ساعات بقوم بالليل وانا ضميري بيأنبني كوني مستهتر كده اوي وبتريق في الطالعة والنازلة على شغل المستشرقين من اهل “الالحاد المستنير” اللي هدفهم النبيل والاوحد بل واملهم في الحياة انهم يخرجوا الانسان العربي والمسلم من ظلم وتخلف الاسلام الى نور وهداية الحضارة الغربية العظيمة ..
من غير اي دوافع مادية ابدا مساكين ! 🙂 …
وبدل ما اتعاون معاهم – كوني اتربيت في مدارسهم وجامعاتهم – في “تجديد الخطاب الديني” زي مئات “المثقفين العرب” اللي راكبين الموجة حاليا ما بيعملوا ..
مازلت متمسكا بالنظرة القديمة اللي بتعتبر كل حرف من القران الكريم وحي فعلي من عند الله سبحانه وتعالى نزل على النبي محمد عليه الصلاة والسلام ..
مع انه احدث ما توصل اليه “علم” الاستشراق …
(هو في الحقيقة شبه علم حسب تعريف كارل بوبر بس انا حمشيها حاليا كده عشان منجرحهمش اكتر ليموتوا في ايدينا ! 😂😂😂😂🤣🤣)
بيقول انه القران لازم يكون اقدم بكتير من التاريخ المعروف عنه لانه بيحتوي على قصص كتير من التوراة لا يمكن يعرفها الا اليهود وقد يكون مترجم من الارامية برضه لانهم اكتشفوا فيه كلمات غير عربية زي ابراهيم كده !
والمهم انه لا يمكن يكون كتبه شخص واحد وانما مجموعة او لجنة من الاشخاص ..
انا عايز عشان اريح ضميري افكر معاهم بصوت عالي في تكوين اللجنة دي …
ومش عايز ادخل في تفاصيل السبب اللي خلى اللجنة دي تتكون اصلا ولا زمن تكوينها ..
اللي هو لازم يكون وقت ظهور الاسلام او بعده في عهد احد الخلفاء مثلا وده بيناقض فكرة انه اتكتب بمساعدة اليهود او حد بيفهم في التوراة ..
بس ما علينا لانه النقاش ده ممكن يدخلنا في متاهات عقلية كتير…
فحركزعلى بعض الايات اللي ” اللجنة” المفروض تكتبها
( هم كتير أوي في الحقيقة بس المجال هنا مش ممكن يتسع فمجبتش الا اللي مفيش عليهم اي خلاف عند العقلاء ..)
“اللجنة” دي محتاجة حد متخصص فيما يلي :
1- الرياضيات :
عشان يعرف يحسب الفرق مضبوط بين السنة الشمسية والقمرية في الآية اللي اتكلمنا عنها في بوست سابق :
” وَلَبِثُوا فِي كَهْفِهِمْ ثَلَاثَ مِائَةٍ سِنِينَ وَازْدَادُوا تِسْعًا ” سورة الكهف -25
2- الفلك :
عشان يعرف أنه الأرض كورة مش مسطحة برضه اتكلمنا في بوست سابق عن الموضوع ده :
” خَلَقَ السَّمَاوَاتِ وَالْأَرْضَ بِالْحَقِّ ۖ يُكَوِّرُ اللَّيْلَ عَلَى النَّهَارِ وَيُكَوِّرُ النَّهَارَ عَلَى اللَّيْلِ ۖ وَسَخَّرَ الشَّمْسَ وَالْقَمَرَ ۖ كُلٌّ يَجْرِي لِأَجَلٍ مُّسَمًّى ۗ أَلَا هُوَ الْعَزِيزُ الْغَفَّارُ ” سورة الزمر – 5
3- الفيزياء :
عشان يعرف انه الزمن نسبي ..
