معروف طبعا إن الدم مهم جدًا لحياة أي كائن حي على وجه الأرض، و للأسف الدم دا سائل عجيب محدش قدر يصنعه لغاية دلوقتى؛ لذلك الحل الوحيد لأي حد فَقَد دم كتير هو إنه ياخد الدم دا من حد …
كل الأديان السماوية من أيام سيدنا “يعقوب” ماشية بمبدأ “وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا” ؛ لذلك التبرع بالدم أجره كبير جدا عند ربنا؛ لأنك حرفيا بتنقذ إنسان من الموت، لكن الكلام دا كله كلام بديهي و انت أكيد سمعته مليون مرة قبل كدة، و من ناس بيتكلموا فى الدين أحسن مِنِّى مليون مرة ….
السؤال هنا بقى، أنا لو اتبَرَّعت بالدم هستفيد إيه؟
لا معلش ارجع اقرأها بصوت مرتضى منصور 
😂
بالإضافة لإن الدم اللي بتتبرع بيه دا بينقذ حياة أشخاص كتير و بيبقى صدقة جارية لك طول ما هو ماشي فى جسم الشخص اللي استقبل الدم دا، إلا إنك كمتبرع بتستفيد كتير برضو من التبرع بالدم كل فترة…
التبرع بالدم بيحميك من مرض Hemochromatosis (داء ترسب الأصبغة الدموية)… مش عارف مين اللي ترجمه 😂، بس عموما دا مرض بيسببه زيادة نسبة الحديد فى الجسم… فى المرض دا بيبدأ الحديد إنه يترسب فى بعض الأعضاء زي القلب و الكبد و الكلى و البنكرياس و يؤدي لإن وظيفتها تتعطل و تدخل فى مصايب ملهاش آخر… التبرع بالدم بانتظام بيقلل فرصة حدوث المرض دا بنسبة كبيرة جدا؛ لأنه بيخلى نسبة الحديد فى الدم عند الحد المناسب
خلايا الدم فى جسمك بيكون ليها عمر محدد، و الوظائف اللي بتأديها خلايا الدم دى بتتدهور و بتقل كفاءتها كل ما قَرَّبت نهايتها؛ لذلك التبرع بالدم كل فترة بيجدد خلايا الدم فى جسمك باستمرار؛ و بالتالي بتكون أغلب الخلايا اللي فى جسمك جديدة؛ و هتلاقى الوظيفة اللي بتأديها الخلايا دى أفضل بكتير!
التبرع بالدم بيساعد على زيادة نشاط نخاع العِظام (Bone marrow)، و بيزود كفاءة الخلايا اللي بتنتج خلايا الدم؛ و بالتالي بتكون قدرة الناس اللي بيتبرعوا بالدم على تجديد خلايا الدم اللي بيفقدوها أكبر من الناس اللي مبيتبرعوش بالدم! 
😃
التبرع بالدم باستمرار بيساعد على تخفيض ضغط الدم بشكل كبير؛ لذلك الناس اللي بيتشخصوا بمرض ضغط الدم المرتفع فى الدول المحترمة بينصحوهم بشوية حاجات كدة علشان يظبطوا الضغط من غير أدوية، زي تعديل العادات الغذائية و ممارسة الرياضة و “التبرع بالدم بانتظام”، لو مكانش عندهم مشاكل صحية تانية تمنعهم من التبرع بالدم طبعا! 😃
التبرع بالدم بانتظام بيساعد على إنقاص الوزن بشكل كبير! و بعيدا عن إن نص الشعب المصري عاوز يخس و مش عارف لأنه بيبدأ باليوم الـFree 😂
إلا إن الموضوع دا مفيد جدا للناس اللي عندهم مرض السكر من النوع التاني ( اللي بيمشوا على الأدوية مش الإنسولين )، و ممكن بالمتابعة مع الدكتور المختص بالعلاج تقلل جرعات الأدوية اللي بتاخدها لمرض السكر أو توقفها خالص فى بعض الأحيان!
التبرع المنتظم بالدم بيقلل مستوى الكوليسترول فى الدم، و بيحميك من أمراض كتير، أهمها تصلب الشرايين (Atherosclerosis)؛ و بالتالي هتقلل من الإصابة بأمراض القلب و الأوعية الدموية ..
