الانترنت الخفي || الديب ويب || الانترنت المظلم ….. ليه؟ وفين؟ وامتى؟ وازاي؟

من الحاجات اللي أغلبنا مخدوع فيها هو مصطلح “Deep Web” (أو الإنترنت الخفي)، و بقى لنا فترة كبيرة بنسمع أساطير و خُرافات عن ناس دخلوا الـDeep Web و جهاز الكمبيوتر بتاعهم فرقع، أو الموبايل طَلَّع دخان و حاجات جميلة خالص… تفتكر إيه هو الـDeep Web دا يا جناب العمدة؟! 😃

شوف يا سيدى… الـDeep Web أو الإنترنت الخفي دا هو الجزء من الإنترنت اللي مابتقدرش محركات البحث توصل له و تأرشفه؛ أو بمعنى تاني ماينفعش تفتح محرك بحث زي Google و توصل للصفحات دى من خلاله؛

لأن الصفحات اللي فى الـDeep Web مكتوبة ببروتوكولات مختلفة عن صفحة الإنترنت اللي انت بتقرأ عليها البوست دا؛ مواقع و صفحات الإنترنت اللي محركات البحث بتوصل لها بتكون مكتوبة ببروتوكول HTTP أو HTTPS فى الغالب؛ بينما صفحات الديب ويب بتكون تبع بروتوكولات مختلفة زي Onion و غيرها؛ و بالتالي محركات البحث مابتقدرش توصل لها…

– طيب إيه حقيقة محتوى الديب ويب و إن كله تجارة أعضاء و سلاح و قَتَلَة مأجورين و الكلام دا؟! 

موسيقى تصويرية مُريبة فى الخلفية 😃

بص… الديب ويب فعلًا فيه مواقع الحاجات دى بتتباع و بتتشرى عليها (حاجات كدة زي OLX و eBay اللي نعرفهم، لكن بأسماء تانية)، و مش عارف هتتفاجئ ولا لأ لما تعرف إن كميات كبيرة من المخدرات اللي بتُتَداوَل فى أمريكا و أوروبا، و أسلحة كتير من اللي اتعمل بيها عمليات إرهابية فى الفترة الأخيرة اتشرت بالفعل من الديب ويب، و الجزء دا من عالم الـDeep Web اسمه Dark Web.

لكن دا مش معناه خالص إن الـDeep Web كله عبارة عن Dark Web و تجارة سلاح و مخدرات بس؛ لأن جزء كبير جدًا من الـDeep Web بيتكون من قواعد بيانات، و بيانات مسموح لأشخاص معينين بس الاطلاع عليها لأهميتها، و شبكات خاصة مش مسموح لأي حد إنه يدخلها، و صفحات مش مرتبطة بمواقع إنترنت مشهورة لأي سبب كان، و صفحات بتشتغل على متصفحات إنترنت معينة زي Tor و I2P!!

طيب ما يقفلوا الديب ويب!!

الموضوع مش بالسهولة اللى انت متخيلها؛ بالإضافة لإن الـDark Web بيمثل نسبة بسيطة جدًا من محتوى الـDeep Web؛ دا بالإضافة لإن كل التعاملات اللى بتتم على مواقع الـDeep Web بتكون بأسماء مستعارة، و هوية الأشخاص اللى بتتعامل معاهم بيكون صعب جدًا الوصول ليه؛

لأن حتى المعاملات المالية بيستخدموا فيها عُملات افتراضية، أشهرها و أقدمها عُملَة اسمها Bitcoin، و العملات دى كلها بتديك إمكانية إجراء معاملات نقدية من غير الرجوع لبَنك أو استخدام Visa أو أي حاجة تحفظ هويتك (معلومات أكتر عن الـBitcoin فى الكومنتات)

