ازاي تظبط وزنك وجسمك زي ما الكتاب بيقول

ناوي تروح جيم وتبني جسم كويس .. هنا هحكيلكم قصة فشلي في الجيم السنة اللي فاتت .. عشان اللي هيبدأ يبقى على نور .. لاني تعبت جامد في البحث عن كل وسائل اللي تنجح الموضوع قبل ما ابتدي .. والحمد لله ما عملتش بحاجة منهم .. فممكن انتوا تكونوا احسن مني وتنجحوا ..

اول هام واهم هام هو ( الكورس الغذائي ) .. وياسلام لو تشوفوا اخصائي تغذية كويس .. او برنامج محترم لعنتيل من عناتيل التحكم في الوزن وشكل الجسم زي النجم ( كريستيان بيل ) بطل فيلم باتمان .. لانه حقيقي الاسطورة في الموضوع ده بلا منازع .. اما العبد لله كان بياكل له وللزمن ..

اختاروا الجيم المناسب لكم واللي اجهزته كويسة وفيه ناس كتير بتروحه تحفزكم عالاستمرار .. وفيه مدرب فاهم مش عكاك وفتاي وبنى جسمه في ٢٠٠ سنة ضوئية وبعضلات شكلها غريب زي عضلات الكائنات الفضائية الهلامية .. انا للاسف ساعتها شتت نفسي في كذا طريق ..

الاول ابتدوا لياقة بدنية ( جري ونط وتمارين مجردة بمختلف انواعها ) 
.. وتعالوا على نفسكم وطولوا شوية فيها قبل ما تدخلوا عالتقيل .. عشان العضلات والفقرات والعضم يستحمل العجر اللي جاي بعدين والا فالاصابات مروعة .. والله مروعة .. الانزلاق الغضروفي بيطالب بحقوقه من الكسالى القدامى .. جالي منهم واحد في رقبتي قعدت اسبوعين ولا العمدة الالي مش عارف ابص ورايا خالص ..

الحرص كل الحرص انكم تلعبوا على الأجهزة والأدوات سريعة حرق السعرات .. لأن الهمة في الاول بتبقى عالية فاستغلوها صح .. ودي زي ( العجلة العادية والبيضاوية والجري السريع والحبل ) .. اما اللي هيستسهل ويقعد في الساونا ويمارس الرياضة بطراطيف صوابع رجله في أرضية الجاكوزي .. يبقى يقعد في بيته احسن وياكل زي ما هو عايز .. زيي برضه ..

لو داخلين عالحديد والتمارين بالاثقال والاجهزة .. فياريت اللعب صح عالعضلة بالطريقة اللي هيشرحهالك المدرب وبدون افتكاس .. وكمان اللعب على كل الاجهزة بالتساوي لمدة ما بين شهر لاربعين يوم ثلاث مجموعات في عشر عدات .. ده قبل التركيز اليومي على عضلة واحدة او مجموعة عضلات متلاحمة .. واللي هيتمظهر ويتمنظر ويشيل فوق طاقته .. فالشد العضلي وتمزق الاربطة جاب اتخن تخين وقعده في بيته جنب الوالده يخرط بصل ..

للناس اللي العملية هتعلى منهم وهيضخموا وينشفوا عضلاتهم .. وكمان عايزين يدخلوا عالبروتينات ( على فكرة صحية ومش مضرة لانها منزوعه من الحليب والفول .. وفيه فرق شاسع بينها وبين المنشطات ) .. المهم انصح اي حد يختار ( الواي بروتين ) بانواعه التلاتة ( الهيدروليدز ) سريع الامتصاص .. وده العضلات بتستفيد منه في اقل من ربع ساعة بعد التمرين .. او ( الايزوليتد ) وده الجسم بيمتصه في ساعة او اتنين .. او ( الكونسينتريتد ) وده الجسم بيمتصه في يوم .. واحسن شركتين هما ( اوبتيمم نيترويشين .. ومصل تيك ) .. خصوصا ( واي بروتين جولد ستاندارد ) و ( نيتروتيك ) ..

استعمال المخسسات والادوية اللي بتساعد في زيادة الحرق لازم تروحوا تسألوا عليها الدكتور او الصيدلي الاول بعد ما يقرالكم مكوناتها .. وده لاتقع الفاس في الراس وتسرح منكم عالكبد والكلى ..

اشاعات انكم هتضربوا وجسمكم هيفشول بعد ما تسيبوا التمرين بشهر .. ده كلام فتايين وهتايين مالوش اي اساس من الصحة .. لان زيكم زي غيركم هتتخنوا بحساب .. بل ان الجسم بيحتفظ بتكوينه العضلي لفترة حلوة باللذات مع الحركة ايا كانت .. والحركة بركة ..

اخيرا .. بناء الجسم بيدي ثقة غير عادية للشخص وبينشط التفكير لانه بيقتل الكسل والخمول اللي بيبهدلوا الجسم وبسرعة البرق بيطلعوا عالعقل .

طب السؤال اللولبي .. هو انت فشلت ليه ؟؟ .. ببساطة انتخت عالفيس بوك اللهي يقطعه .