إشكالية أصل الإنسان
أغلب الناس من أهالينا في بلادنا العظيمة ،وحتي في كتير من بلاد العالم بما فيهم أمريكا بتظهر أكبر مشاكلهم مع علم بيولوجيا التطور لما يكون الكلام عن أصل الإنسان. أنا أقدر أقول ان ٩٠% من المشكلة سببها عدم فهم للموضوع أصلا !!
حسب الدراسات اللي اتعملت علي مدار ٧٠ سنة أصل الإنسان العاقل Homosapien هو إنسان في قمة المهارة اسمه Homo heidelbergensis. كان نوع مختلف شوية عن نوعنا ، خرجوا من إفريقيا قبل ٨٠٠ الف سنة، وكانوا مهرة في استخدام الأدوات الحجرية. بمرور الوقت وأسباب كتير مختلفة خرج منهم قبل ٦٠٠ الف سنة مجموعتين مختلفتين بينهم قرابة شديدة جدا.
النوع الأول اسمه Homo Neanderthals وده نوع برضه من البشر عاش في اوروبا، وغرب اسيا والشرق الأوسط. والنوع التاني هو احنا Homosapien.
قد يهمك: معلومات قيمة وهل تعلم
طيب سؤال ثاني : يعني كده أجدادنا القدماء اللي عاشوا قبل ٥٠٠ الف سنة علي الأرض أصلهم بشر برضه بس من نوع مختلف ؟!
نعم ده مؤكد…. طيب النوع البشري اللي خرج نوعنا منه ده اللي هو Homo Heidelbergensis كانت أصوله ايه ؟
كانت أصوله نوع مختلف برضه من البشر اسمهم Homo erectus، كانوا بشر بصفات اكثر بدائية، مهرة في المشي علي قدمين والجري الخفيف، كانوا اول نوع بشري يخرج من افريقيا ويعيش في اسيا واوروبا، واستمر نسلهم في الارض حوالي ١.٩ مليون سنة، وبالمدة دي هو اكتر نوع بشري نجح في تحدي ظروف الطبيعة ومنقرضش غير من ٦٠ الف سنة فقط.
طيب وأصل النوع الأخير ده Homo erectus يبقي ايه ؟
أصله كان عبارة عن كائن بنعتبره من أشباه البشر اسمه Australopithecus garhi، مختلف شوية عن كل أجدادنا اللي فاتوا من حيث القدرة علي المشي علي قدمين لمدة طويلة (مكنش بيمشي طول الوقت علي قدمين)، وكان حجم مخه صغير (حوالي ثلث حجم مخنا، ونص حجم مخ أسلافنا اللي ذكرناهم) ، وكانت فيه صفاته التشريحية صفات قريبة للقردة العليا (زي الشمبانزي) من حيث حجم المخ، وطريقة المشي، وشكل صوابع القدمين. طيب ايه اللي يمنع انه نقول عليه شمبانزي ؟!
اللي يمنع ان زي ما عنده صفات شبيهة بالشمبانزي، عنده صفات تشريحية تبعده تماما عنه. علي سبيل المثال مهارته في تسلق الاشجار اقل، وحجم اسنانه اصغر ودي نقطة مهمة ومميزة جدا، ونقطة اتصال عموده الفقري بالجمجمة مختلفة جدا عن الشكل الموجود بالشمبانزي، وحتي بروز فكه مختلف. يبقي تصنيفه في كل كتب البيولوجي انه من أشباه البشر.
طيب أصل صاحبنا ده ايه ؟
كانت أصوله برضه جماعات من أشباه بشر تانيين عاشوا قبل ٣.٥ مليون سنة في شرق افريقيا اسمهم Australopithecus afarensis. كل اختلافه عن اللي قبله انه اكثر بدائية فقط لكن هو نوع متميز جدا لأنه واحد من أهم الأنواع اللي تم توثيق وجودها علي الارض باكتشاف اثاره، وبقايا عظامه بوفرة وكانت أشهرهم حفرية لوسي.
طيب لو رجعنا أكتر بالزمن لأصول النوع ده ؟
هنفضل نمر بمراحل مختلفة لسه أدلة أنواعها بتتراكم وتتدرس لكن المؤكد برضه انها انواع من أشباه البشر عاشت بداية من ٧ مليون سنة وحتي ظهور السلف المذكور في الفقرة اللي فاتت Australopithecus afarensis.
الانسان أصله قرد
فيه سببين لو نفهمهم هنرتاح:
- الاول ان التصنيف العلمي للانسان بكل أنواعه سواء اللي قولناها او اللي مقولنهاش بيكون تحت عائلة كبيرة اسمها Great apes او بالترجمة العربية القردة العليا. والتصنيف العلمي شئ مش عيب لأنه بيجمع كل الكائنات اللي بتشترك في صفات معينة قريبة لبعض. يعني عائلة القطط بتضم النمور والقطط البرية، والقطط الأليفة في بيوتنا مثلا (معتقدش عندنا أزمة من تصنيف النمور المتوحشة والقطط اللطيفة في عائلة واحدة لأننا بسهولة مدركين التشابه ). يعني هدف التصنيف اصلا هو تسهيل دراسة الكائنات بعد كده.
- السبب الثاني ان لما نرجع لأخر نقطة في جذر شجرة تطور البشر هنوصل لكائن بيجمع في صفاته بعض صفات أشباه البشر القدامي، وبعض صفات الشمبانزي (ميكس يعني).
الخلاصة
يبقي الخلاصة ان خطأ علمي كبير انك تقول أصل الإنسان قرد !! بس مهم جدا تفهم وتستوعب ان البشر نتاج عملية تطور مستمرة وهتستمر وفي الأيام الجاية ممكن نوضح أمثلة كتير لعملية التطور اللي لسه بتحصل بين البشر، وممكن نلاحظها.
طوال الرحلة الطويلة دي اللي تعتبر قصيرة جدا قياسا لرحلة تطور سمك القرش مثلا ،كتير من صفاتنا اتغيرت واتطورت، وكتير من صفاتنا بقت اسوأ وكتير بقت أفضل. يعني التطور هو التغير مش التحسن للأفضل عشان دي نقطة ناس كتير فاهماها غلط.
قد يهمك: اعدام الفيلة ماري .. عندما يتوحش الانسان (قصة حقيقية)
ملحوظة بسيطة:
أنا عارف ان صعب علي كتير مننا انه يتخيل ان شكل أسلافه زي ما هيشوف في الصور، بس والله يا جماعة الزمن والجينات أثرهم فعلا صعب. احنا بنتعجب لما بنشوف هيئة وأثار أجدادنا اللي عاشوا من ٥ الاف سنة، ما بالكم بقي بأجداد عاشوا قبل ألاف وملايين السنين !!
تحديث :
لأن العلم دائما بيطور نفسه ولعبة البازل اللي لسه بنحل الغازها في معرفة تاريخنا القديم مستمرة. حسب اخر بحث اتنشر في اغسطس 2021 حصل تعديل في اخر مليون سنة من تاريخ تطور البشر. تم تسجيل نوع بشري جديد اسمه Homo bodoensis وتم تأكيد ان هو سلفنا المباشر (مش Homo heidelbergensis ). بالإضافة الي ان العلماء أعادوا تصنيف Homo heidelbergensis باعتباره نياندرتال قديم مش نوع منفصل بشكل كامل.
طيب هل التعديل ده بسيط وسهل كده ؟
لا العلماء عشان يعملوا التعديل اشتغلوا علي البحث ده وغيره ٣٥ سنة !!
