في أول أيامُه يدخل علينا أمشير هادئ جداً وتكون الدنيا ربيع والجَو بديع .. لكن، وبعد كام يوم الجَو يتقلب 180 درجة ونبقى كأننا عايشين في سيبيريا .. رعد .. بَرق .. مطر وتَلج .. الشوارع أتبهدلت وبقي الواحِد أشبه بلاعبي الباليه وهوا بيحاول يمشي في الشارِع من غير ما يُقَع .. وهوا دَه بالظَبط حال اللي بيدخُل جِهازُه فيروسات و أوتو ران وتروجان وليله كبيرة سعادتك !
بيكون جهازُه نضيف وبدون مشاكل..
بعد فترة بتدخل فيروسات الكمبيوتر من غير ما يحِس بيها ..
بعد ما الفيروسات تستقر وتظبّط نفسها و (تعرَف رآسها من رجليها) زي ما بنقول .. بتبدأ تهاجم !
بتهاجم وبتنفذ المهمة اللي جاية علشانها ! بتهاجم بلا رحمة ؛ بتنفيذ كأبشع ما يكون ..
لذلك ؛ إن مكانش عندك أنتي فايراس .. شمسية تحميك من المطر .. مش هتقدر تمشي في الشارع .. مش هتعرف تستخدم جهازك!
في البوست ده هنجاوب –بإذن الله- عن أكتر من سؤال زَي :
- إيه هيا فيروسات الكمبيوتر؟
- ليه الفيروسات بتتكتب؟
- تعرف منين إن جالك فيروس؟
- إزاي تحمي جهازك من إن يدخله فيروسات؟
- طَب لو جَت لك فيروسات.. إزاي تتخلص منها؟
- إيه أحسن برنامِج أنتي فيروس؟
- الأحسن تستخدم أنتي فيروس مجاني ولا تشتري واحد؟ وليه؟
- طيب لو جبت أنتي فيروس.. ليه لااازم ولا بد تعمل له تحديث أول بأول؟
إيه هيا فيروسات الكمبيوتر ؟
الفيروس ده عبارة عن برنامج بيتكتب لغرض معين، لكن البرنامج ده غير كل البرامج العادية؛ لأنُه بيتكاثر ذاتياً وبينشر نفسه في كل الجهاز، وبيربُط كودُه البرمجي بأكواد برامِج تانية من غير عِلم المستخدم.
حياة الفيروس بتمُر بمرحلتين مهمتين :
مرحلة العدوي Infectoin Phase
في مرحلة العدوي، الفيروسات بتنسخ نفسها في أي برنامج بصيغة (.exe) والبرامِج اللي الفيروسات دي (بتلزق) فيها بتمكن الفيروسات إنها تشتغل أول ما البرنامج (اللي بقت متصابة بالعدوي) تشتغل.
مرحلة الهجوم Attack Phase
في مرحلة الهجوم، الفيروسات بتهاجِم علشان تنفذ المهمة اللي هيا جاية ليها: سواء كانت تدمير ملفات، تجَسُس عليك، إزعاجك بعَرض إعلانات، حذف برامِج، تعطيل النظام عن العمل أو أي مهمة هيا جاية ليها بتنفذها .. لذلك لازم ولا بُد يكون عندك أنتي فيروس قوي يحميك من شرها ..
ليه الفيروسات بتتكتب؟
الهدايا .. الهدايا بنهادي بيها حبيايبنا والمُقربين لينا، وفي نفس الوَقت ممكن نبعتها لأعدائنا .. لكن مع الأولانيين بتبقي الهدية فيها مفاجأة سارة نوعاً ما .. وفي التانية فـ بتكون وسيلة لتدمير العدو ده .. كذلك الفيروسات، هدايا من المخترقين مبعوتة لأعدائهم .. والهدايا (الفيروسات) دي بتتبعِت أو (بتتكتب) لأكتر من غرض منهم :
- إلحاق أضرار بشركات معينة.
- أبتزاز أشخاص؛ لتحقيق ربح مادي منهم.
- تخريب ملفات وأنظمة التشغيل.
- توصيل رسالة معينة لحَد معين.. مثلاً هاكر معين (بيتشبحَن)؛ علشان يثبت أنُه شَبَح!
- تخريب ملفات وأنظمة التشغيل.
أعرف منين إن جالي فيروس؟
- هتلاقي البرامِج بقت بتآخُد وقت طويل علشان تفتح.
- ظهور ملفات متعرفش عنها فجأةً.
- الهارد بتاعك ممكن يظهر إنُه مليان مع إن فيه مساحة كبيرة فاضية.
- تغيير أسماء أو حجم ملفات من غير ما تكون جيت ناحيتها.
- إستهلاك موارِد الجهاز وتلاقيه –الجِهاز- بقي بطئ من غير سبب.
