الحرب العالمية الثالثة : ( سيناريوهات محتملة )

” إن وجود الظلم في أی مكان … يهدد العدل في كل مكان ” مارتن لوثر كينج .

يسلم فمك ياعم الحاج

ومن هنا نبتدي احتمالات الحرب العالمية الثالثة واللي مبنيه أساسا على ” ظلم الأقوياء للضعفاء ” … فبييجي في ديلها … ” ثورة الضعفاء عالاقوياء ” .

أولا : سوريا .

أطراف الحرب المتوقعة : 

– الطرف الاول :

( أمريكا وحلفائها بالناتو الكام وعشرين وهم اقوى دول أوربا + اسرائيل + غالب الدول العربية + شوية دول فيهم قواعد امريكية وهم كتير اوي الصراحة )

– الطرف الثاني :

( روسيا + الصين + ايران + كوريا الشمالية + شوية دول صغيرة لها ميول شيوعية + دول دعم لوجستي وهم قلوا اوي من بعد سقوط الاتحاد السوفييتي بس روسيا بتحاول رغم اقتصادها الواقع )

طيب إيه الموضوع ؟ …

الموضوع في سوريا بدايته ماكانتش مع دخول قوى التحالف ضد داعش واللي على راسهم أمريكا .. لأ الموضوع ابتدى من أول شرارة ثورة ضد نظام بشار وحزب البعث السوري ، وعشان نفهم اللعبة نركز سوا .

حزب البعث السوري الحاكم هو كيان سياسي .. شيعي المذهب .. علوي الطائفة .. شيوعي اشتراكي الهوية ، يعني من الاخر لو عطس ولا كح هترد ايران وتقول يرحمكم الله ياحبيب قلبي ، وروسيا هتجري على اقرب اجزخانة تجيب الدوا .

من بداية الثورة في سوريا والنظام السوري عرف يغير مسار القضية من رغبة الشعب في اسقاط نظام عاف عليه الزمن لمسار تاني وهو ( الارهاب الاسلامي السني ) اللي عايز يحكم سوريا – كما دعواهم – فاتحولت القضية لحرب وجود ، بين القوى الشيعية زي ايران والشيوعية زي روسيا والمقابل لها القوى الاسلامية بمختلف طوائفها بداية من اقلهم تشددا زي الجيش الحر وأعلاهم تشددا زي داعش .

لما كانت المواجهة في البدايات بين جيش بشار وبين الجيش الحر كانت الحرب هناك بالوكالة فقط بين الدول ، يعني دعم لوجستي وتزويد بالمال والسلاح لكل طرف ، دول الخليج وامريكا بيدوا للجيش الحر ، وايران وروسيا وحزب الله الشيعي بيدوا بشار ، لحاااااد ما دخلت جبهة النصرة ومن بعدهم داعش فاتقلبت الموازين ، وكان لازم الكل يدخل بتقله لانها زي ما قلنا قبل كده داعش هيمنت على تلتين سوريا كأراضي وهو مالم يتم لأي جماعة ارهابية في التاريخ الا من بعيد لبعيد زي القاعدة وطالبان في افغانستان .

امريكا لمت ناسها وخلت قضيتها محاربة داعش ، لكن الضربات كانت بتمحي وجود اي هيمنة لبشار على الارض ، وكان المفروض الجيش الحر هو اللي ياخد مكان جيش بشار وداعش .. بس البقاء للأقوى خلت داعش هي اللي تهيمن على اراضي اكتر بأسلوب حرب العصابات ، اضربني هنا وانا اطلعلك هناك ، وكمان كان فيه كلام ان امريكا اصلا مسهله لداعش لضرب بشار – بس الكلام ده ملوش وثائق – فروسيا ماعجبهاش الوضع فقالت يالله بينا برضه نضرب داعش ، ودخلت على حذر شديد لسوريا ، بالطيرات وبعض قواعد الصورايخ وتزويد جيش بشار والجيش الايراني وحزب الله اللي بيحاربوا بري في سوريا بالاسلحة .

طب ليه روسيا داخلة بحذر ، لان الغلطة المش مقصودة من روسيا ضد اي الية عسكرية امريكية هتكلفها الجلد والسقط ، يعني ياروسيا انتي داخله تضربي بصي وركزي اوي بتضربي فين ، اي حد هايتضرر تبعي هاحط عليكي بالقوي ، وروسيا داخله الموضوع لإعادة حلم القوتين القطبيتين في العالم امريكا وروسيا ،

بس حقيقة لحد دلوقتي مفيش اي ارقام بتقول كده ، لكن لو الاسد له انياب وحوافر.. فالعقرب يقدر يقتله بلسعة ، فروسيا عندها عدد قنابل نووية اكتر من المعلن عند امريكا وعندها قنبلة القيصر الهيدروجينية واللي جربتها قبل كده في الستينات واللي قوتها قد قنبلة هيروشيما 3000 مرة !!! ، لكن بلاش نتكلم عن النووي لان بيبقى الكل فيه خسران .

