عشان نعرف ازاي نشتري خروف العيد لازم نعرف حاجات كتير ابسطها سلالات الخرفان الي في مصر .. انواع العلف ايه سواء برسيم .. دريس .. ذرة.. فريك .. عدس اصفر .. علفة مصنعة .. تفل زيتون .. حبة بركة .. الي اخره.
بيعيش ازاي .. بيستحمي ولا لأ بيعامل بأدمية ولا لأ بيذبح اصلا بأدمية ولا لأ.. كل الحاجات دي الي تخليك تاخد خروف محترم في العيد يطلع اضحية تليق بالمنسك الشريف ده.
تعالو نشوف انواع الخرفان في مصر ايه الاول.
انواع الخرفان في مصر
اوسيمي و رحماني و برقي و فلاحي و صعيدي و عبيدي و سوهاجي اشهرهم طبعا الاوسيمي و الرحماني (و احلاهم بالنسبالي علي الاقل ) البرقي الي بيعيش علي طول خط الساحل و الضبعة و مرسي مطروح و بيتغذي علي اكل الصحرا الي بيطلع رباني و بيميزه ليته الصغيرة و فروته البسيطة و دهونه القليلة و طعمه الجميل الي بيستوي بسرعة و تصفيته لحوالي خمسة و خمسين من وزنه لحم صافي مقارنة بغيره من السلالات بس عيبه انه مش حلو في الشوي نظرا لقلة دهونه لكن ممتاز في السلق و الفرن.
قد يهمك: الدليل الوجيز في الذبح و البهاريز ملخص الدبح والقطعيات
موصفات خروف العيد
- اول نقطة لما تروح تشتري خروف بلاش تشتري من مصدر مجهول او من عند جزار أو شادر في الشارع عشان دول ممكن يكونو بياكلو الخروف اي حاجة فبالتالي هيبقي الطعم اي حاجة .. اشتريه احسن من مزرعة عشان بيكون فيها متخصص في تسمين وتحضير الاعلاف لأن ده بتكون نتيجته لحم اطعم و جودة أعلى وافضل في الطعم ، وملهاش ريحة وحشة.
- عند الاضحية الشرعية الخرفان عمرها ما ينفعش يقل عن ست شهور و الجديان سنة و البقر عن سنتين و الجمال عن خمس سنين و يكون الخروف ذكر املح اقرن (قوي و عنده قرون )
- الخروف لازم يكون مفرود القامة مش ماططي.
- ميكنش هزيل وضعيف و يكون بيقبل علي العلف مش بينفر منه اقباله علي العلف من ادباره عنه بتمثل حالته الصحية.
- لزم تكون حالة العيون صحية .. لا فيها احمرار أو مطفية .. تكون بيضة براقة مش مدمع او معمص او في افرازات حوالين العين.
- نفسه سهل و منتظم و من غير افرازات او مخاط.
- الخروف يكون منتبه و مصحصح لو شديته من وسط القطيع تلاقي منه مقاومة و رجوع سريع للقطيع .. المستسلم الضعيف ده بيكون مريض.
- حالة الفروة لزم تكون نظيفة و بدون شوائب او حشرات.
- لازم تكشف علي حالة الاسنان عشان بتدل علي العمر و الصحة لو الاسنان في طول واحد وحجم واحد ده بيدل علي ان سن الخروف لسة صغير و لو لون الأسنان ابيض مش مبقع او مكسرة ،لو العكس من اختلاف حجم الاسنان وطول وتناسق صف الاسنان فده يدل ان خروف بداء بيسنن و انه ابتدي يكبر. الي عنده سنة بيكون عنده 8 ضروس لبنية و لو عدي السنة للسنة و نصف بيكون عنده ضرسين كبار في النص و الباقي حواليه ضروس لبنية.
- الخروف فيه لحمة ولا لأ ايوة في خرفان ضعيفة او عيانة بتبقي خالية من اللحم … حط ايدك علي ظهر الخروف و لو عرفت توصل او تمسك العمود الفقري يبقي الخروف ما بيكولش لمرض او لقلة العلف. لكن لو كان سمين و مش عارف توصل للعظم يبقي هو محمل لحم كويس.
- لية الخروف لزم متعديش مستوي الركبة و بالذات لو بلدي او فلاحي ..و الخروف البرقي ليته صغيرة اصلا.
- لو بطن الخروف مش متناسقة مع جسمه و تحسها اكبر او منفوخة ده غش تجاري الخروف بيكون شارب مياه بملح لحد ما يتنفخ عشان يتقل و يوزن علي الميزان … سيبه و امشي.
دي اهم حاجات في موصفات الخرفان عموما و في موصفات خروف العيد بالأخص كل سنة و حضراتكم طيبين.
