في مباراة الكونغو التي أهلت منتخب مصر لنهائيات كأس العالم 2018 لفت نظرنا مشهد لمحمد صلاح لما دخل في مصر هدف للكونغو في الدقيقة 87 وهو من شدة حزنه وقع على أرض الملعب وتأثر بس رجعنا شفناه تاني في الدقيقة 89 وهو منفعل وبيحمس زمايله والجمهور، الموقف ده كان جدير اننا نقف ونشوف ايه الدروس اللي ممكن نتعلمها من الموقف في مجال البيزنس.
7 حاجات تتعلمهم من صلاح في البيزنس بتاعك.
1- البداية البسيطة : زي ما محمد صلاح بدأ في ظروف صعبة في نادي بسيون وقدر يوصل للعالمية في ليفربول وروما وتشيلسي في وقت مش كبير غير أنه بسبب ظروفه المادية الضعيفة وقتها اضطر أنه يدرس في معهد اللاسلكي فانت كمان ممكن لشركتك أو البيزنس بتاعك يحقق النجاح بغض النظر عن بدايته والمكان اللي بدأ منه فمعظم المشاريع العملاقة في العالم بدأت صغيرة زي أبل وجوجل اللي بدأوا من الصفر بس المهم أنك تأخذ بأسباب النجاح.
2- السرعة مطلوبة : بيميز صلاح السرعة العالية عشان كده متصنف من ضمن أسرع 10 لاعبين في العالم فبردوا في الشركات السرعة بتكون مطلوبة في اتخاذ القرارات وتنفيذها لأن في بعض الأحيان بيكون الروتين والبطء في اتخاذ القرارات مسبب لكوارث زي مثلاً استجابة ياهو البطيئة لتطورات السوق.
3- التركيز : بيعجبني في صلاح أسلوبه السهل الممتنع يعني هو عارف نقط القوة عنده وبيستغلها بشكل رائع وبسيط يعني بالبلدي كده مابيتفزلكش في الملعب وأنت كمان في البيزنس بتاعك حاول متقدمش أكثر من منتج ممكن أي واحد فيهم يسبب أثار سلبية على جودة باقي المنتجات لأن في البيزنس كمان الفزلكة وحشه.
4- التطوير المستمر : صحيح صلاح ربنا رزقة بموهبة جبارة بس ده ميمنعش أن تطويره المستمر لمستواه كان هو السبب في أنه قدر يوصل من نادي بسيون لنادي ليفربول فلو جينا عكسنا ده على الشركات هنلاقي ديماً أن أفضل وسيلة لزيادة أرباح الشركة هي الاستثمار في الأبحاث والتطوير سواء للخدمة أو المنتج زي مصنع بيدو اللي كان من أسرار نجاحه هو قسم الأبحاث والتطوير.
5- الالتزام : لاعيبه كتير احترفت بره مصر وكان بينزل ليها صور في بارات وبتنتشر أخبارهم في الجرائد بعدم التزامهم ومستقبلها الاحترافي مكنش بيطول بسبب عدم التزامهم على عكس صلاح الي فعلاً ينطبق علية صفة الانضباط والالتزام فمحمد صلاح أتجوز وهو في سن صغير عشان يتجنب الفتن في أوروبا وكلام الأعلام عنه ولو جينا قيسنا ده في الشركات هنلاقي بردوا أن من عوامل نجاح الشركات هي وجود مناخ إبداعي يحكمه الانضباط.
6- الطموح مطلوب : صلاح على الرغم من سنة الصغير إلا أنه حصد ألقاب كثيرة سواء شخصية أو مع الفرق اللي لعب معاها زي لقب أغلى لعيب كرة عربي غير معدلاته التهديفية العالية اللي حققها في الدوريات الثلاثة اللي لعب فيها ونفس الشيء لأي صاحب بيزنس لازم يكون حاسة اصطياد الفرص عنده عالية ويبقى من الصعب أنه يشبع من النجاح.
7- لا تستسلم : أحد رؤساء الأندية المصرية قال، قبل ما يحترف محمد صلاح، إن مستواه لا يصلح للعب في النادي لكن على الرغم من كده حقق لنفسه تاريخ عظيم في الاحتراف وتكررت التحديات أكثر مرة زي عدم مشاركته المستمرة في تشيلسي لكنة أثبت نفسه من تاني في إيطاليا فنصيحة لأي رائد أعمال مهما كانت التحديات اللي بتقابلك في البيزنس بتاعك أعتبرها اختبارات جدارة ليك هل تستحق أنك تحقق نجاح ولا لأ.
عوامل النجاح كثير وتختلف حسب المجالات بس العامل المشترك الوحيد ما بين كل المجالات هو الاصرار مهماً كانت التحديات والمشاكل اللي بتقابلك لازم يكون عندك أصرار يخليك تقوم منها أقوى وأحسن وفي النهاية بنتوجه بتهنئة لكل الشعب المصري بمناسبة التأهل للمونديال ومبروك لينا كلنا ونتمنى نجاحات في كل المجالات بس متتأخرش 28 عام.
وربنا يوفق الجميع