(مع انه من وقت ارسطو لغاية ايمانويل كانت على الاقل – مرورا بابن رشد وابن سينا وكل فلاسفة العصور الوسيطة – كان الزمن مطلق …)
زي ما هو واضح في كذا آية منها على سبيل المثال لا الحصر:
” وَيَسْتَعْجِلُونَكَ بِالْعَذَابِ وَلَن يُخْلِفَ اللَّهُ وَعْدَهُ ۚ وَإِنَّ يَوْمًا عِندَ رَبِّكَ كَأَلْفِ سَنَةٍ مِّمَّا تَعُدُّونَ ”
سورة الحج – 47
وهو نفسه برضه لابد يعرف انه سفر الضوء عبر الفضاء الشاسع مبيكونش في خط مستقيم وانما في منحنيات (اسمها بالعربي : “معارج”) والمنحنيات دي بتخلي الزمن يتمدد:
” تَعْرُجُ الْمَلَائِكَةُ وَالرُّوحُ إِلَيْهِ فِي يَوْمٍ كَانَ مِقْدَارُهُ خَمْسِينَ أَلْفَ سَنَةٍ ”
سورة المعارج – 4
4- نشوء الكون :
عشان يعرف انه السما والارض والكواكب والنجوم كانت مادة كونية واحدة قبل ما تنفصل وتكون المجرات والعالم اللي احنا عارفينه :
” أَوَلَمْ يَرَ الَّذِينَ كَفَرُوا أَنَّ السَّمَاوَاتِ وَالْأَرْضَ كَانَتَا رَتْقًا فَفَتَقْنَاهُمَا ۖ وَجَعَلْنَا مِنَ الْمَاءِ كُلَّ شَيْءٍ حَيٍّ ۖ أَفَلَا يُؤْمِنُونَ ”
سورة الانبياء – 30
5- نشوء الحياة والتطور :
نفس الآية اللي فوق بتتكلم عن خروج الحياة من الماء …
فخبير نشوء الكون لازم يكون برضه خبير تطور ..
ليه بقول تطور ؟
لانه القران ذكر التطور باللفظ من الاف السنين ومش عشان جه دارون بعد كده طبع اسمه على كلمة “تطور” يبقى احنا منستخدمش المصطلح ده !
القران الكريم مش بس ذكر التطور بالاسم وانما صرح بمنتهى الوضوح انه الادلة على نشوء الحياة حنلاقيها في الارض :
” قُلْ سِيرُوا فِي الْأَرْضِ فَانظُرُوا كَيْفَ بَدَأَ الْخَلْقَ ۚ ثُمَّ اللَّهُ يُنشِئُ النَّشْأَةَ الْآخِرَةَ ۚ إِنَّ اللَّهَ عَلَىٰ كُلِّ شَيْءٍ قَدِيرٌ ”
سورة العنكبوت – 20
6- الطب والتشريح :
لازمنا طبيب تخصص تشريح وعنده برضه المام بتطور الانواع عشان الآيات في سورة المؤمنون من 12-14 :
” وَلَقَدْ خَلَقْنَا الْإِنسَانَ مِن سُلَالَةٍ مِّن طِينٍ (12) ثُمَّ جَعَلْنَاهُ نُطْفَةً فِي قَرَارٍ مَّكِينٍ (13) ثُمَّ خَلَقْنَا النُّطْفَةَ عَلَقَةً فَخَلَقْنَا الْعَلَقَةَ مُضْغَةً فَخَلَقْنَا الْمُضْغَةَ عِظَامًا فَكَسَوْنَا الْعِظَامَ لَحْمًا ثُمَّ أَنشَأْنَاهُ خَلْقًا آخَرَ ۚ فَتَبَارَكَ اللَّهُ أَحْسَنُ الْخَالِقِينَ (14)”
حنلاحظ انه الايات ابتدت بمرحلة الطين وبالذات : “سلاسة الطين” اللي فيها فكرة “الانتقاء” من مجموعة اوسع من الكائنات واضحة جدا ..
بس مش انتقاء طبيعي زي عند دارون وانما انتقاء رباني انتهى – حسب ايات تانية – بنفخ الروح الالهية في الكائن ده (يعني انتهى ب”بيج بانج” بالنسبة لنا !)..
ثم الآيات ربطت المرحلة دي بالمراحل اللي النهاردة الكل بيدرسها في كليات الطب واللي مبقاش فيها اي شك ..
بل الاسم العلمي “مضغة” 😊 لحم ممضوغ) بيطلق النهاردة فعلا على الجنين في المرحلة اللي ذاكراها الايات دي ..
مهم اوي – من وجهة نظري الضعيفة – انه الآيات انتهت بمقارنة تشريح الجنين الانساني بتشريح اجنة الكائنات الاخرى لما قالت : “ثم أنشأناه خلقا آخر”
في الواقع انه اللي يقارن اجنة السمك والقرود والانسان ببعض (زي ما عملنا مرة فعلا في المدرسة الالمانية زمان) حيلاقي تشابه كبير لغاية المرحلة اللي بيقول عنها القران انه الجنين الانساني تميز عن غيره فيها.
