بعد ٣٥ سنة أكتشفت أنى معرفتش اربى
النهاردة كانت الحلقة الأخيرة من مسلسل ” أبنائى الأعزاء…. شكراً” على قناتى المفضلة … قناة ماسبيرو
الحلقة دى كل ما بتيجى و أتفرج عليها ، كأنى بتفرج عليها لأول مرة، نفس الاهتمام ، نفس الإحساس، نفس الانفعالات
بعتبر الحلقة دى مرجع تربوى ، فيها دروس و معانى ماشى مع كل جيل للآباء..
مشاكل تربوية معقدة
مر كام جيل لآباءو أمهات من وقت هذا المسلسل سنة ١٩٧٩ حتى الآن
و لسه بنعانى من نفس المشكلة هيه هيه بل يمكن بتزيد من سيىء لأسوأ و هى:
- اعتمادية الأبناء الكاملة على الآباء
- عدم قدرتهم على مواجهة مشاكلهم و تحديات الحياة بنفسهم .. حتى بعد ما يكبروا و يستقلوا بحياتهم و يكون عندهم أسرة و أولاد.
الحلقة الأخيرة من مسلسل ” أبنائى الأعزاء…. شكراً”
فى الصورة
عم عبد الحميد ( بابا عبده) أخيراً بعد ٣٥ سنة أخد موقف من أولاده … عشان يعلمهم يواجهوا و يحلوا مشاكلهم بنفسهم
بعد ما فضل سنين يعمل لهم كل حاجة و سعيد باعتمادهم عليه…..
عرف انه كان بيربى غلط ، لما شاف كل واحد فيهم عايش غلط فى غلط … ومش عارفين يواجهوا الفشل اللى في حياتهم و انهاروا مع أول امتحان فى الحياة مش فى المدرسة
فضلوا ناسينه و متجاهلينه طول ما حياتهم ماشية زى ما هم عايزين … و افتكروا يرجعوا له لما واجهوا أزمات عشان هو يشيل و يحل زى زمان.
قد يهمك: تعرف على قصة “الكاهن والشيطان” لفيودور دوستويفسكي
أخطاء تربوية تقع فيها الأباء
الكلام اللى قالوا فرج أخو عبد الحميد لعبد الحميد
كلام مهم جداً … قاله
- ” أنت اللى عزلتهم عن الناس عشان يركزوا فى مذاكرتهم و بس، انت اللى معلمتهمش يجاملوا و لا يقفوا جنب بعض وقت الشدة، أنت بتحصد النهاردة اللى زرعته يا عبد الحميد من ٣٥ سنة لغاية دلوقتى”
- الافراط فى تلبية طلبات اولادنا بدون حساب
- ثقافة هات هات هات
- اتفضل يا حبيبى عشان ما تكنش محروم و لا أقل من حد
ثقافة عايزين نعمل زى ما كل الناس بتعمل و نمشى ورا القطيع و احنا مش عارفين رايحين على فين و ليه
هتوصل لنا لمصير بابا عبده،
بس الحياة مش زى الدراما اللى عايزة تفرح المشاهدين
و يكون دايماً فى happy ending
و كله يبقى تمام و زى الفل فى المشهد الأخير
و كلنا نتعلم و نبقى حلوين
لأن فى الواقع فى ناس عملوا زى بابا عبده مع اولادهم
و بيعانوا من مشاهد تراجيدى مع أولادهم فى الكبر
لا هم انصلح حالهم و قدروا و لا اهلهم قدروا يعيدوا تربيتهم من جديد
تدريب مهم
ابحثوا عن الحلقة الأخيرة من المسلسل على اليوتيوب
اتفرجوا عليها بعمق و تركيز
و ركزوا على الكلام اللى جه على لسان
– صفاء
– إيناس
– فرج
قيموا تربيتكم لأولادكم و أسألوا نفسكم الاسئلة التالية
– لأى درجة اولادى معتمدين عليه؟
– هل بيقدروا اللى بعمله؟
– هل علمتهم و بيعملوا فعل خد زى هات ؟
– هل لو بطلت ادى لأنى مش قادر … هيكونوا جنبى و سندى؟
– لو كبرت و احتجت لهم هل عارفين ممكن ازاى يكونوا العون و الدعم و يطبقوا البر؟
هل فاهمين الحياة و الناس وراء جدران الييت؟
