بما ان انا واسرتى مطبقين العزل بقالنا ٦ ايام والناس مقبله على ده فمعرفش هل تجربتنا هتفيدكم ولا لا ، بس احنا فعلا عملنا خطة انا ومروة عشان نقلل المخاطر ويمكن تكون ظروفنا وامكانياتنا مختلفه.
الخطة كانت عبارة عن عدة محاورز
١- المحور التوعوى
وده ليا انا وهى والعيال اننا لازم نفهم عدونا عشان نعرف نواجهه والحقيقة ده كان دورى كأب انى احاول اعرف اكبر قدر من المعلومات الصحيحة حوالين كرونا لان ٩٥٪ من المعلومات مغلوطة وتأليف والحمدلله جمعت ما اظنه صحيح حتى اللحظة من نوعية الاكل وطرق انتشار العدوى واعراضها وكيفية العلاج المنزلى
٢- المحور النفسى
وده اهم شئ وهى اننا فعليا هنعيش سوا فترة كبيرة ووقت اكبر من كل شئ وهنا هنكتشف عادات ورغبات مختلفة ومتعارضة بعد الدنيا ما ضاقت ولكن لهدف اسمى اننا بنحمى نفسنا وبنحمى الناس اللى بره ، ويبقى تلبية رغبات الاولاد ليها الاولوية
٣-زوجتك
اعزل حد من حبايب زوجتك معاك اللى هى غالبا مامتها او اختها لان ده هيخفف الضغط النفسى عليها لان فعلا الست هى اكتر حد مضغوط فى الدنيا وفى الازمة دى
٤- تطبيق خطة العزل
ودى اننا وضعنا مراحل لعزلنا ، يعنى انا او زوجتى المسموح لنا فقط نخرج من البيت فوقت الخروج نلبس جوانتيات وكمامات وفكك من اللى يقلك ملهمش لازمة شخص واحد بس يعطس ومحطش منديل كعادتنا هنضيع ، الجوانتى مع استخدامه كفه هيصفر من وساخة وكل شئ فلو سهيت ترفع ايدك اللون المختلف هينبهك فهتوقف لما تخلص فى اقرب باسكت برة البيت وتحطه فى كيس ، دايما عربيتك فيها جوانتى واكياس ،لما نشترى حاجة بنفتح شنطة العربية ونرش كحل عليها ونسيبها فى شنطة العربية ٢٤ ساعة فترة موت الفيروس بعد كده نطلعها
-عند خروجك لازم تكونوا اتنين عشان كل واحد يراقب تصرفات التانى وينبهه
– عند رجوعك تقلع جزمتك برة البيت ومفاتيحك ومحفظتك يكون ليهم مكان جنب الباب ممكن ترشهم بكحل او ديتول ونفس المكان ده تتقلع فيه الهدوم الخارجية وتتحط فى كيس وتانى يوم تتغسل او تلبسها الفيروس بيقعد ١٢ ساعة فى اللبس، وتسمى دى منطقة العزل وكل اخر يوم ترشها باى معقم
٥-الامن الغذائى
الفيروس ده مقاتله الشرس المناعة فمحتاج تقرا اكتر عن المناعة يعنى بتقل من الاكل الملئ بالسكريات وبرده قلة النوم والسمنة ودى فرصة اكبر انك تخس وقلة الحركة ، فالبتالى الخضروات والثوم والجنزبيل مهمين جدا واللحوم مهمة بس تتطهى جيدا جيدا
٦- المشاركة
اعظم مشاركة ليك كراجل انك تعدى اول ٥ ايام بدون عصبية 😁 لانك هتشوف العجب هتكتشف ان معاك ناس غريبة ، الست المصرية جدعة كلمتين حلوين بالدنيا ، بعدها هتكتشف ان انت اللى غريب عنهم وان انت اللى غلطان
٧- الترفيه
اهم شخص لازم يترفه هو الام. من غيرها هتضيعوا ، اشترى لعب كتير افلام على اللاب ،اخرجوا اتمشوا بالعربية فقط، العلاقة. الزوجية مهمة جدا فى تقليل الضغط
٨- التعليم
فكك من المدرسة كله هينجح ، بس فرصة تقوى مهارات عندهم او تحفظهم قرءان وانت كمان. تمسك كتاب تقراه وتشاركه مع زوجتك لانك محتاج حكاوى كتير 😁😁