بالاضافة لكده : في مكان تاني من القرآن الكريم بيفصل في موضوع المضغة أكتر وبيقول انه فيه منها اجزاء اتكونت مخصوص عشان تبقى اعضاء معينة واجزاء تانية لسه (خلايا جذعية) :
” يَا أَيُّهَا النَّاسُ إِن كُنتُمْ فِي رَيْبٍ مِّنَ الْبَعْثِ فَإِنَّا خَلَقْنَاكُم مِّن تُرَابٍ ثُمَّ مِن نُّطْفَةٍ ثُمَّ مِنْ عَلَقَةٍ ثُمَّ مِن مُّضْغَةٍ مُّخَلَّقَةٍ وَغَيْرِ مُخَلَّقَةٍ لِّنُبَيِّنَ لَكُمْ ۚ وَنُقِرُّ فِي الْأَرْحَامِ مَا نَشَاءُ إِلَىٰ أَجَلٍ مُّسَمًّى ثُمَّ نُخْرِجُكُمْ طِفْلًا ثُمَّ لِتَبْلُغُوا أَشُدَّكُمْ ۖ وَمِنكُم مَّن يُتَوَفَّىٰ وَمِنكُم مَّن يُرَدُّ إِلَىٰ أَرْذَلِ الْعُمُرِ لِكَيْلَا يَعْلَمَ مِن بَعْدِ عِلْمٍ شَيْئًا ۚ وَتَرَى الْأَرْضَ هَامِدَةً فَإِذَا أَنزَلْنَا عَلَيْهَا الْمَاءَ اهْتَزَّتْ وَرَبَتْ وَأَنبَتَتْ مِن كُلِّ زَوْجٍ بَهِيجٍ (5)”
سورة الحج – 5
7- علم الحشرات :
محتاجين حد تخصص حشرات عشان يعرف انه انثى العنكبوت مش الذكر بتبني البيت النمطي للفصيلة بتاعتها :
” مَثَلُ الَّذِينَ اتَّخَذُوا مِن دُونِ اللَّهِ أَوْلِيَاءَ كَمَثَلِ الْعَنكَبُوتِ اتَّخَذَتْ بَيْتًا ۖ وَإِنَّ أَوْهَنَ الْبُيُوتِ لَبَيْتُ الْعَنكَبُوتِ ۖ لَوْ كَانُوا يَعْلَمُونَ”
سورة العنكبوت 41
ازاي عرفنا كده ؟
ببساطة : العنكبوت في اللغة العربية ممكن يكون مذكر او مؤنث وقد يستخدم التأنيث للتعبير عن الجنس زي: “قالت الملائكة” ..
بس هنا مش ممكن يكون الجنس المعني في الآية لانه قال: “اتخذت بيتا” مش “اتخذت بيوتا” زي مثلا لما قال في سورة النحل 68 :
” وَأَوْحَىٰ رَبُّكَ إِلَى النَّحْلِ أَنِ اتَّخِذِي مِنَ الْجِبَالِ بُيُوتًا وَمِنَ الشَّجَرِ وَمِمَّا يَعْرِشُونَ “
8- علوم البحار :
عايزين حد يكون مش بس شاف ظاهرة الفاصل المرئي بين انواع المياه المالحة والعذبة المذكور في الآية :
” وَهُوَ الَّذِي مَرَجَ الْبَحْرَيْنِ هَٰذَا عَذْبٌ فُرَاتٌ وَهَٰذَا مِلْحٌ أُجَاجٌ وَجَعَلَ بَيْنَهُمَا بَرْزَخًا وَحِجْرًا مَّحْجُورًا”
سورة الفرقان – 53
وانما برضه دارس التيارات البحرية العميقة :
” أَوْ كَظُلُمَاتٍ فِي بَحْرٍ لُّجِّيٍّ يَغْشَاهُ مَوْجٌ مِّن فَوْقِهِ مَوْجٌ مِّن فَوْقِهِ سَحَابٌ ۚ ظُلُمَاتٌ بَعْضُهَا فَوْقَ بَعْضٍ إِذَا أَخْرَجَ يَدَهُ لَمْ يَكَدْ يَرَاهَا ۗ وَمَن لَّمْ يَجْعَلِ اللَّهُ لَهُ نُورًا فَمَا لَهُ مِن نُّورٍ ”
سورة النور – 40
9- الأرصاد :
ومحتاجين عالم ارصاد يعرف انه في الغلاف الجوي فيه جبال من البرد والمطر (بنشوفها النهاردة بالطيارة) :
