ورا كل قصة نجاح لشركة كبيرة أنت بتشوفها كان في عدد من الأخطاء والمشاكل اللي واجهتها، بس على الرغم من كده الشركات دي وقفت على رجليها وقدرت تأسس كيانات ناجحة، بس مش معنى كده أن الأخطاء لازم تحصل عشان تبقى ناجح.
كل اللي عليك تعمله عشان تتجنب الأخطاء والخسارة أن لو حصلت الغلطة يبقى تتعامل معاها على أنها تجربة وخبرة مش تعاملها على أنها كارثة هتدمر المؤسسة، فتعالى نشوف أكثر الأخطاء شيوعاً اللي بيقع فيها أصحاب الشركات الناشئة:
1. اختيار الشريك:
اختيارك لشريكك في البيزنس بتاعك زي اختيارك للزوجة ففي الحالتين لو الاختيار غلط يبقى هتلبس لبسة وحشه، فلما تختار شريكك لو هو صديق أو من العيلة لازم تتفقوا على أن البيزنس والصداقة عاملين زي الزيت والميه مينفعش يمتزجوا وديماً خلى معيارك في الاختيار بجانب المعيار المالي معيار الخبرة وهيقدم أيه والأفضل كمان أن نقطة قوته تكون مش موجودة عندك عشان تكملوا بعض.
2. التوفير القاتل:
من الأخطاء اللي بيقع فيها مؤسسيين الشركات أنهم بيوفروا في بنود مفيش مجال للتوفير فيها، وده بيكون خطأ كبير لأن مفيش أسوأ من أنك تشغل محاسب يمسكلك حسابات الشركة كلها وتكون أخترته عشان مطلبش مرتب كبير أو أنك تبقى فاتح مشروع قايم على خدمات أونلاين وتشتري أجهزة مواصفاتها ضعيفة لأنها تكلفتها قليلة.
3. التبذير الأوفر:
بصوت دنيا سمير غانم في فيلم طير أنت ، التبذير في المشروع في بدايته ممكن يكون هو مسمار التابوت اللي هتدفن فيه المشروع بتاعك لأن مش من المنطقي أنك في بداية المشروع تروح تأجر مكتب في منطقة غالية جدا وتجيب فرش بمبلغ ضخم بغرض التفاخر، أعمل زي ما قولنا في الغلطة اللي فوق واشتري معدات تفيدك أحسن.
4. الاسترخاص في التسويق:
التسويق مهم لأنه من غيره محدش هيعرفك ومحدش هيشتري المنتج بتاعك بس في نفس الوقت لازم يكون الاستثمار معمول بشكل سليم، فمش معنى كده أنك أول ما تبدأ بيزنس تروح تحجز يافطه على كوبري أكتوبر أو أنك تعمل دعاية بالملايين ركز استثمارك في المحتوى عشان يوصل للناس الصح وينقلهمم قيمة المنتج وخلي يافطة أكتوبر لما المشروع يكبر.
5. خليك على الأرض:
مترفعش سقف طموحك لفوق السما أو تنزلة تحت الأرض خليك منطقي في توقعاتك بالنسبة للمنتج أو الخدمة اللي أنت بتقدمهم عشان تتجنب الإحساس بالفشل لما متحققتش اللي أنت عايزه في بداية المشروع لأن زي ما قولنا قبل كده مفهوم ال STARTUP هو أنها شركة بتدور على الطريقة المثالية اللي تحقق منها أعلى أرباح وعشان كده لازم في بداية المشروع تفهم أنك في رحلة بحث عن الذات للشركة.
6. التعيينات الضعيفة:
جملة أنك تفك الموظف ب 3 دي مستفزة جداً، وللأسف في ناس بتعمل كده عشان تحس أن الشركة كبيرة وكده، فبتعين 20 واحد خدمة عملاء خبرتهم صفر عشان مرتباتهم ضعيفة فبالتالي ده بيسببلهم مشاكل في حين أنهم لو كانوا عينوا 4 موظفين عندهم خبرة ومرتبهم معقول وجابوا أثنين يدربوا منهم بدون خبرة ده كان هيبقى أفيدلهم بكثير.
7. غياب الأهداف:
من الأخطاء المتكررة اللي بتواجه الشركات الناشئة هي غياب الأهداف يعني تبقى فاتح شركة وعامل زي الحج حسني في فيلم الكيت كات ، لأ لازم تحط لنفسك أهداف معينة توصلها كل فترة يعني تحدد هدف عايز توصله في كل ربع سنوي وهدف تاني سنوي وكمان أهداف على المدى البعيد وتحط لنفسك خريطة تمشي عليها عشان توصل للأهداف دي وزي مقولنا في الجزئية بتاعت “خليك على الأرض” لازم تكون الأهداف دي واقعية ومنطقية.
8. أعمل نموذج عمل:
لازم تعمل لنفسك نموذج عمل تتحرك من خلاله لأنه هو اللي هيوضحلك الطريقة اللي الشركة هتمشي بيها وخلي عندك قناعة أن طول مانت في مرحلة ال startup النموذج بتاعك لازم يكون مرن وقابل للتغير.
في النهاية أحنا عايزين ننشر ثقافة ” أنا غيري غلط عشان يعلمني” فياريت نركز مع أخطاء الشركات اللي بتحصل حولينا ونسجل ملاحظات عشان منقعش في نفس الغلطات اللي هما وقعوا فيها.
