تخيل معايا السيناريو دا كدة ..
مهران و سعفان أصحاب من زمان جدا، لدرجة إن الناس بيتلخبظوا بينهم .. من حوالي شهر كدة راحوا مع بعض اشتروا موبايلين زي بعض بالظبط.. نفس الموديل و نفس اللون حتى، و شاريينهم من نفس المحل!
و علشان إحنا الجو عندنا ربيع طول السنة و كدة .. الدنيا مطرت من حوالي أسبوع، و كانت الشوارع فيها شبر مياه لدرجة إن الناس كانوا بيلعبوا باليه علشان يعدوا من المياه بأقل قدر ممكن من البلل ..
المهم .. مطولش عليك يعنى .. مهران و سعفان كانوا كل واحد فيهم ماشي بيـChat مع الجَو بتاعه على الواتساب و مش مديين خوانة، و فجأة… حدثت المفاجأة اللي انت قاعد مستنيها من ساعتها … الاتنين أتزفلطوا و وقعوا فى بحر مياه بموبايلاتهم بهدومهم بعباس صاحبهم اللي كان بيكلمهم هما الاتنين على الواتس و مفهمهم إنه بنت
المهم .. مهران و سعفان الاتنين قاموا بسرعة و كل واحد طلع موبايله من المياه (بعد ما الموبايلين فضلوا نفس المدة تحت المياه)، و خدوا موبايلاتهم و روحوا بيوتهم يشوفوا فيهم صرفة …
النهاردة بالصدفة قابلت مهران و سعفان، و سألتهم عن موبايلاتهم، و ياللعجب! مهران موبايله شغال من غير أي مشكلة كأنه موقعش فى المياه خالص! و فى نفس الوقت سعفان موبايله باظ و رماه لأنه ملقاش حد يشتريه قطع غيار حتى!
و هنا السؤال.. هل ممكن المياه تبوظ موبايلك لو الموبايل دا وقع فيها؟
الإجابة على السؤال دا بكل بساطة هى “طبعاً!”
طيب.. المياه ممكن تعمل إيه فى الموبايل؟
خلينا متفقين إن المياه كجزيئات H2O مش موصل جيد للكهرباء؛ و بالتالى لو الموبايل وقع فيها ممكن جدا متعملش تلميس ولا حاجة فى الدواير الكهربية بتاعته
لكن الكلام اللي بنتكلم فيه دا مثالي و خيالي شويتين…
- أولا: لأن المياه اللي بنتعامل معاها فى أي صورة من الصور لازم بتحتوي على نسبة من الأملاح، و الأملاح دى عبارة عن أيونات، و الأيونات دى موصلة جيدة جدا للكهرباء؛ و بالتالي نادر إنك تلاقي مياه مقطرة متسببش تلميس فى الموبايل.. حتى مياه الأمطار لأن التلوث اللي فى الجو بيملاها سموم و أحماض و بلاوي زرقا!
- ثانيا: لأن المياه أو أي سائل (حتى لو مش هيسبب تلميس أو مشاكل مع الكهرباء بتاعة الموبايل) ممكن يتسرب تحت إزاز الكاميرا الخارجي، و ساعتها هيعمل شبورة فى الصور و يطلع عينك، أو يتسرب تحت طبقة الحماية بتاعة الشاشة، و ساعتها برضو هيعمل بخار على الشاشة و يخليك متعرفش تستخدمها زي الأول، أو السائل دا يدخل فى الميكروفون بتاع الموبايل و يخلى صوتك بعيييييييييد لما تيجى تكلم حد، أو فى السماعة و يخلى الصوت بيزن زي ما تكون بتسمع إنسان آلي، أو تحت الكاميرا الأمامية و يعمل نفس مشاكل الكاميرا، أو… بص.. الموضوع مقرف جدا، و أي سائل ممكن يعمل أي حاجة!
طيب أعمل إيه؟
ما أنا مسكتش، و سألت سعفان و مهران كل واحد عمل إيه فى موبايله بعد ما طلعه من المياه …
صاحبنا سعفان أول ما طلع موبايله من المياه شغله بسرعة علشان يتأكد إنه سليم، و بعد كدة عمل مكالماته و عاش حياته عادي جدا! .. و دا كان سبب رئيسي فى إن الموبايل يبوظ ؛ تخيل دايرة الكهربا عليها محلول إلكتروليتي و انت بتمشى فيها تيار كهربي من البطارية !!