” أَلَمْ تَرَ أَنَّ اللَّهَ يُزْجِي سَحَابًا ثُمَّ يُؤَلِّفُ بَيْنَهُ ثُمَّ يَجْعَلُهُ رُكَامًا فَتَرَى الْوَدْقَ يَخْرُجُ مِنْ خِلَالِهِ وَيُنَزِّلُ مِنَ السَّمَاءِ مِن جِبَالٍ فِيهَا مِن بَرَدٍ فَيُصِيبُ بِهِ مَن يَشَاءُ وَيَصْرِفُهُ عَن مَّن يَشَاءُ ۖ يَكَادُ سَنَا بَرْقِهِ يَذْهَبُ بِالْأَبْصَارِ “
سورة النور – 43
وهو نفسه لازم يكون عارف اننا لما بنرتفع عن الارض التنفس بتاعنا بيضيق :
” فَمَن يُرِدِ اللَّهُ أَن يَهْدِيَهُ يَشْرَحْ صَدْرَهُ لِلْإِسْلَامِ ۖ وَمَن يُرِدْ أَن يُضِلَّهُ يَجْعَلْ صَدْرَهُ ضَيِّقًا حَرَجًا كَأَنَّمَا يَصَّعَّدُ فِي السَّمَاءِ ۚ كَذَٰلِكَ يَجْعَلُ اللَّهُ الرِّجْسَ عَلَى الَّذِينَ لَا يُؤْمِنُونَ ” سورة الانعام – 125
10- الجيولوجيا :
محتاجين واحد بتاع قشرة ارضية يقولنا انه دور الجبال هو تثبيت القشرة دي :
” وَأَلْقَىٰ فِي الْأَرْضِ رَوَاسِيَ أَن تَمِيدَ بِكُمْ وَأَنْهَارًا وَسُبُلًا لَّعَلَّكُمْ تَهْتَدُونَ”
سورة النحل – 15
وانه مع احساسنا بانه الجبال دي ثابتة فهي في الحقيقة بتتحرك مع الارض:
” وَتَرَى الْجِبَالَ تَحْسَبُهَا جَامِدَةً وَهِيَ تَمُرُّ مَرَّ السَّحَابِ ۚ صُنْعَ اللَّهِ الَّذِي أَتْقَنَ كُلَّ شَيْءٍ ۚ إِنَّهُ خَبِيرٌ بِمَا تَفْعَلُونَ ”
سورة النمل – 88
11- علم النفس :
محتاجين حد يكون عارف انه الطفل اذا شاف امه وابوه في علاقة جنسية مع بعض لازم يشوف طبيب نفسي ولذلك كان مهم انه ميدخلش عليهم من غير استئذان حتى لو كان لسه صغير ومبيفهمش في المواضيع دي :
” يَا أَيُّهَا الَّذِينَ آمَنُوا لِيَسْتَأْذِنكُمُ الَّذِينَ مَلَكَتْ أَيْمَانُكُمْ وَالَّذِينَ لَمْ يَبْلُغُوا الْحُلُمَ مِنكُمْ ثَلَاثَ مَرَّاتٍ ۚ مِّن قَبْلِ صَلَاةِ الْفَجْرِ وَحِينَ تَضَعُونَ ثِيَابَكُم مِّنَ الظَّهِيرَةِ وَمِن بَعْدِ صَلَاةِ الْعِشَاءِ ۚ ثَلَاثُ عَوْرَاتٍ لَّكُمْ ۚ لَيْسَ عَلَيْكُمْ وَلَا عَلَيْهِمْ جُنَاحٌ بَعْدَهُنَّ ۚ طَوَّافُونَ عَلَيْكُم بَعْضُكُمْ عَلَىٰ بَعْضٍ ۚ كَذَٰلِكَ يُبَيِّنُ اللَّهُ لَكُمُ الْآيَاتِ ۗ وَاللَّهُ عَلِيمٌ حَكِيمٌ ” سورة النور – 58
12- علوم اللغة
عايزين حد شبه اصحابي فريجة وفيتجنشتين وتارسكي وسكولم اللي قرروا – بعد تفكير عميق – انه اهم مشاكل المنطق واللغات الصورية تكمن في العلاقة بين المعاني ومدلولاتها والالتباس الحاصل بينهم واللي بيخلي اي نص مكتوب بلغات لها قدرات تعبيرية مكافئة او اعلى من الرياضيات المدرسية عرضة لتشابه المعاني …
ودي خاصية ما بتجرحش في النص وانما بتعبر عن القصور المبدئي للمتلقي البشري:
