الحلم الأمريكي بعيون مصرية .. ( الحلقة الأولى )

للساعين للهجرة إلى أمريكا .. دي 3 موضوعات هحكي فيها عن طرق الاستقرار في امريكا وملابسات ومواقف المعيشة فيها .. فتابعوني ..

في يوم من الايام خبط على باب بيتنا شاب وسيم كله حماس وحيوية واتقدم يطلب ايدي من بابا .. الشاب كان شغال معيد في الجامعة وكان عنده طموح يكمل دراسته في امريكا وعاوز يخدني معاه .. عرض عليا اننا نتجوز في مصر ويسافر هو ويبعت لي اجي وراه .. لكن بصراحة خفت ليحصل حاجة تعطله هناك واستناه كتير في مصر .. فقلت لأ نكتب الكتاب بس وندخل في امريكا .. وقد كان لي ما أردت ( فرضت سيطرتي الانثوية الجبارة ) .

احنا كده مسافرين أمريكا من 25 سنة تقريبا .. ( يعني تأبيده يعني ) .. في الاول جوزي سافر على حسابه بدون منحة او بعثة على حساب الدولة .. لان مووايلها طويلة ومش الكل بيفوز بيها .. ولما وصل لأمريكا قدم على منحة في الجامعة نفسها – ودي سهلة – وكمل دراسته على حساب امريكا ( وهي ده المصري الصميم اللي ما بتقفش قدامه حاجة ) .. وكمان الجامعة بقت تديله فلوس نظير اتعابه في تجارب وابحاث موازية لدراسته خلتنا نعيش كويس بيهم والحمد لله ورضا .

للناس اللي بتسأل عن دخول امريكا والاستقرار بيها .. هو الصراحة الموضوع مش صعب لان امريكا نفسها عايزه ناس في المساحة الكبيرة اللي مفيهاش ناس .. لكن بصورة شرعية ويكونوا مقيمين كويسين .. فلازم يكون عندكم علم ازاي تييجوا وازي تقيموا بشكل شرعي .. وده الطرق بتاعته كتير الصراحة .. وهعددلكم الطرق بشكل سريع وانتم كملوا بحث عنهم :

أضمن طريقة للاقامة الدايمة هو ( اللوتري الامريكي ) او القرعة الامريكية ودي بتاخد 50 الف شخص كل سنة عشوائي من المتقدمين لها وبتديهم اقامة دايمة .. ودي جه منها طول الفترة اللي فاتت عائلات وعائلات .. منهم جيراني هنا 3 اسر من عائلة واحدة جاية من كفر الدوار في البحيرة .. التقديم فيها بيبقى اخر السنة والنتيجة في نص السنة اللي بعدها .. وممكن تشوفوا موقع التقديم من هنا  .. وطريقة التقديم من هنا شرح فيديو 

تاني اسهل الطرق هو التقديم على تأشيرة سياحة مؤقتة أو عمل مؤقت ولما تييجوا هنا تحولوها لتعليم عن طريق قبول من جامعة او مركز تعليمي .. او لعمل لو لقيتوا شركة تديكوا خطاب عمل .. وممكن تشوفوا الموضوع ده من هنا 

تالت طريقة وهي الزواج من امريكية وده لو اتعرفت على حد منهم عالنت او باي صورة من الصور .. واسمها فيزة لم الشمل .. ودي من هنا 

رابع طريقة تيجوا تعليم .. بس ده مكلف شوية في الاول لان تكاليف التعليم والاقامة على حسابكم .. شوفوها من هنا 

خامس طريقة وهي العمل .. ودي صعبة شوية بس شوفوها من هنا 

سادس طريقة وهي اكبر مجمع منح دراسية بتقدمها امريكا اسمها ( منحات فلبريت ) والتقديم فيها سهل جدا بس عدد المتقديمن بيبقى كتير .. لكن لكل مجتهد نصيب .. وده طريقة التقديم لها في مصر بالتنسيق مع الحكومة المصرية 

سابع طريقة ودي اللي انتشرت رغم صعوبتها وعواقبها السيئة .. لكنها كترت اوي من بعد 2013 للمصريين باللذات .. وهي فيزا سياحة بـ 160 دولار .. وبييجوا يشوفوا محامي يطلب لهم لجوء سياسي او ديني او عرقي او او .. وامريكا بعد كده هي اللي بتتكفل بيكم .. بس للامانة مش مضمونة وكتير بيترحلوا .

المهم بس وقبل ما تبتدوا أي حاجة من دول لازم الاول تعرفوا انتوا جايين على فين وهتواجهوا ايه .. وده اللي هحاول الخصهولكم في اللي هقولهولكم ده ..

بسم الله .. وصلوا بينا عالنبي .. ونبتدي من اولها ..