إزاي تتخلص من كل نوع من الفيروسات؟
بالنسبة لبرمجيات التجسس والإعلانات (Spyware @ Adware):
قولنا إن البرمجيات دي هيا البرمجيات اللي بتتثبت علي جهازك من غير ما تعرفها وبتكون مسئولة عن إنها تجنع عنك بيانات وملعومات ..
1 – الـSpyware: بتجمع عنك بيانات زَي سجل التصفح بتاعك، أهتماتات والمواقِع اللي زُرتها علشان علي أساسُه يبعتوا لَك إعلانات متوجهة أكتر ليك ومناسبة لأحتياجاتك.
2 – الـAdware: ده بقي اللي بيبعت لَك الإعلانات الرخمة دي وكل شوية تلاقي Pop up طالعة من اللامكان بَس علشان تقرفك.. بيعرض لك إعلانات مزعجة، وبتقَلِل من سرعة النِت، وبتخلي جهازك بطيء.
إزاي تكتشف الأتنين؟
– لو جهازك متصاب بنوع من الأتنين دول هتظهر عليه أعراض زَي:
– تلاقي أيقونات جديدة هتظهر في شريط المهام.
– صفحات أنترنت بتتفتح لوحدها من غير ما تفتحها.
– نوافِذ منبثقة Pop-Up بتظهر لك كتير أثناء تصفحك للأنترنت.
– هتلاقي فيه صفحات إنترنت بيتِم إعادة توجيهك لصفحات إنتا مش عاوزها.
– الصفحة الرئيسية Home Page بتاعِة المتصفح هتلاقيها أتغيرت لصفحات إنتا متعرفهاش.
– مؤشر الماوس هتلاقيه بيتحرك بمزاجُه.. أو تحديداً (وزي ما حصل مع واحد صاحبي) هتلاقي المؤشر بيروح علشان يختار أختيار معين .. يعني لو فيه نافذة جايه وفيها أختيارين من: Yes أو No .. المفروض إن الـNo تدوس عليها علشان تعمل أختيار لصالحك، فـ الفيروس تلاقيه بيسحَب المؤشر ناحية الـYes .. حاجة اللي هوا يا أنا يا إنتا في الجهاز ده!
تعمل إيه علشان تتفادي الحاجات دي كلها؟
- متحملش أي برنامج من موقع مش عارف عنه حاجة.
- متحملش أي برنامِج أو حاجة تجيلَك ع البريد بتاعك من حَد متعرفهوش.
- متضغطش علي أي روابط تجيلك في أي نافذِة إعلانات منبثقة (Pop-Up)؛ لأنه ممكن تثبت أي Spayware في جهازك.
- أي نافذِة إعلانات أقفلها بأنك تدوس علي علامة الــ (X) بدل من إنك تدوس علي كلمة Close.
- أفحص البرامِج اللي عندك كل فترة بأنتي فيروس قوي.
- أستخدم أنتي فيروس قوي ودايما خليه متحدث (هنتكلم عنها بالتفصيل بعدين).
طيب إزاي تتخلص من الأتنين دول بقي؟
إذا كنت متأكد إن جهازك متصاب بـSpyware أو Adware يبقي : برنامج AdwCleaner :
خطوات التثبيت والحذف كالتالي:
حمل البرنامج ( من هنا ) .
– أقفل أي متصفح بتستخدمه.
– أفتح البرنامج علشان تثبته، ولوو بتستخدم ويندوز فيستا/7/8 أضغط كلِك يمين علي الأيقونة وأختار Run As Administrator.
– بعد التثبيت، أفتح البرنامج، أضغط علي زرار Scan، وبعد ما يخلص من الفحص دوس علي Clean.
– هتظهر لك نافذة بتقول إن لازم البرامِج اللي مشغلها كلها تتقفل، دوس علي Ok.
– بعد ما تتم عملية الحذف هتلاقي رسالة ظهرت فيها شوية نصائح عن الفيروس وخلافه، دوس علي Ok.
– بعدين البرنامج هيطلب إن الويندوز لازم يتعمل له إعادة تشغيل (Restart) دوس Ok برضو.
– بعد ما الكمبيوتر يفتح هتلاقي ملف كتابي (text) أتفتح وده فيه سجِل البرنامج والحاجات المهمة اللي ملهاش لازمة دي علي رأي سنيور ياسر سيبك منها، وأفتح البرنامِج.
– بعد ما تفتح البرنامج، وبعد ما تكون حذفت الفيروسات، ممكن تحذف البرنامج نفسه من كلمة Uninstall اللي في البرنامج نفسه. لو هتحذف وأخترت Uninstall هتلاقي رسالة ظهرت لك بتقول إن فيه ملفات أسمها Quarantine هتتحذف، دوس Ok عادي برضو.
بالنسبة للـKeyLogger والـTrojan :
– قولنا قبل كده إن الـKeylogger هوا فيروس مسئول عن إنه يسجل كل الحاجات اللي بتعملها علي الكمبيوتر، ويسجل الحروف اللي بتكتبها علي الكيبورد ويبعتها للهاكر الجميل، وإنه قادر يلتقط صور للشاشة Screenshot كمان برضو .