لما بتتبرع بالدم لازم الدم بتاعك بيتعمل له التحاليل و الفحوصات اللازمة علشان يتأكدوا إن الدم مفيهوش مشكلة؛ و بالتالي بتتأكد على صحتك كل ما بتتبرع … كل دا ببلاش! 😃
طيب الموضوع دا عجبنى أوي و عاوز أتبرع بالدم حالا 
😃
الشخص اللي بيتبرع بالدم لازم تتوفر فيه شوية شروط :
لازم يكون سنك أكبر من 18 سنة و أقل من 60 سنة
لازم كمان يكون وزنك أكتر من 50 كيلو علشان مايحصلش مشاكل لك بسبب التبرع بالدم
لازم ميكونش عندك أي مرض بيتنقل بالدم، زي فيروسات التهاب الكبد B و C، و مرض نقص المناعة المكتسب (AIDS) و الملاريا و غيرها من الأمراض اللي بتتنقل عن طريق الدم …
لازم كمان تكون مبتشتكيش من أي مرض ممكن يخلى كمية الدم اللي هتفقدها تسبب لك مشاكل صحية ( زي الأنيميا و النزيف الحاد و الأورام و الحاجات دى… )
طيب أنا واحد الحمد لله مستوفى كل الشروط دى و عاوز أتبرع بالدم … إيه الحاجات اللي المفروض أعرفها؟
كمية الدم اللي بتتبرع بيها فى أي مكان فى العالم المفروض بتكون 350 مل، و ممكن تتبرع كل 8 أسابيع (كل شهرين)
سيبك من المعلومة اللي فوق دى خالص! عندنا فى مصر الموضوع مختلف شوية… 😃
فى مصر معظم الناس عندهم أنيميا، و قليل جدا اللي بيتبرع بالدم .. يا أخى الواحد من دول تيجى تقول له اتبرع بالدم يقول لك “معنديش دم.. هاهاها 😂“
لذلك لو رُحت تتبرع بالدم فى أي مكان فى مصر هياخدوا منك 500 مل دم، و المفروض إنك تتبرع تاني بعد 3 شهور على الأقل (دى المدة اللي جسمك بيقدر يجدد فيها كرات الدم الحمراء)
المفروض تعمل حسابك و تفطر كويس فى اليوم اللي هتروح تتبرع فيه بالدم، و تشرب كمية مناسبة من المياه و السوائل فى اليوم دا
و انت رايح المستشفى تتبرع بالدم ابقى خد معاك علبة عصير علشان تشربها لو حسيت بأي دوخة أو حاجة (خلي بالك إنى بقول لك “لو”؛ لأنك فى الغالب مبتحسش)، لكن غالبا بتحس بالعطش شوية و كدة؛ فلازم تشرب حاجة يعنى 😃
حاول تاكل وجبات غذائية متوازنة دايما علشان تسرَّع من تجدد خلايا الدم، و يا سلام بقى لو تاكل أكل فيه حديد كتير زي التفح و الكبدة و البتنجان… يااااه هتلاقى أعضاء جسمك كلها بتدعى لك 😃
أيوة بس استنى.. دا أنا كان واحد صاحبى قال لى إن التبرع بالدم دا وحش علشان …...
أيوة صحيح.. نسيت أقول لك إن الشعب المصري الجميل بيبرر إنه مبيتبرعش بالدم بمليون خرافة… زي مثلا:
إن التبرع بالدم بيجيب أنيميا…
التبرع بالدم بيقلل تركيزك و قدرتك على المذاكرة …
أصل “فلان” راح اتبرع بالدم و داخ و حصل له إغماء …
التبرع بالدم بيجيب “سرطان”! 😂 و الله سمعتها و قرأتها كذا مرة! 😂
الدم اللي بتتبرع بيه دا بيتباع و انت مش هتستفيد حاجة …
أنا مش هتبرع علشان لو حد قريبى احتاج دم …
بص ….. كل دى خرافات و كلام ملوش أساس من الصحة …
اللي بيجيب لك أنيميا هو الأكل اللي بتاكله و مفيهوش حديد، مش التبرع بالدم خالص!
التبرع بالدم مابيقللش التركيز ولا حاجة! أنا اتبرعت بالدم كذا مرة و محصليش أي حاجة من الكلام ده!
صاحبك اللي اتبرع بالدم غالبا كان عنده جفاف أو كان محتوى السوائل فى جسمه قليل؛ و بالتالي طبيعي إنه يدوخ لما تاخد من جسمه نص لتر كمان!
دراسة اتعملت فى جامعة Oxford، أثبتت إن التبرع بالدم ملوش أي علاقة بزيادة فرصة الإصابة بالأورام، بل على العكس.. التبرع بالدم بيحميك من الإصابة بأورام كتير مرتبطة بزيادة الحديد فى الدم، زي سرطان المرىء على سبيل المثال …
الكلام عن بيع الدم و الحاجات دى عبارة عن كلام فاضي! مفيش حد بياخد منك دم علشان يبيعه (إلا المستشفيات الخاصة 😂)، و فى كل الأحوال انت كسبت ثواب إنك هتتبرع بالدم لحد، و كسبت الفوايد الصحية للتبرع بالدم 😃
و على فكرة.. قريبك مش هيحتاج دم، و حتى لو احتاج… انت ممكن تعيش بشكل طبيعي لو جسمك فيه 3 لتر دم… جسمك دلوقتى فيه 5 لتر دم، يعنى ممكن تتبرع لقريبك دا تاني حتى لو كنت متبرع بالدم قريب و مش هتحس بمشاكل خالص إن شاء الله
للمزيد عن التبرع بالدم من في موسوعة المعلومات ويكيبيديا
-
فيلم قصير | التبرع بالدم HD
