة أو الكارت debt المرتبط بحسابك، مرتبك، معاشك وكمان الترويج الكبير لكروت الائتمان credit card، ودي أخطرهم واللي نقدر نوصفها انها قاتل في جيبك لو معرفتش تستخدمها بالشكل الصح وتعرف امتى بالظبط تلجأ ليها.
قد يهمك: الذكاء الصناعي .,,, الاصطناعي أسئلة واجابات
ميزة و عيوب استخدام كروت الائتمان
استخدام الكروت الإلكترونية بيخلق حالة من التسهيل في إنجاز أمورك ومدفوعاتك وحصولك على الفلوس، ولكن بيخلق معاه كمان حالة من سوء التقدير ازاى تستخدمها وامتى، وبتلاقى نفسك خلصت فلوسك وقللت مدخراتك ومتراكم عليك الديون في حالة كنت من مستخدمى كروت الائتمان.
بالربط مابين علم النفس أو سلوك الفرد والاقتصاد، هنلاقى الاقتصاد السلوكي فسر سبب سوء استخدام الأفراد للكروت الإلكترونية والوقوع في فخ الإفلاس والديون بعدة ظواهر من أهمها
سبب سوء استخدام الأفراد للكروت الإلكترونية
- التحيز واللى اتوصف بأكتر من سلوك منهم مبالغة الأفراد في تقدير الظروف الحالية على حساب المستقبل وبالتالي التفكير في وجود تحديات مالية كبيرة في الوقت الحالي وده بيزود صرفك للفلوس بدون شيل هم المستقبل لأنك بتحاول تتخلص من التحديات الوقتية زى ما وضحت الأبحاث بما فيها دراسة من جامعة رود آيلاند اتنشرت في عام 2019 ، بتشير لمفهوم التحيز الحالي وتمثيله تحديات كبيرة لتوفير المال.
- كمان شكل تانى بتقوم عليه فكرة كروت الائتمان وهو الإلزام بالحد الأدنى من الفلوس اللى لازم استخدامها وبالتالي ده بيوجه عقلك وسلوكك لفكرة الإنفاق وبتبدء تستنزف الفلوس تدريجيًا،
- شكل تالت للتحيز هو التحيز للوضع اللى انت معتاد عليه بيخليك مش عاوز تاخد أي خطوات جديدة او مختلفة في حياتك او خططك وطريقة تعاملاتك المالية وبتشعر بعدم الراحة للتغيير.
- كمان إحساس الأفراد ناحية المستقبل وأننا بنميل لافتراض أنه هيكون أفضل من الحاضر، وصفت عالمة الأعصاب تالي شاروت السلوك ده بانحياز التفاؤل، وهو المبالغة في تقديرنا احتمالية الأحداث الإيجابية والتقليل من احتمالية الأحداث السلبية. وبالتالي ممكن يسبب في المماطلة في تحقيق الأهداف المالية.
- اقترحت دراسة عام 2014 أن الناس بيدخروا فلوس أقل لما بيحسوا ويفترضوا أن المستقبل متفائل، ولكن لما تم اخبارهم بأن المستقبل هيكون زى الحاضر زادت معدلات مدخراتهم.
- كمان في سلوك معروف باسم مواكبة الجيران ، وهو إننا في الأغلب بنميل واحنا بنأخد القرارات على حسب اللى شايفينه من سلوك اللى حوالينا وتقليدهم بنسبة كبيرة، وأنت بتشوف ناس كتير بتصرف فلوس على احتياجاتها بتقلدها وتصرف زيهم وحتى لو مش مناسب ليك أو مش من ضمن احتياجاتك أو أولوياتك السلع اللى بيجبوها.
ففى دراسة اتعملت سنة 2015 أن تأثير مواكبة الجيران ده بيخلى الناس يصرفوا أكتر على السلع الفاخرة، على سبيل المثال لما تشوف كل شخص في منطقتك بيسوق سيارة تسلا ، فمن السهل التفكير في أنك أنت كمان محتاج سيارة تسلا.
قد يهمك: مقابلة مع الذكاء الصناعي (Chat GPT) .. أسئلة عميقة واجابات صادمة
سلاح ذو حدين
في النهاية نقدر نعتبر البطاقات الإلكترونية سلاح ذو حدين، والخطر أكبر من الفايدة ولكن أولًا وأخيرًا ده مرتبط بسلوكك كفرد بالتخطيط المالى الصحى السليم والابتعاد عن السلوكيات الغلط والتحيز والتبعية لسلوكيات الغير، وتحديدًا اللجوء للقروض أو بطاقات الائتمان
فمتلجأش ليهم إلا في حالة دراستك كويس لوضعك المالى وتحكمك في سلوكك وتفكيرك ومعرفة امتى تلجأ لاستخدامهم وازاى.
