محمد بيواجه موقف صعب عنده كافيه بيقدم فيه قهوة وهو دلوقتي متلخبط قدام قرار ممكن يسبب قفل البيزنس بتاعه اللي بقاله ١٥ سنة.
المشاكل التي يواجهها اصحاب اي بيزنس حاليا
في مشكلتين
- الاول في ركود في السوق الناس خايفه تصرف و المبيعات نازله ب ٣٠٪.
- سعر صنف القهوة اللي كان بيقدمه اتضاعف عشان سعر الصرف.
دلوقتي هو قدامه قرار من تلاته
- يستني ما يعليش السعر بس هيخسر و اخره ٦ شهور بالوضع ده وهيقفل
- يعلي السعر بس ممكن الزباين يسيبوه وبردك يقفل
- يغير نوع القهوة لبراند محلي سعره زاد بردك لكن اقل من المستورد، المشكلة ان جودته اقل وده ممكن يخسره زباين كتير وبردك يقفل.
محمد اختار الحل التاني يعلي السعر وتحسبا لان الطلب حيقل اكتر ضغط النفقات و مشي ٢ من الستة اللي شغالين معاه وقلل الصرف علي الدعاية.
بس محمد بتواجهه مشكلة يرفع الاسعار كل شوية و ده هيبقي مدمر لشغله؟
ولا يرفعه مرة واحدة بشكل كبير ويبقي اعلي من السوق ؟
ولا يستني السوق لما يرفع ويرفع معاه؟
ده اللي اصحاب البيزنس بيواجهوه كل يوم ومافيش حاجة اجمالا صح.
قد يهمك: التسويق بالكلام .. Word Of Mouth .. لو مجربتش .. هتندم !
بعض الحلول لمواجهة مشاكل البيزنس والتصدي لها
بس ده وجهه نظري
١. فكرة البقاء في السوق بخسارة فكره غالبا هتدخلك في حرب اسعار حتدمر البيزنس بتاعك فماتعملهاش وعينيك دايما تكون علي نقطة التعادل بين السعر وعدد العملا و المصاريف المباشرة والغير مباشرة
٢.ما تخافش العميل عارف ان الاسعار علت، مش بقول انه حيبقي مبسوط لكن في نفس الوقت ده شيء متوقع وماحدش هيتفاجيء.
٣.ارفع الاسعار بشكل واضح معلن من غير العاب
٤.قلل التكلفة تديجيا بطريقة ما تاذيش البزنس بتاعك
الافضل محمد ما يمشيش غير فرد واحد والافضل يجرب نوع قهوة محلي في صنف واحد من اصنافه و يشوف رد فعل السوق.
٥.التواصل مع العملا بشكل جميل وشرح اللي بيحصل باسلوب كويس هيخليهم اكتر تقبل للخطوات ده.
٦.حاجة مهمة و بتضايق التخلص من العمالة الزايدة للبيزنس، زي التخلص من الوزن الزايد للاشخاص
حاجة مهمة لابد منها.
٧. الافضل تغيير الاسعار مرة واحدة بس في السنة.
ولان ده مستحيل في الوقت الحالي فممكن نخليها مرتين في السنة وكل ما كان اقل كان افضل.
ده افكاري لان سعر الصرف حيتذبذب كتير وحيعمل مشاكل مزعجة لكل الناس الفترة الجاية
و ربنا يكون في عون الجميع البايع والمشتري والموظف وصاحب البيزنس.
قد يهمك: مش مهم دراستك إيه .. لو عاوز تتعلم تسويق يبقى الكلام ليك