مهران بقى أول ما طلع الموبايل من المياه راح جرى فك ضهره و شال البطارية و الشرايح و الميمورى و حطهم على فوطة ناشفة .. و دا قلل من تأثير المياه على الحاجات اللى طلعها من الموبايل دى، و أهم من كدة إنه منع أي تلميس ممكن يحصل لأن الموبايل مش ماشي فيه تيار أصلا علشان مفيش فيه بطارية
سعفان لقى إن المياه بدأت تدخل فى الفتحات بتاعة الموبايل (الميكروفون و السماعات و منفذ الشحن و منفذ السماعات 3.5mm .. أصل الموبايل مكانش آيفون ، فقام مسك الموبايل و فضل ينفض فيه علشان يخرج المياه
التصرف دا غلط تمامًا لأن غالبا الفتحات دى بتكون على الجنبين العلوي و السفلي من الموبايل؛ و بالتالي لما بتمسك الموبايل و تنفضه فى اتجاه منهم علشان تخرج المياه من الفتحات اللى فيه، فانت بالفعل بتدخل المياه أكتر فى الفتحات اللى فى الجنب التاني !!
مهران لقى إن المياه بدأت تدخل فى نفس الفتحات بتاعة الموبايل، فقام جاب كتابين كبار و وقف الموبايل على سيفه بينهم، و حط الكلام دا كله على فوطة ناشفة علشان المياه تنزل عليها
التصرف دا صح؛ علشان المياه تنزل من الجنبين بالتساوي، و متدخلش فى جنب على حساب الجنب التاني!
سعفان لما نفض الموبايل بالشكل دا حب يتأكد إن الموبايل نشف؛ فقام جاب السشوار بتاع الشعر و شغله على أعلى درجة حرارة و وجِّهُه على الموبايل لفترة كبيرة علشان يضمن إن المياه اتبخرت … التصرف دا يعتبر أسوأ تصرف ممكن تعمله مع جهاز إلكتروتي مبلول؛ و دا لسببين:
- أولهم هو إنك بتنفخ هوا جوا الجهاز بياخد المياه دى و يدخلها جوة أكتر
- ثانيهم هو إن الهوا دا لو درجة حرارته عالية أكتر من اللازم ممكن يأثر على الشاشة أو البطارية أو اللزق اللى مثبت الشاشة مكانها!
مهران بقى قام استأذن الحاجة و جاب المكنسة و حاول يشفط الهوا من الفتحات دى بدل ما يزقه لجوة
دا التصرف الصحيح؛ لأنك حتى لو معرفتش تسحب حاجة من المياه فانت مدخلتهاش جوة، و مسخنتش الموبايل لدرجات حرارة عالية جدا !
سعفان باشا خلص بالسشوار و راح مشغل الموبايل و شاحنه تاني عادي جدا علشان الموبايل كان قرب يفضى شحن! … تصدق بالله؟ الموبايل لو ما باظ يبقى معندوش دم
يعنى أنا قاعد أقولك متحطش البطارية فيه و هو فيه رطوبة، تقوم تشحنه؟!
مهرات بعد ما خلص بالمكنسة راح جايب الموبايل دا و حطه فى كيس مُحكم و حط عليه رز طري و راح مفرغ الحوا اللى فيه كله و حاطه فى مكان دافى بعيد عن الرطوبة لمدة 48 ساعة (بعد ما شال كل الحاجات اللى قلت لك عليها فى الأول خالص دى)
الخطوة دى مهمة جدا جدا جدا علشان الرُزّ دا بيسحب الرطوبة من الجو؛ و بالتالي هيسحب أي نسبة مياه فى الموبايل، و لو عملتها بسيليكاجيل هيكون أفضل، لكن السيليكاجيل صعب تلاقيها فى مكان قريب منك، و بالتالي الرز هيكون خيار كويس جدا
ممكن كمان بعد ما تطلع الموبايل من الرز تنفضه بالبلاور أو بالسشوار بس تخليه على البارد، علشان تطير أي بقايا من الرز زي الجير أو الرز المكسر أو غيره
مهم جدا كمان إنك متشحنش الموبايل قبل ما تحطه فى الرز، و دا علشان تضمن إن الموبايل خالي تماما من الرطوبة!
على فكرة لو الموبايل بطاريته مبتتشالش مفيش مشكلة خالص! متشيلهاش
لو استفدت حاجة متنساش تعمل لايك و شير و كدة
و متنساش تعمل منشن لأي حد من أصحابك حصل معاه الموقف دا، و احكي لنا فى الكومنتات لو حصل لك موقف زي دا، و قول لنا عملت زي مهران ولا سعفان!
