الترجمة الحرفية لاسم الماسونية ده هي ( البناؤون ) .. والاسم الرسمي لهم ( البناؤون الاحرار ) .. والرمز بتاعهم هو البرجل والزاوية القايمة .. فالبرجل رمز للقوة الكبرى المتمثلة في الخالق الأعظم واللي يقدر يرسم ويخطط بكل الزوايا وفي كل الاتجاهات لكن بشكل هندسي .. والزاوية القايمة رمز للقوة التبعية والمحددة بنظام واحد وهو العضو الماسوني اللي بياخد اوامره من القوة الكبرى .. واللي بينوب عن الخالق فيها العضو الماسوني الاكبر .. وده نفس تعريف نجمة داوود بعلاقة المثلثين ببعض .
المهم ان دي حركة عالمية سرية .. تاريخيا تعتبر اقدم ترابط عقائدي للاشخاص بعد الديانة اليهودية .. وكتر الفتي والهتي في تأسيسها .. ومفيش حد قدر يوصل لحاجة .. من الاقاويل ان اول مؤسس لها هو الملك ( سقنن رع ) 1560 قبل الميلاد .. وكان من أعظم ملوك مصر وهو أول من حاول يطرد الهكسوس ..
والقول التاني ان مؤسسها هو المهندس المعماري لهيكل سليمان المزعوم ( حيرام أبي ) ..
والقول الثالث ان اول من أسسها ( فرسان الهيكل ) اشهر حركة سرية في اوربا ايام الحروب الصليبية ..
واخيرا كتير من المؤرخين العرب وخصوصا المسلمين نسبوا تأسيس الماسونية للملك ( هيرودوس الكبير ) او ( هيرودوس أكريبا ) لكن قالوا انه سنة 44 ميلادية .. وهيرودوس الكبير اتولد 73 ميلادية وابنه هيرودوس الصغير بعده بـ 25 سنة .. طب نصدق مين فيكم ياولا الـ %# !!
من الاخر أي حركة سرية مبنية على الترابط والتلاحم الشديد بين افرادها بتبقى هدفها الاول والاخير ((( حكم العالم ))) .. وبتبقى شايفه انها الاصلح لده وحكمها هيخلي العالم أحسن واكثر امنا وسلاما .. والحركات والتنظيمات من دي كتيره .. أذكر منها مع الفارق الكبير في التشبيه ( الخلافة الاسلامية ) .. ( الدعوات الصليبية ) .. ( فرسان الهيكل ) .. ( الإخوان المسلمين ) .. ( الصهيونية العالمية ) .. ( داعش ) …. الخ .
لهم طبعا مقر رئيسي بيسموه ( المقر الأعظم ) في بريطانيا اللي اتأسس سنة 1717 م .. وعنوانه ( Great Queen Street 60 – London WC2B 5AZ ) و الموقع الرسمي هنا وده له رئيس وهو ( الخبير الأعظم ) .. وفيه مقرات في كل دول العالم تابعة للمقر ده .. وفيه مقرات تانية منفصلة زي المقرات اللي في كل ولاية من الولايات المتحدة .. أما المقرات في الدول العربية فهي مقرات سرية بتتغير مع الوقت عشان خايفين من العين وقر الناس .. ودهولتهم وشلوحتهم من الحكومات والأنظمة .
ولهم نوادي شهيرة بتجمعهم زي فروع نوادي ( الروتاري الدولي ) ونادي ( الأسود ) في مختلف دول العالم .. مع انكار النوادي دي رسميا انها تبع الماسونية .. وبتقول انها ما بتمنعش أي حد يمارس فيها أي نشاط .
أول كتاب معتمد لهم هو كتاب ( القوانين ) اللي الفه القسيس (جيمس أندرسون ) سنة 1723 م وده يعتبر دستور الماسونية .. وبعده بـ 11 سنة أعاد طبع الكتاب السياسي الأمريكي الكبير ( بنجامين فرانكلين ) أحد أهم مؤسسين الولايات المتحدة الامريكية .. واللي صورته منورة على ورقة الـ 100 دولار .
