انت المفروض إنك بتحب مراتك علشان هي مراتك مش علشان هي أجمل واحد ولا هي أحسن واحده علشان هي مراتك …علشان هي إرتضت إنها تبقي مراتك ووافقت علي رباط مقدس إنت اللي سعيت ليه بكامل إرادتك محدش غصب عليك ولا أجبرك علي النوع ده من الإرتباط فلازم تبقي (راجل) وتحترم الإرتباط ده بشكل كامل وتفهم إنك المسئول الأول عن نجاح العلاقة بإعتبارك راجل ومسئول مش أي حد تاني ….
مراتك نكدية ؟ طبيعي إنها تبقي نكدية من كتر الضغط اللي هي بتعاني منه سواء علي مستوي المجتمع أو الأولاد والأهم علي مستواك إنت لأنك دايما مضغوط ودايما متنكد ودايما محملها مسئولية كل مشاكلك …لو فاشل في شغلك فهي السبب …لو المصاريف مبتكفيش فهي السبب ….لو الولاد أشقياء فهي السبب …لو شريف إكرامي ما بيصدش فهي السبب 
الحياه الزوجية مشاركه بين طرفين …والراجل هو الطرف اللي ربنا إداله القوامه ليقود الأسره لبر الأمان …وهو المسئول عن كل اللي بيحصل للأسره من نجاح أو فشل و من سعاده أو شقاء…ومن حب أو كره ومن تكمله أو إنفصال هو الراجل مش أي حد تاني غير الراجل ….
جرب كده لمدة 90 يوم فقط إنك تعامل مراتك كويس وتشيل عنها جزء من الضغط …إنك تفسحها كل أجازة مثلا أو إنك تشتريلها شكوكولاته كل يوم (شيكولاته فلوت بـ 3 ج مثلا) ….جرب إنك تاخد الولاد يوم تعمل معاهم الهوم وورك أو تقعد بيهم وتخليها تنزل تقضي اليوم براحتها ….
جرب إنك تدخل تغسل المواعين ولو مره في الأسبوع أو تغسل المواعين أو تنشر الغسيل أو حتي تلمه ….جرب توصل الولاد يوميا للمدرسه أو اجيبهم من المدرسه …بلاش كل ده جرب في الفتره دي تعاملها معامله رائعه ويبقي لسانك معاها حلو أو علي رأي أحمد ذكي في فيلم البيضه والحجر إنك تعتبرها زبون أو عميل وتدلعها لمدة 90 يوم علما إن كل ده واجب أصلا عليك ك (رب للأسرة) مش تفضل ولا حاجه ….
واتفرج بعد ما تعمل كل ده واعرف هل هي فعلا نكدية ولا إنت والولاد والحياه ضاغطين عليها وحولتوها كرد فعل لست بتقاوم كل الضغوط وبتتحمل كل المسئوليات فتحولت لظابط بيحاول إنه ينقذ الأسره ويوصل بيها لبر الأمان بعد ما تحول رب الأسرة لفرد بيطالب بحقوقه زي أطفاله من مراته يعني تحولت لراجل البيت للأسف ……
مراتك مش نكدية وإلا إنت مكنتش إتجوزتها من الأول….. ولا شكلها وحش (غالبا الحال من بعضه) ….. و هي مش رغاية مشكلتها إنها قاعده طول اليوم بين أربع حيطان وبتكلم العيال لحد ما هايجلها تخلف وانت بتقابل 20 واحد بالغ عاقل بتتكلم معاهم وتحكي عن كل حاجه فانت بالنسبالها ال 20 واحد دول وبرضه انت بتخرج كل يوم وهي محبوسه فهي برضه عايزه تخرج ….المهم إن في النهاية شخصية مراتك بنسبة كبيره رد فعل عن تصرفاتك وأفعالك تجاهها ….
إحنا للأسف بنعيش في كارثة إجتماعية إسمها التعاسه الزوجية اللي بتؤدي لتفكك أسري ونسبة طلاق غير مسبوقة …ممكن يكون الإنفصال والطلاق حل ضررة صغير علي الراجل وكبير علي الست ومدمر علي الأطفال اللي ملهمش أي ذنب غير إن واحد مش فاهم يعني إيه رجوله ومسئوليه وبناء أسره أخد قرار إنه يطلع رحله علشان يرفه عن نفسه بدون ما يكون عنده إستعداد نفسي إنه (يشيل) أسره عباره عن زوجة وأطفال …..وللأسف لما بيروح يتجوز أبو العروسه بيعمله كشف هيئة وكشف إئتمان وبينسي أهم حاجه وهي كشف الرجوله مش زي زمان لما كانوا بيقبلوا عريس متواضع ماديا ولكن رأس ماله من الرجوله كبير وكان لما حد بيلومهم يقولوا إحنا بنشتري (راجل) ….
الطلاق عمره ماكان حل سهل بالنسبه للراجل بالعكس أحيانا بيكون بداية سلسلة من المشاكل …والمشاكل اللي حصلت في الجواز الأولاني هايحصل زيها في الجواز التاني لو فضلت بنفس التصرفات…. فالأولي إننا نكبر ونسترجل و نبطل نعيش في دور المظلوم ونحافظ علي بيوتنا وعلي زوجاتنا وعلي أبنائنا ونقوم بمسئوليتنا ونقودهم للسعاده وساعتها كل واحد فينا هايبقي أسعد واحد في الدنيا
