بما إن المستقبل بلا جدال بيروح تجاه الذكاء الإصطناعي وكل حاجة بتتحول قدامك لشيء ذكي من أول التكييف اللي بيغير درجة الحرارة بعد مايشوفك حرارتك وحرارة الجو ويزبطهالك لحد العربيات اللي ممكن تركبها وتوصلك بدون تدخل منك لأنظمة الطيران الآلي ولسه المستقبل فيه أكتر من كده بكتير .
عشان نعرف يعني إيه ذكاء اصطناعي لازم الأول نعرف يعني إيه ذكاء في الأساس. وإيه الفرق بين الذكاء البشري والذكاء الاصطناعي من حيث الإصطلاح
الذكاء البشري في أفضل التعريفات ليه هو القدرة العقلية اللي بتتكون من القدرة على التعلم من الخبرات والتكيف مع المواقف الجديدة والفهم والتعامل مع المفاهيم المجردة واستخدام المعرفة لتغيير البيئة.
زي الطفل مثلا اللي بيتعلم أن الأشياء الساخنة بتلسعه فبيتعلم يتجنبها وهو طفل ولما بيكبر بيعرف أنه ممكن يمسكها ويتعامل مع السخونة عن طريق العوازل مثلا فيجمع بين التجربة القديمة واللي اتعلمه في أنه يغير من الوضع الحالي اللي قدامه وينقل ده لأفراد تانية لو حب
نقدر من هنا نستشف الغرض من الذكاء الاصطناعي من ضوء تعريف الذكاء البشري ونقدر نقول أن الذكاء الاصطناعي بيهدف لجعل الآلة ذكية يعني إمدادها بالقدرة على التعلم والاستنتاج واستيعاب البيئة واتخاذ القرارات اللي بتخليها تأدي دورها المطلوب منها بشكل مثالي.
أكتر مثال يفهمك الموضوع هو الأنظمة المدمجة في الطيران الآلي أو النظام الخاص بالسيارات ذاتية القيادة اللي بتقدر تشوف حواليها إيه وتشوف الإشارات والناس اللي بتعدي الطرق ومؤهلة للوصول للمعلومات الخاصة بحركة المرور فتختار أقرب الطرق وأكثرها أمانا بالنسبالك.
طيب إيه الوضع الحالي بالنسبة للروبوتات أو أنظمة الذكاء الاصطناعي ككل؟
الأنظمة الحالية قادرة على معالجة معطيات كبيرة وضخمة جدا والقيام بعمليات معقدة بسرعة خيالية وينقصها شيء واحد وهو الإدراك. وده هنعرفه بعدين بس خلينا نشوف شيء واقعي.
المثال الأول هو Deep Blue اللي لاعب جاري كسبروف بصفته ممثل للذكاء البشري في لعبة الشطرنج وهزمه.
الذكاء الاصطناعي ده عنده القدرة على التنبؤ بالحركات الممكنة ليه ولخصمه بناءا على المعطيات اللي قدامه يعني مثلا هو مبيحطش خطة معينة في البداية ويتحرك على أساسها هو فقط بيشوف أفضل لعبة ممكنة بناءا على الوضع الموجود وبيتحرك على الأساس ده وده بيرجع شوية لسهولة معرفة احتمالات الشطرنج بالنسبة للآلة واللي بيوصل عدد احتمالاتها لـ (10 أس 123) وده عدد ضخم جدا .
بس إزاي بيكسب الكمبيوتر في الشطرنج وإزاي بيلعبه أصلا؟
الأول لازم تعرف تعقيد الشطرنج
الشطرنج المكون من 16 قطعة بيسمحلك بـ 20 حركة ممكنة ليك في البداية و 20 رد للاعب الثاني بس هنا الحساب هيختلف شوية لأنك دلوقتي كلاعب هتحسب مش بس حركات الـ 20 الممكنة لا كمان رد الأبيض بعدك بـ 20 حركة ممكنة زيهم يعني 20*20= 400 احتمال.
وهنا هنروح لحاجة غريبة شوية وهي المستوى والاحتمالات الممكنة فخلينا نقول التالي
- المستوى الأول احتمالاته 20
- المستوى التاني احتمالاته 20 ورد الابيض 20 يعني عدد الاحتمالات الممكنة 400
- المستوى التالت بتوصل الاحتمالات فيه لـ (8902) احتمال
- المستوى السابع هتوصل فيه الاحتمالات لـ (3 مليار احتمال و19 مليون وشوية.. ) وده استحالة شخص يقدر يحسبه.
طيب ليه الكمبيوتر بيقدر يحسبه؟
الاجابة لأنه مزود بمعالجات قوية تقدر تحسب ملايين الاحتمالات في ثواني معدودة.
طيب عدد احتمالات الشطرنج كاملة ممكن توصل لـ (10 أس 120 “رقم شانون”) والرقم ده أكبر من العدد المقدر للذرات في الكون المعروف لينا دلوقتي.
الكمبيوتر اللي بيلعب الشطرنج مش مطلوب منه يحسب كل العمليات الممكنة في وقتها هو ممكن يحسب 7 مستويات ورا بعض من كل حركة بتتلعب ولذلك هو بيكسب أذكى لاعب شطرنج في العالم في أي منافسة حصلت أو هتحصل في المستقبل والأمر أصبح منتهي تماما.
طبعا ده مش أقوى حاجة.. فيه دلوقتي Alpha Go الذكاء اللي قدر يكسب أذكى لاعب في التاريخ في لعبة GO الصينية واكتر لاعب خبير مسجل.. اللعبة دي بتوصل متوسط عدد الحركات الممكنة في كل خطوة لـ 150 احتمال وهي أكثر تعقيدا من الشطرنج بمراحل.
المزيد عن الذكاء الصناعي من موسوعة المعلومات ويكيبيديا
الذكاء الصناعي.. مشكلة جديدة أم تسهيل لحياة الإنسان