وبالنسبة للماسونين منهم من يعتبر سيدنا موسى هو الماسوني الاعظم تاريخا .. وشوية حاطين المسيخ الدجال .. وشوية حاطين السامري .. وهلم جرا
الاشتراك فيها زيها زي أي حركة أو حزب أو جماعة .. لازم تعرف قيادي فيها أو حتى عضو عشان تقدر تشترك وتبقى عضو زيه إما يرشحك لقيادته .. ودول بيراعوا اعضائهم اخر رعاية في غالب دول العالم لو ماشيين معاهم على نفس الخط .. المهم ان لها طقوس سرية للعضوية .. واي كلام اتقال في الطقوس دي خزعبلي .. وفيه كتير فتى في الحتة دي منهم ( قناة الجزيرة ) وعملت مشهد مصور تخيلي ان العضو الجديد بيركع للخبير الاكبر .. لكن كل الكلام مش مؤكد لأن محدش صورهم قبل كده .
المهم ان الاشتراك في الماسونية درجات .. في البداية يبقى العضو اسمه ( مبتدأ ) وبعدين حسب التقييم بيوصل لمرتبة ( أهل الصنعة ) .. وبعدين يوصل لمرتبة ( خبير ) .. وعلى المستوى العالمي يوصل لمرتبة ( الخبير الاعظم ) .. ورغم ان الماسونية واخده شهره وزخم كبير لكن درجاتها وتعقيدات التصعيد فيها اقل بكتير من تنظيمات تانية وأولهم مثلا ( الاخوان المسلمين ) الأكثر في التسلسل وفي التعقيد .. حسب كتاب الطريق الى جماعة المسلمين .
وشروط اختيار العضو في الماسونية والمنشورة في كل المقالات والصحف والكتب ( هجص ) بالمعنى الحرفي للهجص .. فالعضو الماسوني يتم اختياره بناءا على ايمانه بأسس وقواعد الماسونية وحبه لها ودرجة قربه للعضو الخبير ونظرة الخبير وثقته فيه .
بخصوص الاديان .. فالماسونية بتقبل أي دين واي معتقد ، ولا تقبل أي ملحد .. وفيه شعار في الدستور بتاعهم بيقول ( لا يمكن أن يكون الماسوني ملحداً أحمقاً ) لان الملحد في نظرهم غير منتمي ولا يمكن جعله منتمي ومتبع لأحد .. يعني هو مش مؤمن بإله هيؤمن ببشر ولا منهج ! .
في المقابل كامل الاديان والديانات السماوية والارضية بتلعن أي ماسوني وبتنفر الناس وبتكرهم فيه .. لأن اذا تعارضت مباديء الأديان دي مع أهداف عظمى ولا حتى سفلى للماسونية .. فهتلاقى الماسوني من دول ادى للدين ضهره .
لكن للأمانة والحق يتقال .. فيه أكاذيب كتير وافتراءات اكتر حملوها رجال الدين في مختلف الملل والنحل على الماسونية .. يعني لو حصل وانشقت الشمس نصين هيقولولك الماسونيين الكفرة الظلمة واتباعهم من الصهاينة .. ودول حاجة ودلم حاجة تانية خالص .. لكن ساعات بتتفق المصالح والاغراض فبيتعاونوا وبيتكاتفوا .
وعلى فكرة الماسونيين مالهمش اشارات ولا حركات ولا ملابس خاصة بيهم .. اللهم الا خاتم بياخده اللي بيوصل عندهم المرتبة الـ 33 .
وبخصوص اعضائها .. فأي حد له دخل بأي مؤامرة خفية على مر التاريخ على طول بيتهموه بانتسابه للماسونية .. اما هنا هكتب الناس اللي طلعت قالت احنا ماسونيين يا ( بني ادمين ) .. وبعدهم هكتب اللى الناس اتهموهم في شرفهم بالماسونية بدون دليل .
