بنسمع كتير عن ناس بتقرر إنها تعمل “كارير شيفت Career Shift”، تسيب مهنتها الأساسية اللي درستها واشتغلتها وتتجه لشغل في مجال تاني خالص، يعني مثلا طبيب قرر إنه مش حابب مهنة الطب وإن شغفه الأساسي هو البيزنس، ويبدأ يعمل مشروع خاص بيه، ويتحول لرجل أعمال.
يمكن في الحالة ديه بيبقى واضح قدام الشخص مؤشرات كتير بتخليه ياخد قرار تغيير المهنة، يعني مثلا إنه بيبقى مش سعيد في مهنته، وعنده شغف كبير تجاه مجال تاني، لكن في حالة تانية بتواجه موظفين كتير وهي:
بيبقى حابب مهنته، وشغفه الحقيقي في نفس المجال اللي بيشتغل فيه، بس هو بيتشغل في شركة مش مناسبة ليه، ومحتاج ياخد قرار إنه يسيبها ويروح لشركة تانية تتناسب أكتر مع شغفه وطموحاته.
بس للأسف فيه موظفين كتير مش بيقدروا ياخدوا القرار ده، أو مش بيعرفوا يحددوا إمتى لازم يبدأوا يدوروا على شركة تانية، ويسيبوا شركتهم اللي بيشتغلوا فيها، والنتيجة بتكون ضياع سنين من العمر وإهدار جهد وشغل كتير من غير أي إنجاز حقيقي.
فيه بعض المؤشرات لازم كل موظف طموح وعنده هدف ياخد باله منها، عشان هي عبارة عن رسالة إنه لازم يغير شركته ويدور على شغل في شركة تانية.
1- الشركة مش بتفيدك مهنيا:
ممكن قوي تكون الشركة كويسة وناجحة، لكن إنت بتشتغل في حاجة إنت عارفها كويس، ومفيش قدامك حاجة جديدة تتعلمها، ومفيش أي طريقة تطور بيها نفسك، يعني باختصار الشركة مش بتقدملك أي استفادة على المستوى المهني.. وهنا لازم تبدأ فورا تدور على شركة تانية.
2- الشركة مش بتديك أي تقدير معنوي أو مادي:
إيه اللي يخليك تكمل شغل في شركة ما وتستحمل تعب وإرهاق وجهد وظيفتك؟ إما إنك بتلاقي تقدير وتكريم معنوي للمجهود والشغل اللي بتقدمه، وده بيخليك تجتهد وتطور من نفسك وتقدم أكتر، أو إنك بتاخد مقابل مادي كويس متناسب مع المجهود اللي بتعمله.
لكن لو شركتك مش مقدرة شغلك على المستوى المادي والمعنوي.. يبقى لازم تبدأ فورا تدور على شركة تانية.
3- مفيش هيكل تنظيمي أو قانوني:
لما تكون الشركة بتشتغل بشكل مهني هتلاقي فيها إطار قانوني وتنظيمي عشان يحدد مهمة كل موظف، وحقوقه، وواجباته، بحيث ميحصلش أي تعدي على حقوقك أو سرقة لأفكارك ومجهودك، لو شركتك مش بتعمل ده … يبقى لازم تبدأ فورا تدور على شركة تانية.
4- فقدت الشغف وبطلت تبدع وتقدم جديد:
لو مرت عليك فترة في الشركة وطول الوقت بتحس إنه مبقاش عندك حماس للشغل، ومش بتساهم بأفكار جديدة، واللي بتفكر فيه أول ماتدخل الشركة إمتى الشيفت يخلص وتروح، يبقى لازم تبدأ فورا تدور على شركة تانية.
وفي النهاية لازم ناخد بالنا إنك لو عندك التزامات ومسئوليات، فاحنا مش بننصح إنك تسيب شركتك وتقعد في البيت، إنت تدور على شغل تاني وبعدها تسيب الشركة، لكن لو لسه في بداية حياتك فكويس إنك تاخد فترة بين الشغل ده وده تتعلم فيها كورس جديد، وترتب حساباتك وتخطط لأهدافك كويس.
أهم حاجة وإنت بتاخد القرار تكون مقتنع بيه، ومحدد هدفك من خطوة زي ديه، وتحاول ما تتأثرش بكلام ناس كتير هتعارض تفكيرك، وتقنعك إنك تخليك في شركتك أضمن.
