الدليل الوجيز في الذبح و البهاريز ملخص الدبح والقطعيات

ملخص الدبح والقطعيات

خلاص قربنا علي العيد .. و ناس كتير هتدبح

و الاغلب بيتضحك عليه و لحمته يا بتخضر و تبوظ يا الجزار بيقطلعه ابو قرش علي ابو قرشين

و الاوحش بقي اننا بنقطع الحلو لينا و كل اللية و الدهن و الشغت بيطلع لله !! و ربنا مستغني عن كل ده

عشان كدة لازم تخليك ناصح و حويط و فاهم بتعمل ايه … هتذبح و تقف مع الجزار يبقي لازم تتخن صوتك كدة و تجيب عشرة لتر مياه سخنة و تهري الجزراين شاي … ليه بقي عشان الجزراين الشاطرين متاخدين من بدري و مش بيدبحو و يشفو اقل من ٢٥٠٠ جنيه و محترمين و مش بيشتغلو عشوائي …و انت جايب جزار ب ١٣٠٠ جنيه ماشي في الشارع زاي بوحة بيقول جزار نضيف … و رافع شريط ترمادول علي بوق واحد عشان هي سبوبة حلوة لمدة تلات تيام و عايز يفضل شغال انسان الي من غير ما ينام التلات تيام دول .. فا لازم تعمله كشف هيئة الاول و تتفق معاه من الاول علي الاتي :

قطعيات اللحوم

قوله عايز الفخدة كاملة مفتوحة من غير تقطيع قطع انت …( ايوة اسمع كلامي قطع انت ).. بيكون فيها وش فخدة.. ظهر فخدة ..عرق تربيانكو .. سمانة.. كولاتة .. وردة او ذيل كولاتة .. موزة بالعظم او اوسو بوكو بالعظم .. فرخة الموزة و اخر حاجة حتة قد كف الايد اسمها سبايدر … خدها و صمم انه يطلعها .. عشان دي الزبدة بجد

بالنسبة للكتف اغلبهم بيبقم جزراين سبوبة .. قوله عايز ستيك الكتف هو ولا عارف فلات ايرون ستيك ولا يحزنون… خده و شيله و بعد كدة وديه لحد بيفهم يشيل السليفر او الشغتة الي في النص و اعمله احلي ستيك .. عندك كمان حتة اسمها ال cold دي من اهم و احلي و اطري حتت الكتف يارب يبقي عارفها …اسمها بالمصري البوت .. عندك الدوش بقي و الدوش ابو عظم الي هو البرسكيت و الشورت ريبس خد الشورت ريبس عا المنشار بعدين من عند اي حد عنده منشار كهربا .. و الدوش هيبقي عظيم في الروست في الفرن ٨ ساعات او مفروم و امرك لله …الباقي بقي خده موزة امامية و كباب حلة … خلصنا الكتف

ندخل نجيب الرقبة .. يا متقطعة حلو يا مخلية للشوربة بالعظم و اللذي منه .. فيها حلويات خدها

كدة ده يبقي الكتف و الفخدة و الرقبة تمام

البطن او السرة فيها حتة لحمة مدورة معقولة الحجم اسمها هبرة البطن او السرة و دي الفلانك … عظيمة عا الطاسة .. و عندك حتتين لحمة طوال اووي كدة قوله عايز ورق الحجر زاي ما هما بحالهم انا هقطعهم … دول شاورما بيستو في ٥ دقايق حرفيا .. هو مش هيفهم يعني ايه نافيل و لا باقي العظمة دي معلش… خليهم يفرمهم … احلي لحمة للكفتة المشوية

ندخل عا الظهر و الريش قوله عايز عرقين الفلتو زاي ما هما قطعهم انت او خد عرق كامل و سيب التاني لو جزار شاطر شوية هيقطلعك بيت الكلاوي الي هو ال porterhouse و معاه العرق الفلتو او ذيله فيبقي ال T-bone بعد كدة عندك سريليون و ريب ايي… كبر دماغك و قوله عايز الاميرية بس ما تحفش في الدهن سيبه زاي ما هو .. دول خلاصة اللحمة و متعتها الحقيقة … عالطاسة ٧ دقايق ملح و فلفل و تمام اوووي كدة

خلصنا الظهر كله كدة باقي عندك الحلويات بكل جمالها عيش و سيبني اعيش … بس و اه من بس دي !!! في حتة لحمة بتدوب كدة اسمها اليهودية هي بتكون حتة واحدة في الذبيحة متغطية بشغت كتير قوله طلعلي اليهودية هيعرف انك فاهم و مش هيعرف يسرق حاجة يحطها في الكزولك

قد يهمك: دليلك الشامل: تعرف على كيفية اختيار الخروف الامثل للاضحية

عندك بعد كدة راس و عكاوي او ذيل .. براحتك .. ماتنساش الكلاوي و المخاصي و الممبار خليه ينظفه

كدة تبقي طلعت حتة لحمة عجب و ماضحكش عليك علي الاقل

كل ده و خلي بالك لسة في قطعيات اكتر و احلي بس لو هو طالعالك دول يبقي خير و بركة.