– وقولنا إن الـTrojan ده عبارة عن فيروس بييجي علي شكل برنامج، من بره بيبان علي إنه مسالِم، لكنُه أول ما بيدخل جهازك بيمنح الهاكر التحكم الكامل بجهازك!
إزاي تعرف إن جهازك مُصاب بتروجان؟
- ممكن تلاقي إيميل الفيسبوك بتاعك أو حساباتك عامةً تم أختراقها وتغيير كلمة السر بتاعتها من غير ما تعرف.
- هتلاقي بتتم إعادة توجيهك لصفحة نت إنتا مش عاوزها. وبرضو ممكن تلاقي الماوس بيتحرك براحته.
- هتلاقي جدار الحماية (Firewall) أتعطل لوحده من غير ما تعطله أنتا.
- الكمبيوتر ممكن تلاقيه بيقفل ويشتغل لوحده.
تعمل إيه علشان لو تحمي جهازك من التروجان والكي لوجَر؟
- متستخدمش أي متصفح بإصدار قديم، ودايماً حدث المتصفح اللي عندك.
- متفتحش أي مرفق يتبعت لك في أي رسالة ع البريد من حَد متعرفوش.
- متحملش برامج مجانية من مواقع غير معروفة برضو.
- خد بالك وإنتا بتستخدم أي CD أو DVD أو حتي USB علي جهازك.
- أقفل جهازك الجميل بكلمة سر أجمل علشان محدش يعمل معاك السليمة ويثبت لَك برنامج وإنتا مش عارف.
طب بإفتراض إنهُم عندَك.. إزاي تتخلص من النوعين دول من الفيروسات؟
فيه برنامِج من أتنين :
Emsisoft Anti-Malware أو Malwarebytes Anti-Malware و هشرح لك إزاي تستخدم الأتنين.
Emsisoft Anti-Malware :
– حمل البرنامج (من هنا) .
– أقفل كل البرامِج اللي شغالة.
– أفتح ملف التسطيب، وسطيب البرنامج بالـNext، وبعدها Next، وفي النهاية دوس Finish.
– أفتح البرنامج هتلاقي في الواجهة كلمة Scan.. مش عاوز أحرَق لَك المُفاجأة بس المفروض تدوس عليها علشان يعمل فحص!
– البرنامج هيبدأ يفحص البرامِج الموجودة علي جهازك والملفات، والعملية دي ممكن وأكيد هتآخُد وقت؛ لذلك أستني شوية.
– بعد ما يخلص هيجيب لَك نتيجة الفَحص، أضغط علي كلمة Apply Actions؛ علشان يحذف كل البلاوي اللي لقاها البرنامج.
– في النهاية، ممكن تلاقي البرنامج جاب لك رسالة بتقول: “Your computer needs to be restart…..” يبقي دوس علي Yes.
Malwarebytes Anti-Malware :
– حمل البرنامج ( من هنا ).
– أفتح ملف التسطيب وكالعادة سطبُه.
– لمّا البرنامج يتسطب أفتحه، وهتلاقي فيه 3 أختيارات ظهروا قدامك، أختار أول واحد (Test for 30 days free) .
– بعدها هتظهر لك رسالة بتقول لك (Help make the internet a safer place) ودي علشان تساعدهم في شوية إحصائيات وحاجات كده.. سيبك منها وأختار No, thanks.
– بعد كده ممكن تلاقي البرنامج بينزل تحديث سيبه ينزله.. وبعد ما يخلص دوس علي Next.
– بعدين هتظهر لك رسالة بتقول لك عاوز تفعل حاجة أسمها الـPUPs؛ ودي بتسمح للبرنامج من إنُه يحذف أي شريط أدوات ملهوش لازمة.. نصيحة دوس علي Enabe PUPs Detection.
– أخيراً هتلاقي رسالة بتقول لك: عاوز تعمل أنهي نوع من الأربع أنواع من الفحص؟ أختار Full Scan؛ علشان يعمل فحص كامل لجهازك كله.
– البرنامِج هيبدأ يفحص الجهاز. ممكن الخطوة دي تآخد وقت؛ لذلك أستحمل شوية.
بعد ما الفحص يتِم هتلاقي البرنامج عرض لك قائمة فيها الفيروسات اللي لقاها .. أضغط علي Quarantine Selected علشان يحذف كل الملفات والبرامج الموجودة دي. ولو بصيت ع البرامج والملفات دي ولقيت فيها أي حاجة حاسس إنها مش فيروس ممكن تلغي العلامة من عليها علشان متتحذفش.
– وفي النهاية هتلاقي البرنامج عرض لك رسالة منها تقفل البرنامج، لو البرنامج طلب منك تعمل إعادة تشغيل للجهاز أعمل له. وبس كده.. خلصنا!