أولا : الماسونيين المنتسبين :
من الامريكان .. 13 رئيس لأمريكا اتصنفوا كأعضاء ماسونيين على لسانهم او بكتاباتهم .. ابرزهم ( جورج واشنطن – فرانكلين روزفيلت – هاري ترومان .. الخ )
وكتير من السياسيين وصناع القرار والأدباء .. زي صاحب شركة شاي ليبتون .. وصاحب شركة ماكينات حلاقة جيليت .. وزي المطربة مادونا .
من البريطانيين .. 4 حكام لبريطانيا وهم ( الملك جورج السادس – الملك إدوارد السابع – الملك إدوارد الثامن – رئيس الوزراء / ونستون تشرشل )
من المشاهير .. الفيلسوف الكبير / فولتير ، الكاتب الامريكي / مارك توين ، العاشق الايطالي / كازانوفا .
من العائلات .. عائلة ال روتشيلد وابنائها وأحفادها في مختلف دول العالم .
ثانيا : المتهمين بالماسونية :
الشاعر / ابو العلاء المعري ، الأمير /عبد القادر الجزائري ، الشيخ / يوسف الاسير ، الميرازا باقر ، جمال الدين الأفغاني ، الشيخ / محمد عبده ، سعد زغلول باشا ، محمد رضا بهلوي ، مصطفى كمال أتاتورك .
وعن التأثير .. لو قلت ان تأثير الماسونية ككل على الدنيا ازاي ابقى بانصب وبهذي زي ما الكل بينصب وبيهزي .. أما المنصفين بيقولوا تأثير الاشخاص المنتسبين للماسونية على العالم وبس .. طب دول زي مين بقى .. زي الناس اللي عدتهم فوق دول كلهم وناخدهم واحد واحد .
أولا : عائلة ال روتشيلد وابنائها في مختلف دول العالم :
دي قصتها كبيرة وعايزة مقاله لوحدها بس خلينا في المختصر المفيد الجديد السديد .. دي عائلة يهودية صهيونية ( تختلف اليهودية كديانة عن الصهيونية كحركة ) .. اسسها رجل الأعمال الألماني اليهودي و تاجر العملات ( ماير أمشيل روتشيلد ) سنة 1821 لما أرسل ولاده لمختلف دول اوربا القوية للاستثمار برؤوس أموال كبيرة .. وعمل مابينهم ترابط مبني على اسس الماسونية ودستورها .
العيلة دي بقت على مر العصور من اغنى اغنياء الكون ويقال ان لهم نص ثروة العالم والتحكم في اسعار الذهب والعملات ( معلومة مش مؤكدة ) .. المهم والمؤكد ان العيلة دي بتبني ثروتها على الهدم والبناء .. خد ياض ياللي بتحكم البلد الفولانية شوية الفلوس دول كقرض حسن واشتري سلاح اضرب الدولة العلانية .. يقوم ضاربها .. يقوموا رايحين عالدولة التانية وخد ياد ياحاكم البلد انت خد شوية الفلوس دي كقرض حسن ابني بيها دولتك اللي اتخربت .. وهكذا فبقت ميزانيات دول مرهونة للعيلة دي .
والامثلة من دي كتير من ايام تمويلهم لجيش نابليون بـ 100 مليون جنيه استرليني .. وتمويل الحرب اليابانية الروسية من الجانبين .. وضرب مصر واعادة اعمارها ايام الملوك العلويين .. ورشوة المسئولين لتمرير وعد بلفور باقامة دولة اسرائيل .. وكمان تمويل الهجرة الجماعية لليهود للاراضي الفلسطينية .. ودلوقتي فضلة خيركم تملك العائلة قلوب وعقول الساسة الكبار الامريكان والاوربيين وكتير من العرب .. بطريق مباشر زي الفلوس والمشاريع والقروض .. وبطريق غير مباشر بالضغط الاعلامي والصحفى اللي تمتلكه بأعاجيب الاعاجيب .