“هُوَ الَّذِي أَنزَلَ عَلَيْكَ الْكِتَابَ مِنْهُ آيَاتٌ مُّحْكَمَاتٌ هُنَّ أُمُّ الْكِتَابِ وَأُخَرُ مُتَشَابِهَاتٌ ۖ فَأَمَّا الَّذِينَ فِي قُلُوبِهِمْ زَيْغٌ فَيَتَّبِعُونَ مَا تَشَابَهَ مِنْهُ ابْتِغَاءَ الْفِتْنَةِ وَابْتِغَاءَ تَأْوِيلِهِ ۗ وَمَا يَعْلَمُ تَأْوِيلَهُ إِلَّا اللَّهُ ۗ وَالرَّاسِخُونَ فِي الْعِلْمِ يَقُولُونَ آمَنَّا بِهِ كُلٌّ مِّنْ عِندِ رَبِّنَا ۗ وَمَا يَذَّكَّرُ إِلَّا أُولُو الْأَلْبَابِ ” ال عمران – 7
برضه لازم الشخص ده يعرف انه اللي بيميز اللغة البشرية الطبيعية فعلا عن اي لغات اصطناعية هي القدرة العجيبة على التسمية:
” وَعَلَّمَ آدَمَ الْأَسْمَاءَ كُلَّهَا ثُمَّ عَرَضَهُمْ عَلَى الْمَلَائِكَةِ فَقَالَ أَنبِئُونِي بِأَسْمَاءِ هَٰؤُلَاءِ إِن كُنتُمْ صَادِقِينَ” سورة البقرة -31
(اللي عايز يعرف اكتر عن النقط دي مضطر يقرا شغلي الجدي في مقالي عن حدود المعرفة)
13- نظرية المعرفة وحدود العلم
وأخيرا وليس اخرا لازم يكون عندنا حد زي كارل بوبر او ماكس بورن كده عارف انه العلم له حدوده ومهواش مفتوح لفوق الى الابد زي ما معظم “المثقفين” الايام دي فاكرين ..
وانه في مجالات معينة لا يمكن في يوم من الايام حيتعداها ..
بعكس اراء كل فلاسفة عصر النهضة الغربيين تقريبا ومعظم الفلاسفة الوجوديين والطبيعيين في بداية القرن العشرين :
“وَيَسْأَلُونَكَ عَنِ الرُّوحِ ۖ قُلِ الرُّوحُ مِنْ أَمْرِ رَبِّي وَمَا أُوتِيتُم مِّنَ الْعِلْمِ إِلَّا قَلِيلً”
– سورة الاسراء – 85
مهم اوي اننا نفتكر انه اللجنة دي – بعد كل ده – لازم تجيب حد يعبر عن الحقائق العلمية اللي فوق باللغة العربية البديعة بتاعت القران العظيم ..
فمعرفش حيعملوا ايه بقى ؟
حيلاقوا اديب كبير زي كده يشتغل معاهم freelance فين ؟ 😂😂😂😂😂
أصل هو لو كان واحد منهم حيحب ينسب الكلام العظيم ده كله لنفسه ..
لازم “نظرية اللجنة” تفسر النقطة دي بالذات : ازاي اعضاء “لجنة العلماء العرب” متخانقوش على نسبة القران الكريم لنفسهم مع انه العرب متعودين يتخانقوا (زي ما حنشوف في اليومين اللي جايين) على رؤية القمر مثلا .. حتى لو كان القمر بدر والاعمى اللي واقف على الرصيف شايفه !
مبنلاقيش حد عمل كده ..
ولا محمد عليه الصلاة والسلام ..
محمد عليه الصلاة والسلام اللي كان الاستشراق في ال100 سنة اللي فاتت بيقول انه كتب القران …
منسبش القرآن لنفسه ..
ليه يا ترى ؟
السبب بسيط : لانه القران العظيم مرعب فعلا (بالمعنى الحرفي للكلمة !) …
ومفيش حد يجرؤ ينسبه لنفسه !
