امبارح بليل رحت محل فول و طعميه بتاع الغلابه دا، و قولت ناكل اكله حلوه فقولت للراجل عايز كام واحد فول على كام طعميه و شوية بتشنجان من الصنيه اللى تجنن دى.
فبقوله الصينيه شكلها تقطع القلب
قاللى “ربنا يكرمك يا بيه دا من زوقك” يا عم انا بقول الصينيه هى اللى تقطع القلب مش انت مش من جمالك يعنى.
قالى “الحساب ١٠٢.٥ ” و دفعت١٠٣ جنيه عشان شويه فول و طعميه و كل عليا النص جنيه
(انا قولتلكم ال ٢٠٠ جنيه مبتكفيش معايا لاخر الاسبوع محدش صدقنى)
وكله كوووم و سندوتش الديناميت اللى ب ١٢ جنيه دا كوم تانى ، دخلت البيت و بدانا ناكل
حماتى سالتنى قالتلى “هو سندوتش الديناميت دا عباره عن ايه يا بسام”
قولتلها “دى مواد متفجره يا طنط ” بس دة دفعنى افتح السندوتش اللى هو هو نفس حجم السندوتش ابو ٥ جنيه و اعرف الراجل حاطط جواه ايه عشان يبقا ب ١٢ جنيه، لقيته هما هما شوية الفول و زود عليهم صباعين بطاطس صوابع فبقا ب ١٢
و تيقنت ان ال ١٠٠ جنيه كانت بعيده كل البعد عن صنية البتشنجان اللى دخلت قلبى و وجدانى ووكيانى
و انى محتاج ادفع فلوس تانى عشان احصل على جزء من هذا البتشنجان الشهى، بس دا خلانى بقا ادور على فوايد البتشنجان و اعرف سبب حبى و عشقى ليه سواء مقلى او مخلل او مسقعه او محشى.
قد يهمك: فوائد الثوم العظيمة وكيفية تناولة بطريقة لا تضر؟
فوائد الباذنجان العظيمة
لقيت ان البتشنجان (و فى بعض الروايات الاخرى يطلقون عليه اسم “الباذنجان”)
١- بيحافظ على صحة القلب و بيقلل من الدهون الثلاثيه و الكوليسترول.
٢- مفيد جدااا لصحة العظام لاحتوائه على الكالسيوم و فيتامين د و كمان المنحنيز.
٣- غنى بالالياف و عشان كدا بيساعد على الشعور بالشبع لفترات طوييييله.
٤- و بالتالى هو بيحسن من عملية الهضم.
٥- بيساعد فى خفض مستويات ضغط الدم.
٦- بيوسع الاوعيه الدمويه اللى بتوصل الدم الغنى بالاكسجين للمخ.
و بالتالى بتقاوم امراض الشيخوخه.
٧- بيساعد على الوقايه من الامراض السرطانيه.
٨- بيساعد على الوقايه من الانيميا و فقر الدم.
٩- و عشان هو غنى بالالياف فبيساعد على خفض و تنظيم مستويات السكر فالدم.
و اقولكم على مفاجئه اخيره
اليتشنجان مش من الخضروات زى ما كلنا عارفين… دا من الفواكه
لا بجد مش عشان انا بحبه فبقول كدا هو فعلا البتشنجان يصنف من الفواكه.
