يوم الجمعة 24 فبراير، قررت محكمة في فرنسا سجن المطرب المغربي سعد لمجرد 6 سنين بعد إدانته في قضية اغتصاب وضرب شابة، ودي كانت واحدة من جرائم اغتصاب وعنف ضد الستات في أكتر من بلد اشتهر بيهم المتهم.
الحكم بحبس سعد لمجرد 6 أعوام بتهمة الاغتصاب في فرنسا.. العدالة لكل ضحايا العنف الجنسي
– جلسة المحكمة استمرت 7 ساعات، اقتنع خلالها القضاة بإنه حصل الاغتصاب بالشكل اللي وصفته الضحية بدقة واللي قالت إنه قابلها على هامش حفلة له في باريس مع شابة تانية صغيرة في السن، وأخدها معاه مقر إقامته في فندق بشارع الشانزليزيه وهناك اغتصابها وضربها وكانت روايتها متطابقة مع رواية لمجرد لكن مع اختلاف الجزء الثاني.
– المحكمة طلعت أمر بالحبس وده معناه إنه العقوبة هتتنفذ فورًا، ودا بعد ما النيابة طالبت بسجنه 7 سنين ومنعه من دخول فرنسا لمدة 5 سنين.
جرائم عنف واغتصاب
– دي مش أول جريمة عنف واغتصاب ضد بنت، لمجرد اللي بيعتبر ضيف ضمن عدد كبير من الفنانين العرب في مصر، ودا حققله شهرة واسعة في العالم العربي، سبق واتهم في قضايا اغتصاب وعنف ضد ضحايا مختلفين في الولايات المتحدة وفرنسا والمغرب.
– القضية الأولى كانت في نيويورك سنة 2010 واتقبض على المطرب المغربي لاشتباهه في ضربة سيدة واغتصابها، وخرج بكفالة وهرب ومرجعش هناك تاني من وقتها، بعدها في 2016 كانت القضية اللي اتحكم فيها مؤخرًا بسجنه، وفي نفس السنة بنت فرنسية اتهمته باغتصابها في الدار البيضاء بالمغرب سنة 2015، وفي 2018 اتسجن سعد لمجرد بعد ما اتهم باغتصاب شابة رابعة في سان تروبيه الفرنسية.
– في ديسمبر اللي فات وخلال احتفالات أعياد رأس السنة كان مقرر استضافة سعد لمجرد في مدينة شرم الشيخ، وكان فيه موجة شعبية لرفض وجود متهم بالاغتصاب والعنف ضد الستات وقتها، وكتبنا عن دا وأشدنا بالحملة ضد لمجرد ورفضنا وجوده في مصر.
– وبالتالي دلوقت مش بس فنان متهم بعدة قضايا عنف واغتصاب، دا مدان بحكم محكمة، يعني سبب أكبر إنه القائمين على الفن وإقامة الحفلات، يوقفوا فتح الباب دا من الأصل تاني.
– بديهي احترامًا لحق الضحايا ولسمعة البلد ولاعتبارات كتير إنسانية واجتماعية، يتم منع إقامة حفلات لسعد لمجرد أو إنه يشتغل في مصر.
دور المسؤولين
– نقابة المهن الموسيقية هنا عليها دور حقيقي في إصدار القرارات اللازمة لإيقاف حفلات لمجرد في مصر، ودا المفروض إنه قرار بديهي جدًا بعد الحكم القضائي.
– مش معقول إن النماذج دي يتعملها حفلات عندنا ويتعمل منهم أبطال كأن التعدي على الستات واغتصابهم شيء عادي وملوش عواقب، في ظل ما الستات في مصر بيكافحوا ضد العنف بكل أشكاله.
– كذلك مطلوب من الفنانين المصريين يتوقفوا عن استضافته أو التعامل معاه، أو على أقل تقدير محدش يتورط في غسيل سمعة مدان بحكم محكمة، لأن كده بتسيئوا للفن وللقيم الإنسانية.
– بالتأكيد إحنا مش بنشخصن الموضوع ضد مطرب بعينه وإن كان يستحق، ولكن الطبيعي إنه الهدف الأكبر هو محاربة ظاهرة مجتمعية سيئة زي جرائم التحرش والاغتصاب والعنف ضد الستات، وبالتالي الرأي العام المصري الواعي و الرافض لوجود “لمجرد” أكتر من مرة لازم يكون هو هو نفس موقف الفنانين والمشهورين والموقف الرسمي وإعلان دا دعمًا للمبدأ.
– للأسف بعد الحكم لقينا بعض التعليقات الغريبة اللي بتبرر للمجرم جريمته، وناس تقول كان مخمور وناس تقول متعاطفين، والحقيقة مش عارفين هل هيكون دي نفس تعليقاتهم لو الضحية -لا قدر الله- حد يعرفوه بشكل شخصي؟!
– التعليقات من النوع دا واللي بتزعم إنها “متعاطفة” مع لمجرد على سجنه، بتنسى إنه فيه ضحية اتعرضت للاغتصاب والضرب والاعتداء، وهي اللي تستحق التعاطف دا، بل إنها مش ضحية واحدة دول ضحايا، وتواتر الشهادات دي والقضايا مبيقولش أي شيء نهائي؟
– بنتمنى تكون القضية دي درس للهيئات القضائية في دول كتير من بينها مصر، ويكون عندنا تطوير للتعامل القانوني مع جرائم التحرش والاغتصاب بالذات لو كان عدى عليها فترة طويلة، خاصة وإنه عادة الضحايا مش بيقدروا يواجهوا المجرمين بعد الواقعة مباشرة وبياخدوا وقت على ما يقدرو يتحركوا لحقهم.
– مجدداً بنحيي كل المبادرات والناشطات اللي وقفوا ضد استضافة “لمجرد” في مصر، دورهم كان مهم للتوعية بالأمر وبالقصة كلها، وصمدوا رغم وجود حملات منظمة لغسيل سمعة الفنان المدان بحكم محكمة.
– أخيرًا بنتمنى كل مذنب ياخد جزائه وكل ضحية يرجعلها حقها بالقضاء، كذلك نتمنى بلدنا تكون خالية من كل أشكال العنف ضد المرأة، وتكون فيها حقوق الستات وحماية المجتمع أولوية مقدمة في كل مجال.
