على قد ما ناس كتير بتحلم توصل لمنصب القيادة -سواء إنك تبقى رئيس شركة أو قسم أو مسئول عن فريق عمل- فالقيادة مش مجرد نجاح في شغلك أو سلطات زيادة بتاخدها، لأن مسئولية النجاح بكل الموجودين في فريقك قصة مش سهلة، والتحديات إلي بتواجه أي قائد مش قليلة، وفي بوست النهاردة هنتكلم عن أهم تحدي وهو:
الصراعات بين العاملين أو الموظفين في أي شركة أو مكتب، وإزاي إنت كقائد هتبقى مسئول عن حل الخلافات ديه.
مهم في البداية تبقى عارف إن فيه نوعين من القادة أو المديرين، نوع بيقتحم المشكلة ويحلها ويكمل، ونوع بيتهرب ويتجنب الدخول في أي صراع، ولو واجه أي مشكلة بيخبي راسه في الرمل، وغالبا مصير النوع التاني بيكون الفشل في قيادة فريقه بنجاح.
لو إنت من النوع الأول فلازم تبقى عارف إن القيادة والقدرة على حل الخلافات أمرين مرتبطين بعض جدا، يعني مثلا ماينفعش تكون مدير وتتوقع إن كل حاجة هتمشي كويس طول الوقت، فلو عايز تكون مدير ناجح لازم تمتلك مهارة “حل النزاعات”، وكمان تقدر تحولها لعنصر قوة تنمي بيه فريقك وتحسن أدائه.
وأهمية مهارة “حل الخلافات” بترجع أساسا لقدرتها على تجنب أي آثار سلبية ناتجة عن الصراعات من اهدار للوقت، وتقليل الإنتاجية، وانخفاض كفاءة العمل وجودة المنتج النهائي.
وتعتبر بداية اتقان مهارة حل النزاعات هي إنك تعرف أسباب النزاعات، وأهم سببين رئيسيين:
1- التواصل وتبادل الآراء:
لو كل موظف ماقدرش يحصل على المعلومات إلي يحتاجها، ومكنش فيه تواصل كويس بينه وبين مديره أو مع زملاؤه، فالوضع ده دايما بيؤدي لسوء التفاهم والخلافات في بيئة العمل.
لكن التواصل الواضح والموجز والدقيق وتوافر المعلومات، كل ده هيساعد على تقليل الصراعات وتخفيف حدتها.
2- سيطرة العاطفة:
خطأ شائع جدا في شركات كتير ونتيجته بتكون صراعات غير قابلة للسيطرة جوه بيئة العمل، وهو السماح للعواطف بالسيطرة والتحكم في عملية اتخاذ القرار، وطبيعي إن القرارات ديه تكون غلط ونتائجها تكون خلافات كتير بين فريق العمل.
ولحسن الحظ مهارة “حل الخلافات” في بيئة العمل مهارة ممكن نتعلمها بسهولة لو اتبعنا شوية آليات بسيطة:
1- حدد تعريف دقيق للسلوك المقبول في العمل:
ماتسيبش الموضوع للافتراض أو وجهة نظر كل موظف، لأنك كقائد للفريق مش هتقدر توصل لحاجة مفيدة، مجرد وجود تعريف للتصرف أو السلوك المقبول جوه الفريق أو الشركة هو خطوة إيجابية عشان تتجنب صرعات كتير.
ابدأ بتحديد إطار واضح لعملية اتخاذ القرار، وتحديد سلطات كل موظف، وتشجيع السلوك الإيجابي زي التعاون بين الموظفين، كمان مهم إنك تحدد التوصيف الوظيفي لكل فرد في الفريق، عشان ما يحصلش تداخل بين سلطات ومهام فريق العمل وده هينتج عنه خلافات كتير.
وخليك حريص على توفير آلية تواصل سلسة بين القيادة والموظفين، التواصل الواضح بيوصل المعلومة صح، وبالتالي بيجنبك سوء فهم وخلافات كتير جدا.
2-اقض على الخلاف قبل مايحصل:
على الرغم من إنك مش هتقدر دايما تتجنب الخلافات في الشركة اللي إنت فيها، إلا إن التجربة العملية أثبتت إن سر حل صراعات كتير هو منع حدوثها من البداية.
وده بيتم عن طريق إنك كقائد تسعى بنفسك للنقط والأسباب اللي ممكن تعمل خلافات، وتاخد إجراءات استباقية بشكل حاسم، وتقضي على السبب قبل ما يعمل خلاف بين أفراد الفريق.
3- ساعد فريقك وزملائك على تحقيق أهدافهم:
من أكثر الطرق فعالية لتجنب الصراع والخلاف إنك تساعد إلي حواليك في تحقيق أهدافهم، الطريقة ديه هتخلي كل فرد مشغول بهدفه وبنجاحه وهتقلل جدا من معدل الخلافات جوه الشغل.
4- عامل الأهمية:
اختار المعارك الخاصة بيك، وتجنب الصراع اللي ممكن تدخله عشان الصراع وبس، لكن إذا كان الموقف بشكل كبير هيسبب تضارب بين آراء الموظفين وهيعمل خلاف، يبقى هنا لازم تتدخل.
5- اعتبر الصراع “فرصة” للتعلم:
جوه كل صراع فرصة هايلة للتعلم، فلو كنت مثلا مدير تنفيذي بيتجاهل الفرص ديه، خليك عارف إنك بتفوت كتير قوي على نفسك وعلى فريق عملك، إنت تقدر تخلق من أي صراع فرصة عشان الموظفين يتعلموا يتقبلوا الاختلاف، أو يدمجوا وجهات النظر ويخرجوا بأفضل حل ممكن، أو يتعلموا تبني مبدأ العمل الجماعي.
في النهاية.. مفيش فريق عمل أو شركة مفيهاش مشاكل وخلافات، بس الفكرة في طريقة علاج المشاكل ديه، عشان تفضل كقائد محافظ على تقدم ومعدل إنتاجية فريقك.