ثانيا : الرؤساء الامريكان الثلاثة :
واللي حطيت اساميهم من الـ 13 اسم لحكام امريكا اللي اعترفوا بنفس ذات نفسيتهم انهم ماسونيين .. وهم ( جورج واشنطن – فرانكلين روزفيلت – هاري ترومان ) دول يعتبروا من الاشد تأثيرا في التاريخ الانساني .. وجعل امريكا قوة أحادية القطب في كوكب الارض .. والمهيمنة على شعوب ودول .. يعني مثلا ( جورج واشنطن ) هو اللي قاد حرب التحرير اللي انفصلت فيه امريكا عن تبعيتها لبريطانيا ..
و (فرانكلين روزفيلت ) هو اللي خلى امريكا تدخل الحرب العالمية الثانية .. وتعديل كفة المكاسب لهتلر وحلفائه لخسائر فادحة انتهت بخسارته .. و( هاري ترومان ) اللي ضرب اليابان بالقنبلتين الذريتين وانهى الحرب العالمية الثانية .. وعمل بعدها ( مبادرة ترومان ) و (خطة مارشال) اللي اشترت بيهم امريكا دول اوربا واليابان .. واللي الى الان كلهم في جيب امريكا في التحالفات الدولية والعسكرية الموقعة من ايام عمنا الحاج ده .
وكل المشاهير اللي تم ذكرهم لهم اعمال هدفها تقوية انتمائهم للماسونية وتدعيم اركانها .. فهي بالنسبة لهم الام التي تحتوي ابنائها – وهذا ما كان ويكون بالمال .. والحرب .. والسلام .. واي وسيلة اخرى – وبيعتبروا ان الوفاء لها من اهم الاسباب لحياتهم وبقائهم .. فبالتالي محدش منهم بيتراجع عن أي قرار يتصاغ أو هدف يتخطط له .. حتى ولو ضرب الارض بقنبلة هيدروجينية تفلقها نصين .
في الادب الشعبي العربي والمصري بقى .. طبعا بما اننا شعوب – اغلبنا – بتوع حكاوي القهاوي وقعدات المساطب اللي روادها قاعدين عليها يلقحوا عاللي رايح واللي جاي كلام .. فهتلاقي أي حد عمل حاجة في أي حته من هدم ولا بناء .. وخالف بيها الناس دي .. فيقوموا قايلين ( الماسونية العالمية ) .. او جملة وتفصيل بقى وبعد نفس طويل وشهقة أطول .. يقولك ( الاخوا صهيو ماسو أمريكية ) طب ايه اللي جاب القلعة جنب البحر .. ارتقوا .. واعرفوا اعدائكم صح .. عشان تعرفوا تحاربوهم صح !
اخيرا :
الماسونية حركة باطنية خفية .. المعلن عنها اقل بكتير من المخفي ومعظم الباحثين فيها بنوا كلامهم على تكهنات .. فحبيت اجيب هنا اللي يتفق مع بعضه والشاذ رميته ورا ضهري .
الماسونية كل الاديان بتحاربها .. والحكومات والدول بتجرمها من دلوقتي وقبل كده وقبل قبل كده وبتبهدل افرادها .. وطلع عليها كلام كتير زي الرموز والشفرات والمراسم والطقوس لم يذكرها ماسوني واحد من المعترفين بماسونيته .. المهم ان الحركات اللي زي دي بتلغي العقل وراها في سبيل تكاتف وهمي .. بيزول اول ما تبتدي تشغل مخك وما تخالفش ضميرك ..
فالابتعاد عنها أولى من التجربة أو الانتماء .. فالدين والمعتقد هو الاولى يليه مكارم الاخلاق والاهداف المحددة بغايات سامية تصلح للفرد والدولة .. مش لكيان او لتنظيم ضيق .