بالرغم ان الامور رسيت على شوية إجراءات اقتصادية من روسيا ضد تركيا بعد اسقاط الطيارة الروسية ، لكن الرماد تحته جمر مولع ، خصوصا وان كبرياء روسيا انكسر من بعد ما لقت ان امريكا والناتو وغالب الاتحاد الاوربي واقف جنب تركيا في الموضوع ده وكذبوا فعليا رواية روسيا عن الطيارة انها مادخلتش تركيا .

ليه بقى سوريا تعتبر اكبر سبب لدخول العالم في حرب تأتي على الاخضر واليابس ؟ ، عشان امريكا وروسيا مابيحبوش بعض ، واسرائيل وايران مابيحبوش بعض ، ودول الخليج من ناحية وبشار وايران وحزب الله من ناحية تانية مابيحبوش بعض ، ودول العالم كلها مابتبحبش داعش ، وتركيا وفرنسا دخلوا اللعبة من وسع ، والواد بتاع كوريا مابيحبش امريكا .. فأي غلطة هتحصل لحد جوا سوريا من العالم دولم هيدفع تمنها اللي عملها والتحالفات تشتغل والكل يضرب في كله ، وممكن الحكاية تجيب نووي معاها .. وربنا يستر .

ثانيا : الهند وباكستان 

أطراف الحرب المتوقعة : 

– الطرف الاول :

( الهند ومن وراها أمريكا )

– الطرف الثاني :

( باكستان ومن وراها الصين )

الأختين العدوتين ، هم كحضارتين مش واحدة ، دي اسمها بلاد الهند ، والتانية اسمها بلاد السند ، لكن على مر العصور كان اللي بيحكم دي بيحكم دي ، لحد ما عمنا غاندي قام بثورة الملح هو وواحد صاحبه اسمه احمد علي جناح واستقلوا بالمنطقة دي عن التاج البريطاني اللي حكمها كذا مية سنة باسم الهند الشرقية ، ولما استقلوا أحمد علي جناج ماعجبتوش اللعبة ان هندوسي يحكم ، فغاندي قالوا طب تعالى أحكم أنت فقال لا ياعم الحج انا هاخد منطقة السند واللي ولايتها كلها مسلمين وهاعمل بيهم جمهورية جديدة وهاسميها ( باكستان ) يعني الأرض الطاهرة وقام واخد معاه عدد كبير من مسلمين الهند نفسها و على الجنب التاني الهندوس اللي في باكستان راحوا الهند الا قليلا .

طب لحد كده كويس .. امال ايه اللي حصل ؟

فيه منطقة اسمها كشمير لما الهند وباكستان انفصلوا بقت نصها في الهند ونصها في باكستان ، وكشمير دي لو تشوفوا صورها تقولوا جنة الله في الارض ، المهم ان معظم اهل البلد دي مسلمين ، فبالتالي الجزء بتاع الهند عايز ينفصل عنها وينضم لباكستان فقامت ثلاث حروب بين الهند وباكستان سنة ( 1947 – 1967 – 1971 ) وفيه مناوشات تانية سنة 1999 بس ماكانتش اوي ، ومن بعد الحروب دي أهل كشمير والمنظمات اللي فيها حرموا يفكروا ينضموا لحد وعايزين حكم ذاتي ، فمحطوط عليهم من الدولتين .. بس باكستان بتراضي منهم ناس على حساب ناس .

اول السنة دي حصل انفجارات في مراكز شرطة هندية عملوها كشميريين ، الهند اكتشفت انهم مأجورين من الحكومة الباكستانية رأسا ، فضربوا نار على بعض عالحدود ، وساعتها بانت انياب القوى العظمى ، امريكا ايدت موقف الهند .. والصين ايدت موقف باكستان .. والدولتين عندهم نووي لكن الجيش والتسليح في صالح الهند ، فلو فكرت تخش بغشومية على باكستان ، فباكستان هتضربها بنووي وكذا مسئول باكستاني هدد بالحكاية دي … وبرضه ربنا يستر .

ثالثا : الصين واليابان

أطراف الحرب المتوقعة :

– الطرف الأول :

( أمريكا واليابان وحلفائهم )

– الطرف الثاني :

( الصين وحلفائها )

فيه بحر يعتبر اكبر بحر في العالم كمساحة موجود جنوب غرب الصين اسمه ( بحر جنوب الصين ) .. فيه تقارير رسمية بتقول ان البحر ده فيه نص حركة التجارة العالمية بدون منازع ، والبحر ده فيه مجموعة جزر متنازع عليها بين الصين من ناحية واليابان وفيتنام والفلبين واللي بتساندهم امريكا قلبا وقالبا من ناحية تانية ، الجزر اساسا كانت بتاعة الصين لكن اليابان خدت شوية وفيتنام والفلبين شوية .