اول ما وصلت امريكا وجوزي عمل حفلة عزم فيها زمايله .. اول حاجة وقعت عليها عنيا هي البنت ام ( هوت شورت ) اللي كان جايبها جوزي ضمن زمايله في الجامعة .. ( مين دي ياعم الحاج ؟ ) .. قالي دي زميله واخت فاضلة .. قلتلوا بقولك ايييييه … عارف لو شفت الحاجات دي معاك تاني مش هقعدلك في البيت .. اه من الاول كده عشان نبقى على نور .. وقد كان .. وكلمتي برضه هي اللي مشيت .. فالناس اللي جايه وعيشتها وتربيتها محافظة صعب جدا عدم الاختلاط بالحابل والنابل ( حلوة حابل دي ؟ .. والله ما اعرف يعني ايه !! ) .

سنين طويلة من ولاية لولاية حسب شغل جوزي .. ربنا رزقنا فيهم باولادنا ربنا يخليهم لنا .. اللي هم بقوا امريكان بفعل القانون الامريكي للجنسية لاي حد اتولد في امريكا .. بصراحة قلنا ناخدهم ونكمل في مصر لان اصعب حاجة لاي اب وام تربية ولاده في المجتمع الامريكي على القيم الاسلامية والطباع الشرقية ..

لكن للاسف لما نزلنا مصر ولادي مبقوش قادرين يستوعبوا ازاي التعليم في مصر متدني بالشكل الفظيع ده .. فكان دايما اصحابهم بيعتبروهم امريكان شكلا وموضوعا .. فللاسف اجبرونا ان احنا نرجع تاني .. ويكملوا تعليمهم في امريكا .

نسيت اقولكم ان الامريكي البالغ لو حصل له أي مشكلة في أي بلد حتى لو تأفف من نظام البلد نفسها فالسفارة الامريكية بتتدخل بشكل مباشر وبتسفره لبلده الام امريكا .. مش هو وبس .. لأ .. ده هو وابوه وامه وجده وجدته من الطرفين !

للاسف انا بقيت قدم في امريكا وقدم في مصر عشان مرض والدي ووالدتي لدرجة اني كنت بسيب ولادي بالسنين مع باباهم .. بس كنت بحاول لما ارجع الطف الوضع عشان ميحسوش اني حاجة ثانوبة في حياتهم .. وكنت بفرض عليهم شوية طقوس عشان ميطلعوش من جلدهم المصري العربي الاسلامي .. زي ان في البيت لازم الكلام بالعربي المصري بس .. والصلاة في مواعيدها والجمعة في الجامع وحفظ القران لابد منه .

طبعا من الحاجات الحلوة في امريكا هي الصحة والتعليم اللي هم شبه مكفولين لاي مقيم شرعي له مصدر دخل .. وتعليم الاولاد بيتحدد حسب دخل رب الاسرة مش شمط لاي حد والفقير ميتعلمش زي بلادنا الحلوة كده .. لا وكمان بيوفروا وجبتين فطار وغدا لاي طالب من مطعم المدرسة اللي عليه اشراف ممتاز من وزارة الصحة .. والاسعار والله ما زادت من ساعة ماجيت امريكا من 25 سنة لحد دلوقتي الا حاجة بسيطة جداااا بالسنتات ( قروش يعني ).. يعني مثلا اللبن والبسكويت بنفس سعرهم من ساعة ماجيت .. وغيرهم وغيرهم .

بالنسبة للمجتمع الامريكي نفسه فمجتمع متنوع جدا من كل الدنيا .. واكتر الناس فيه ولا تعرف حاجة عن العرب ولا المصريين .. وسيبوكم من الاشاعات اللي في مصر دي بتاعة المؤامرات وبتاع .. لانها والله تضحك .. اكتر الناس هنا كل اللي تعرفه عن مصر هو الصحرا والجمل والهرم .. وشكرا .

الجاليات العربية وباللذات الخليجيين هم اكتر ناس منتشرين في كل بقاع امريكا من اكبر مدينة لاقل قرية بسبب البعثات والمنح التعليمية المجانية من اول دورات اللغة وحتى الدكتوراه .. فللامانة مش هتحسوا اوي انكم خرجتوا من دايرة مجتمعكم العربي لو حابين تكونوا جنبهم في أي لحظة وفي أي مكان .. وطبعا فيه اماكن اكتر من اماكن .. يعني مثلا نيويورك ونيوجيرسي وميتشيجن فيهم عرب وبالذات مصريين اكتر من مدن كتيرة تانية .

فاللي ناوي ييجي امريكا يقول بسم الله ويشوف الطريقة اللي تناسبه من اللي انا قلتهم فوق ويتوكل على الله .. وربنا يوفق الجميع للخير .. لكن ياخد باله انه مش جاي للجنة يعني .. بلد زي اي بلد .

في الحلقات الجاية هحكيلكم مواقف مختلفة حصلت معايا وقدامي لعرب ومسلمين ومصريين في امريكا هترسم لكم الصورة الحقيقية بالالوان الفلومستر للمعيشة هنا .. وهل الحلم الامريكي اتحقق معانا ولا لأ ..