( الاطفال من سن يوم الى سن 3 سنوات ) … الطفل فى السن دى بيكون غير مميز يعنى لا يعقل ولا يميز بين الصواب والخطأ والأم بتعتبر هى المسؤولة عن رعايته بشكل كامل وهنا بننتبه لعدة نقاط منها اللى بيخص الام ومنها اللى بيخص الطفل نفسه
ارشادات هامة لكل ام
1-لازم ننتبه جدا لعدم وجود الطفل فى غرفة النوم مع الاب والأم وقت اللقاء الزوجي لان الامر ده له اثر سيئ جدا على الطفل وحتى زمان انتبهوا للامر ده .. روى عن ابن عباس رضى الله عنه انه كان يخرج حتى الرضيع من الغرفة وقت الجماع .. كتير بتقول الام ان الطفل بيكون نايم او انه مش فاهم او انه مازال صغير ..
وهنا هنقولها ان الطفل بيتأثر بكل ما يدور حوله حتى الاصوات الهامسة وقت اللقاء ده وثبت من خلال دراسات كتير و ابحاث تمت على اطفال عندهم بعض الانحرافات الجنسية انه من ضمن الاسباب تعرض الاطفال دول لتجارب جنسية مبكرة سواء بالمشاهدة او التنبية المبكر لمناطق الاثارة في أجسامهم وبسهولة هنلاحظ بعض المشكلات دى على سلوك الأطفال هنذكر بعض الأمثلة
- محاولة تقليد الطفل للى شافه وده غالبا بيكون اثناء لعبة مع اطفال تانيين
- عدم فهم الطفل للعلاقة وغالبا ما يتصور انها اعتداء وايذاء من الاب للام وكتير بيكون فى سوء فهم وبيبدأ الطفل يتعامل مع الاب بشيئ من الغيرة والكراهية احيانا
- بعض العقد النفسية مثل ( عقدة اوديب / عقدة اليكترا ) اللى بيصاب بيها الاطفال وبتولد عندهم تعلق زائد باحد الابوين وكراهية للطرف الاخر والغيرة منه واثار تانية كتير يمكن يفتكرها اللى درس فى كلية التربية لانها بتتشرح هناك بشكل مفصل
2-يجب ان تنتبه الام الى عملية الغيار للطفل بحيث انها تتم بمعزل عن الاخرين لان دة بيربى الطفل اللى بنغير له على قيمة الحياء وأنه يحافظ على خصوصيتة وانه مينفعش نخلى اى حد يشوف جسمنا حتى اخواتنا وطبعا كل ده بيستقر فى ذهن الطفل مع الوقت والتكرار وبيشكل وعى الطفل ويحمية من محاولات التحرش اللى ممكن يتعرض لها لان كتير من الاطفال متربوش على انهم يحافظوا على جسمهم ولا انهم يتستروا من الناس وقت الغيار او وقت دخول الحمام والافضل عدم رؤية الاخرين للطفل و يمنع حتى الاخوات ولو كانوا من الجنس من مشاهدة الطفل وقت الغيار او وقت الاستحمام لان التساهل فى الامور دى له عواقب
3-يجب ان تنتبه الام الى ان اى اثارة للطفل بيشعر بيها وبتأثر فية لان بعض الامهات اثناء الغيار للطفل ممكن تداعب اعضائه على سبيل ( الزغزغه ) وتلاقى للطفل استجابة بالضحك او الكف عن البكاء فتظن ان دى وسيلة جيده لاسكات الطفل طبعا دى عاده خطيرة جدا لانها بتنبه الطفل الى اثر المداعبة على الاعضاء دى وبيتجه بعد كدة لانه يداعب نفسة ذكر لى صديق يعمل بالتربية انه تم طرد احدى الممرضات من مستشفى بدولة دول الخليج لانها كانت تداعب الاطفال ( الاولاد ) فى اماكن حساسة بجسمهم عند بكائهم ليكفوا عن البكاء !!!! الاولاد فعلا كانوا بيسكتوا ويبطلوا عياط لكن الاثر اللى بيترتب على كده مش هين
4-يجب ان تنتبه الام ان هى فقط اللى تغير للطفل ملابسة وانها لا تترك الامر ده لاى شخص اخر وتنتبه الى انها قبل ما تترك الطفل فى الحضانة تكون مطمنه لمستواها وامانتها وتتابع الطفل دائما وتسأله عن يومة وهل عمل حمام ولا لأ وتحاول تفهم الدادة الطفل محتاج ايه يعنى بالضبط يعنى لو طفل اتعلم فى البيت انه يعمل حمام لوحدة بلاش حد يدخل معاه
لو محتاج بس حد يفكلة الحزام او يفتحلة زرار البنطلون يبقى الدادة تقوم بالمهمة وبس دى وتسيب الطفل بمفرده ولو طفل بيحتاج بس شخص يشطفه او او يبقى ندرب الطفل على اللى يقدر يعملة لنفسه علشان نقلل تعامل اى حد غريب معاه بعض الامهات بتظل تشطف الطفل وتغسل له حتى سن متأخرة جدا يعنى تتفاجئ بطفل او طفلة ست وسبع سنوات ويمكن اكبر والام لسة بتساعد او حتى تقوم بالتشطيف بالكامل وده غلط
إرشادات للاطفال
1-تراعى الام ان تنبه على الطفل متى بدأ يفهم كلامها انه لا يدع اى شخص يرى جسمة او يلمسة
2-تنبية الام على البنت انها لا تجلس وهى مباعدة بين ساقيها يعنى تجلس وهى ضامة ارجلها لان لبس البنات غالبا بيكون فستان او جيب يعنى يكشف ما تحته بعكس الاولاد لبسهم بنطلون لا يكشف
3-تنبه الام على الطفل اللى بيذهب لحضانة انه محدش يدخل معه الحمام من الاطفال الاخرين وان داده فلانه فقط اللى بتغير له او بتساعدة
4- التنبية على الطفل انه هو كمان ميبصش على اى حد لو كان بيغير او بيعمل حمام
مقولات غير تربوية
1- يغيروا سوا دول بنات زى بعض / دول ولاد زى بعض
2- ده ابنى / دى بنتى البس قدامه براحتى
3- الاولاد لسه صغيرين ومش فاهمين حاجة
4- البس براحتى ويشوفنى كده علشان يتعود لما يكبر وميبقاش فى حرج
وغيره كتير من الكلام والمفاهيم اللى للاسف بتكون غلط وبتتسبب فى مشاكل بعد كده
……………………………………………………….
- ان شاء الله فى حلقتنا اللى جاية هنتكلم عن
- العاب خطيرة يلعبها الأطفال
- مشكلات جنسية للاطفال تشتكى منها الامهات وكيفية الحل
