سمعت عن مصطلح الجوريلا ماركتنج قبل كده؟ تسويق الجوريلا هي طريقة مبتكرة بتستخدم عناصر تكلفتها قليلة عشان تعمل تأثير قوي على العملية التسويقية من خلال الاعتماد على طرق تسويق تفاعلية، ومن أمثلتها حملات دعاية كوكا كولا اللي بنشوفها لما ينزلوا الشارع ويتفاعلوا مع الناس،
تسويق الجوريلا اللي إبتكره شخص إسمه “جي كونراد ليفينسون” الراجل ده أول ما عمل كتابه بتاع تسويق الجوريلا، الكتاب عمل نقلة كبيرة قوي في علوم التسويق بسبب الإبتكارات اللي فيه، وإتباع منه أكثر من 20 مليون نسخة على مستوى العالم ونزل بأكثر من 62 لغة،
جي كونراد من الشخصيات العظيمة اللي غيرت ملامح التسويق في التاريخ بسبب اكتشافاته، ده غير أن ابتكاراته أفادت شركات عملاقة زي فيليب موريس، ومستر تايجر، وبرندات أمريكية تانية، بس النقطة اللي عايزين نشير ليها هي أن الراجل ده دراسته مكنتش تسويق أصلاً دي كانت علم نفس في جامعة كولورادو، وعلى الرغم من كده إلا أنه قدر يكون واحد من أعظم المسوقين في التاريخ.
المغزى من القصة دي إنها تبينلك إن مهما كان المجال اللي هتشتغل فيه مجال جديد عليك وبعيد عن مجال دراستك والقراية هتوصل لمرحلة الإحتراف، وفي مجال التسويق تحديداً المشاكل اللي بتواجه المبتدأين كتير جداً وبتكون سبب في أنهم يبعدوا عن المجال، على الرغم أنه حسب إحصائيات عالمية التسويق بيعتبر من أكثر المجالات اللي ليها مستقبل في البيزنس وده لأن الاكتشافات فيه ما بتخلصش والحاجة ليه بتزيد كل يوم أكثر عن اليوم اللي قبلة ، فخلينا نكلم النهارده عن أكثر 5 تحديات بتواجه المبتدئين في مجال التسويق ونشوف إزاي يتغلبوا عليها.
1. مصادر التعليم قليلة: من أهم المشاكل اللي بتواجه المبتدئين في مجال الماركتينج الأوفلاين هي أن مصادر التعليم المجانية قليلة على عكس مصادر التعليم في مجال ال online marketing المنتشرة بشكل كبير، وحل المشكلة دي بيكون في أنك تعتمد على مصادر تتعلم منها باللغة الإنجليزية أو أنك تاخد كورس في أي مكان ويفضل أنه يكون مكان ذو سمعة كويسه.
2. مهارة التعرف على العميل: من المشاكل اللي بتواجه المبتدأين في مجال التسويق هي أنهم لما بيفكروا في حملة تسويقية بيشوفوها من وجهة نظرهم وبيحكموا عليها من خلال رأيهم الشخصي ومبيفكروش في رأي العميل أو شخصيته أو حتى بيحاولوا يتعرفوا عليه ولعلاج المشكلة دي من الممكن أنك تستخدم خريطة التعارف ودي هتلاقيها موجودة في ملخص كتاب نموذج العمل التجاري الموجود على موقع الأكاديمية أو تقدر تنزلها من خلال أكثر من موقع على النت.
3. عدم الالتزام بالعلامة التجارية: من الأخطاء اللي بتهدد المبتدأين في مجال التسويق هي أنهم في بعض الأحيان ما بيلتزموش بقواعد العلامة التجارية اللي هما بيقدموها زي طريقة عرض اللوجو والأماكن اللي بيعرضوا فيها إعلاناتهم، والحل للمشكلة دي هي أن يبقى فيه دليل واضح للعلامة التجارية متوضح فيه كل تفاصيل البراند والدليل ده بيبقى إسمه BRAND STYLE GUIDE .
4. عدم القدرة على ترتيب الأولويات: لما تشتغل في مجال التسويق بيطلب منك أنك تبقى زي الأخطبوط يعني تقدر تعمل أكثر من 8 حاجات في نفس الوقت وطبعاً حاجة زي كدة بتكون صعبة لأي حد مبتدئ لأنها بتحتاج قدر عالي من التركيز وإدارة الوقت ودي علاجها بيكون من خلال أنك تحاول تركز أكثر وتعتمد على أدوات معينة لتنظيم الوقت زي:
– أداة https://trello.com/ وهو عبارة عن أداة مجانية ورائعة لتنظيم أعمالك بالكامل.
– أداة https://evernote.com/ وهو عبارة عن أداة لتنظيم الأفكار والملاحظات وتسجيل الملاحظات في أي مكان.
– أداة https://www.getharvest.com وهو عبارة عن أداه لمتابعة الوقت اللي بتقضيه في تأدية المهام والحصول على تقارير شاملة عن الوقت اللي قضيته.
5. نقل القيمة للعملاء: مهارة الماركيتير الشاطر بتتركز في أنه يكون صنايعي value يعني يقدر يضيف قيمة للمنتجات اللي هو بيسوّقلها من خلال تجهيز محتوى ناقل للقيمة بيستخدمه في كل القنوات التسويقية اللي من الممكن أنه يتعرضلها وللأسف بعض المبتدئين مبيكونش عندهم القدرة على توضيح القيمة الحقيقية للمنتج في حملاتهم التسويقية وحل المشكلة دي بييجي بعد دراسة قوية للمنتج والتعرف على كل الاستخدامات اللي العملاء بيستخدموا بيها المنتج.
