كيف تسببت حرب اكتوبر في واحدة من اكبر الازمات الاقتصادية العالمية فى تاريخ الاقتصاد الحديث ؟
الاحداث بالترتيب كانت كالاتي.
1 – رئيس امريكا فى ذلك الوقت ؟
- كان الرئيس ريتشارد نيكسون
- مدة ولايته : 1969 – 1974.
2 – اهم انجازاته :
أ – التجسس علي خصمه فى الانتخابات (فضيحة ووتر جيت) ثم الاستقالة بسبب اكتشاف الفضيحة.
ب – انجازات ناسا الفضائية و وصول اول انسان للقمر نيل ارمسترونج.
ج – فك الارتباط بين الدولار والدهب والتسبب فى زلزال اقتصادي مازال أثره موجود لليوم.
سيبك من كل اللى فات وركز فى “فك الارتباط بين الدولار والدهب” لانها مرتبطة مباشرة بموضوعنا.
3 – ايه علاقة القرار دة بحرب اكتوبر ؟
لما نيكسون عمل كدة – وبدون ما نشتت نفسنا بالسبب اللي خلاه عمل كدة – ارتفعت قيمة الدهب وانخفضت قيمة الدولار وبالتالي انخفضت ارباح اي تجارة بتتم بالدولار واكبر تجارة فى العالم هى النفط وبالتالي الدول المصدرة للنفط ارباحها انخفضت بسبب قرار نيكسون.
4 – اثر قرار نيكسون :
المشكلة الحقيقية ان القرار اتُُخذ بدون مشاورة احد لا داخل ولا خارج امريكا عدا بعض مستشاريه.
انخفاض الارباح جعل الدول المصدرة للنفط غاضبة جدا من الادارة الامريكية.
5 – كيف كانت الظروف السياسية/العسكرية/الاقتصادية بالمنطقة فى ذلك الوقت ؟
– القرار دة كان سنة 71 وبالتالي كانت مصر فى حرب استنزاف وسيناء والجولان تحت احتلال اسرائيلي.
– سعر برميل البترول وقتها كان 2 دولار واستمر بنفس السعر لحد اكتوبر 73.
6 – اندلاع الحرب والتدخل الامريكي :
اكتوبر 73 مصر اعلنت الحرب علي اسرائيل.
19 اكتوبر 73 ارسل نيكسون قرار رئاسي للكونجرس يطلب فيه اتاحة 2.2 مليار دولار مساعدات عسكرية عاجلة لاسرائيل بهدف حفظ التوازن العسكري ودعم الاستقرار بالشرق الاوسط , حسبما ذكر البيان.
المساعدات والدعم العسكري الامريكي كان بدأ اصلا قبل مالكونجرس يفكر يوافق ولا يرفض.
- 2.2 مليار دولار فى 1973 = 12.5 مليار دولار فى 2018
- ميزانية الجيش الاسرائيلي اليوم = 15 مليار دولار
تخيل يجيلك مساعدات عاجلة فى يومين تساوي تقريبا نفس حجم ميزانيتك السنوية.
دي مساعدات تكفي لانشاء جيش كامل من جديد بكامل تسليحه فى ذلك الوقت.
7 – رد الدول العربية المصدرة للنفط :
ردت الدول العربية المصدرة للنفط بالوقوف بجانب مصر والاعلان عن حظر كامل علي تصدير النفط الي الدول الداعمة لاسرائيل.
الدول الرئيسية فى الحظر :
امريكا – انجلترا – هولندا – اليابان – كندا
وتوسع ليشمل دول اخري لاحقا.
انتهت الحرب وبدا وقف اطلاق النار لكن حظر تصدير النفط استمر لحد مارس 74.
8 – التغير فى سعر البرميل :
سعر البرميل طلع من 3$ ل 12$.
9 – التأثير علي الاقتصاد العالمي :
– تضاعف التضخم 3 مرات فى امريكا , من 4% الي 12%.
– تضاعف التضخم فى كندا مرتين , من 6% الي 12%.
– تضاعف التضخم فى فرنسا مرتين , من 8% الي 16%.
– تضاعف التضخم فى اليابان 5 مرات , من 5% الي 25%.
– تضاعف التضخم فى ايطاليا 2.5 مرة , من 10% الي 25%.
– وصل التضخم فى انجلترا الي 24%.
– البطالة ترتفع لمستويات سيئة , ارتفعت فى امريكا من 5% الي 9% .
– الاقتصاد الامريكي يدخل موجة انكماش كبيرة , انخفاض النمو من 3.8% الي سالب 3.4%.
وبكدة يبقي دي أول مساهمة مصرية بكارثة للنظام الاقتصادي العالمي.
اخدت امريكا وقت طويل عشان تقدر تخرج من الركود الكاسح وشلل الاسواق دة.
وبناءا علي اللي عمله العرب فيهم قرر الامريكيين التوقف عن تصدير النفط الأمريكي للخارج وتحتفظ بيه بباطن الارض لمنه أي ضغوط أو لي ذراعها مستقبلا كما حدث في 73…. ودى قصة كبيرة نبقي نناقشها فى مقالات قادمة.
ورغم كدة اتضرب الاقتصاد الأمريكي تاني بالحرب العراقية الايرانية اللى رفعت سعر البرميل من 12$ ل 30$.