فطبعا بيتحكموا فحركة السفن عشان الاتفاقيات الدولية للحدود البحرية بالرغم ان بعض الجزر دي عبارة عن كام صخرة فوق بعض قد كده ومفيهومش سكان ، وموضوع نزاع الملكية عليهم اطول من انه يتحكي لكن دلوقتي الصين اما ربنا خد بيدها شوية ولقت اقتصادها كبر وقوتها العسكرية اتضخمت فصوتها علي ، وبقت بتشتم ، واليابان بترد عليها الشتيمة ، وأمريكا من ورا ضهرها ، وفيه عمليات جوية هجوم ودفاع في المنطقة دي بقالها فترة من طيران امريكي وصيني ، وطبعا روسيا مش هتسيب الصين الحليف الاول لها عالميا لو دخلت في حرب .. وبرضه ربنا يستر.

رابعا : روسيا و أوكرانيا

أطراف الحرب المتوقعة :

– الطرف الأول :

(روسيا وحلفائها )

– الطرف الثاني :

( اوكرانيا وأمريكا والناتو والاتحاد الاوربي )

اوكرانيا كانت دولة مستقلة لحد ماجه ستالين رئيس الاتحاد السوفييتي وضمها له ، بعد كده خدت اوكرانيا حكم ذاتي بعد انهيار الاتحاد السوفييتي وبقت جمهورية مستقلة ، لكن في نتفة حتة بلد شبة جزيرة تحت اوكرانيا بمثابة محافظة يعني اعلنت استقلالها عن اوكرانيا وبقت زي دولة واسمها ( دولة القرم ) ، بعد كده ضمتها اوكرانيا تاني باتفاقية بينها وبين روسيا وعلى راسها الامم المتحدة نظير تسليم النووي اللي فيها لهم …

اه أوكرانيا دي بتاعة مفاعل تشرنوبل اللي اتفستك قبل كده ، بس برضه فضلت الحكومات الاوكرانية تيجي تأييد روسيا وتحس انهم ولادها .

جت بعد كده ثورة اوكرانيا في 2014 وشالوا الحاكم اللي ميوله كلها روسية وحطوا واحد بداله ميوله قومية لهم ، فالكلام ده معجبش اهل اقليم القرم اللي معظمهم روس اساسا ، وكمان ماعجبش روسيا ، عملوا مظاهرات عايزين ينفصلوا قامت الشرطة حطت عليهم ، فجه الرئيس الاوكراني صابب الزيت عالنار وقال ان اللغة الاوكرانية هي الرسمية للدولة ، فالناس اللي بتتكلم روسي في اقلبم القرم ولعت ، وبوتين راح باعتلهم قوة عسكرية واعلنوا شبه انفصال بعد استفتاء على انضمامهم لروسيا وكمان بوتين حاول يوقع الحكومة الاوكرانية الثورية كمان عشان ترجع اوكرانيا لحضن روسيا من جديد .

الكلام ده ماعجبش اوباما وطلع قال بالحرف ان الموضوع ده مش هاخليه يمر كده ، وراح مولع الاتحاد الاوربي وعلى راسه بريطانيا وخلاهم يفرضوا عقوبات اقتصادية وتوقيف العلاقات العسكرية بينهم وبين روسيا ، وروسيا اساسا مفروض عليها الموضوع ده من زمن ، وراح كمان رئيس الورزاء التركي اوغلوا طلع قال احنا مع السيادة الاوكرانية قلبا وقالبا وضد اي تحرك لبوتين ( شايلهالهم هو لحد دلوقتي ) .

فبوتين عمال يضغط بكل اوراق اللعب من ساعتها عشان يشيل الحظر الاقتصادي الامريكي الاوربي من عليه .. بالمناهده والمطاطية شوية وحضور مؤتمراتهم وتاييد قرراتهم على مضض .. أو باللعبة العسكرية في سوريا وفرض مبدأ القوة شوية ، لكن برضه العملية مش نافعة ، وروسيا بتغلي من الموضوع ده وطبعا عمرها ماهتسيب القرم ، وأمريكا وحلفائها لها بالمرصاد ، فاي حركة غباوة من بوتين في اوكرانيا هتلاقي ببساطة الدنيا ولعت والتخالفات اشتغلت وعد الجثث .. وربنا يستر علينا وعليكم .

وأخيرا :

فيه توقعين ميتافيزيقيين لبعض الناس ، أولهم ان ممكن دولة كبيرة تتبنى داعش وتعلنها عالملأ وتحارب بيها العالم ، وتانيهم ان الواد بتاع كوريا الشمالية هييجي مره يصحى من النوم ويفرك في عنيه يلاقي نفسه متضايق يقوم خابط الساحل الغربي لامريكي بصاروخ نووي مدمره وتقوم الحرب العالمية التانية !

ومعلش الموضوع طويل … لكن كله تكهنات وتوقعات مرئية مبنية على حقائق ملموسة .