كيف يمكن أن يؤثر توقف مصروفات الدعاية أو التسويق على نجاح عملك؟ مقابلة مع خبير في مجال التسويق لفهم التحديات

أهمية تحديد ميزانية للإعلانات والتسويق

فيه أكتر من سؤال وحوار تم عن ميزانية الإعلانات والتسويق ووجدت إن فيه مفاهيم خاطئة كتير عن الإعلانات …

• أولا: ميزانية أو مصاريف الإعلانات دي زي الإيجار والكهرباء والمياه ورواتب الموظفين بتدفع كل شهر

سواء موسم أو لأ ..سواء الدنيا شغاله أو واقفه بل أحيانا لو الشركة فيها أزمه مصروفات أو تعثر بتقدم علي كل البنود لأنها لو وقفت الشغل بيقف والتعثر هايطول إنما مع وجود الإعلانات ممكن يبقي فيه مبيعات تقوم الشركة من التعثر.

• ثانيا: مفيش ربط بين ميزانية الإعلانات والشهره

يعني لو أنا منتجي مشهور يبقي بلاش أعمل إعلانات واللي بيربط الإتنين ببعض يتفرج علي بيبسي وكوكا كولا أظن مفيش أشهر منهم ومع ذلك علي طول بيعملوا إعلانات.

• ثالثا: تحليل المبيعات.

لو معاك فلوس تقدر تشتري برنامج (CRM) يبقي لا تتردد لو غير متوفر أحصل عليه بنظام الإيجار لو لم يتوفر أيضا يبقي إشتغل بشكل يدوي يعني ملف إكسل مثلا أو حتي بالورقه والقلم والتحليل ده يومي وأسبوعي وشهري وسنوي لازم تعرف إيه أفضل إعلان بيجيبلك مبيعات وإيه ارخص إعلان بيجيب مبيعات …يعني لو بتدفع في الفيس بوك ألف ج بيجيبلك 5 عملاء وجوجل ألف ج بيجيبلك 10 عملاء يبقي زود جوجل وده طبعا في حالة تساوي القوة الشرائية للعملاء إنما لو عميل الفيس بوك مثلا بيشتري ب 3 أضعاف عميل جوجل يبقي الفيس أفضل وهكذا .

• رابعا: أهداف الحمله مش بيع بس.

أحيانا علشان اسمك يكبر وده هايجيبلك عملاء علي المدي البعيد وأحيانا للحفاظ علي عملائك الحاليين علشان يحسوا إنهم بيشتغلوا مع حد جامد وكبير وعلشان طبعا محدش يكون بيصرف أكتر منك فياخدهم .

• خامسا:سهولة تمويل الحملة الإعلانية عن طريق السوشيال ميديا بأقل التكلفة.

من 15 سنه كده كنت علشان تعمل حملة إعلانية لازم يبقي معاك 200 ألف جنية مثلا تدفعهم مقدم لحمله مع وكاله وتقسط الباقي بشيكات علشان تنزل جرايد وتليفزيون وإعلانات طرق فكان الحملات الإعلانيه مقصورة علي الكبار …الحمد لله دلوقتي أصبح فيه جوجل وفيس بوك وتويتر وإنستجرام بتقدر عن طريقهم تعمل حمله حتي لو ب 200 ج في اليوم وكل العملاء بجميع أنواعهم متوفرين يعني عندنا في مصر 30 مليون حساب فيس بوك متوفرين تقدر تستهدفهم فلو سمحت لا تقصر في استخدام التكنولوجيا الحديثة وادفع في البند ده كويس سواء هاتستعين بمتخصص أو بشركه متخصصه أو حتي تتعلم بنفسك الموضوع مش بسيط ومش معقد

• سادسا: الحاله الوحيده اللي نوقف فيها الإعلانات هي إن يبقي عندنا شغل فوق طاقتنا

ووقتها ممكن نقلل الحمله لأقل مستوي أو حتي نوقفها لإعادة ترتيب أوراقنا وتجهيز شغلنا وأحيانا لرفع أسعارنا ونبدأ تاني .

في كل الأحوال لازم نعرف إن فيه دورة فلوس بتبدأ إنك تدفع فلوس إعلانات يجيلك عميل تبيع له يديلك فلوس تمول بيها العمليات من شراء بضاعه أو تصنيع أو تشغيل وخلافه ….إيقافك للإعلانات معناها إنك توقف الدورة أو تشتغل بالقصور الذاتي زي كده لو شيلت رجلك من علي البنزين العربية هاتفضل تمشي شوية وبعد كده هاتقف ….

ربنا يوفقكم ويكلل جهودكم وياريت لا ترفع قدمك من علي البنزين أبدا ….

قد يهمك: من الفشل الى النجاح: معلومات صادمة عن محمود المليجي