عاوز كمان أقول لك إن الوصول للمجرمين المُدانين فى قضايا على الـDeep Web يُعتَبَر مستحيل بالطُرُق التقليدية اللى بتستخدمها الأجهزة الأمنية علشان تجيب واحد زي معاليك، و فى أغلب الأحيان بيستخدموا محققين محترفين علشان يستدرجوا المجرم اللى بيتعامل معاهم لارتكاب أي غلطة يصطادوه منها أو يستدرجوه للإفصاح عن هويته… بقول لك الموضوع صعب! 😀

– طيب أنا لو عاوز أوصل للديب ويب دا أعمل إيه؟

أنا شخصيًا مانصحكش تحاول فى الموضوع دا؛ لأن استخدام Deep Web ممنوع فى دول كتير، و لازم تكون عندك خبرة كبيرة فى الاختراق، و لازم تعرف تأمن نفسك و تخفى بياناتك كويس؛ لأن لو أي جهة اكتشفت هويتك أو قفشوك بتحاول توصل لبيانات سرية هتتنفخ… حرفيًا هتتنفخ، و ممكن الموضوع يوصل للـFBI و الـInterPol… مش بقول لك هتتنفخ؟! 😃

لكن من باب العِلم بالشىء، أشهر المتصفحات اللى بتديك إمكانية الدخول لصفحات الـDeep Web متصفح Tor و I2P، لكن الأشهر هو Tor؛ و دا لأنه بيستخدم طريقة ظريفة لإخفاء بيانات الناس اللى بيستخدموه؛

وده بيتم عن طريق إنه بيبعت البيانات متشفرة من الكمبيوتر بتاعك لسيرفر فى أي دولة، و بيتم فك جزء من الشفرة دى لما البيانات توصل السيرفر دا علشان يبعتها لسيرفر تاني، و السيرفر التاني يفك جزء من الشفرة و يبعتها لسيرفر تالت، بس من غير ما يعرف المكان اللى البيانات جت منه قبل السيرفر الأول، و هكذا البيانات تفضل تتنطط من سيرفر للتاني و كل سيرفر مايعرفش البيانات دى جت منين لغاية ما توصل للمكان اللى هى رايحاه! 😀

طيب ما يقفلوا Tor و I2P!

انت عاوز تقفل أي حاجة و خلاص؟! 😂

المتصفحات دى يا سيدى الهدف الأول منها مساعدة الناس المُضطَهَدين سياسيًا أو عِرقيًا فى العالم كله إنهم يتواصلوا مع بعض و مع العالم الخارجي من غير ما يتم تتبعهم من الأنظمة الاستبدادية اللى بتحاربهم؛ و بالتالي هدفهم مش تشجيع تجارة السلاح ولا حاجة، و كدة كدة أصلًا بيهم أو من غيرهم هتفضل تجارة الممنوعات شغالة على الـDeep Web عادي جدًا 😀 

طيب علشان إحنا لَكِّينا كتير… تعال ناخد الخلاصة  😀

الـ”ديب ويب ” هو الجزء اللى مابتقدرش محركات البحث إنها توصل له و تأرشفه، و بيكون كل الناس اللى عليه بهَوِيَّة مُستَعارة؛ لأن لو حد منهم اتمسك هايتعمل معاه الجُلَّاشة 😂

الـDeep Web اتعمل أصلًا علشان يساعد الناس المُضطَهَدين و ييوفر للناس دول طريقة آمنة للاتصال بالإنترنت بعيد عن أعيُن الحكومات اللى عاوزة تعمل معاهم الجُلّاشة برضو 😃

إياك تدخل على صفحات الـDeep Web إلا لو كُنت شخص مُحتَرِف و تقدر تأَمِّن بيانات كويس جدًا، و لو حصل إياك تدى إيميلات أو أرقام تليفونات أو عناوين لحد، و إياك تحاول تحمل أي ملف أو تفتح لينك مهما كان وإلا هاتتمسك و يتعمل معاك الجُلَّاشة انت كمان 😃

للمزيد من المعلومات حول الانترنت الخفي من موسوعة المعلومات ويكيبيديا