1- لازم يبقى عندك 40 سنة ، 35 ع الأقل .. عشان قبل كده هيبقى اسمك عيل صغير مابتفهمش حاجة ، والعيانين ” وبالذات الستات ” هيبصولك بصة مش كويسة أول ما هيخشوا من باب العيادة ويشوفوك ، وهتقرا كلام فـ عنيهم ميصحش يتقال ، استصغارا واحتقارا ليك ياعيل ياصغير يابو شخة
2- لازم يكون لبسك كلاسيك ، منعكش ، تلبس ان شالله جلابية اهم حاجة ميكونش كاچوال .. الكاچوال معناه انك دكتور عايق أهبل و عيارك فلتان .. وأكيد فاشل لأن لو في دماغك عِلم كان بان على لبسك ،، على بنطلون قماش بـ تلاتين جنيه ، على قميص كاروهات مبهوق بتلبسه وتقلعه عادي من غير ماتفك الزراير .. كان بان .. إنما ايه المسخرة اللي انت جاي بيها دي ؟!
3- لازم يكون كرشك مدلدل ، بلاش مدلدل ، ع الأقل يكون بلبوظ كده لطيف وعامل Curve كيوت كده تحت القميص البيچاماتي بتاعك .. وانت الخسران برضو لأن كلما زاد كرشك كلما زادت قناعة العيان فيك ان كرشك ده مش من فراغ وانه اكيد محشي بالكتب والأطالس والمراجع والتعاويذ السحرية اللي مليته بيها على مر السنين .. إنما كرشك الفاضي ده دليل على ضعف موقفك وٱنك ٱنسان فاضي من جواك ، وفارغ ، وتافه 
4- لازم تكون أقرع ، أو ع الأقل عندك Frontal recess بسيط كده يدل ان شعرك وقع من كتر ما لاقيت من اهوال المهنة وسبرت في أغوارها وشربت من كيعانها حتى وقع شعرك وبقيت بالمنظر الكائن قدامهم ده .. طبعا لو انت واحد بتحط چل ع شعرك يبقى انت أقل من إني أوجع قلبي معاك ووقتي أثمن من اني أضيعه فـ نصيحة واحد زيك
5- يوحبّذا لو كنت بنضارة ، نضارة نظر م الكبيرة المدوّرة أو المربعة دي .. مش بتكلم ع النضارات الخنافس اللي العيال السيس بتلبسها .. لأ نضارات البوابين بتاعة أيام زمان دي .. وياسلام لو قعر كوباية .. دي بقى مقولكش ع الهيبة والوقار والإسكنشاح اللي بتوهم بيه العيانين النضارة دي .. ممكن يطلع من عندك اصلا من غير كشف وهو خافف ورايق وزي الفل .. اشتري مني ومتسألش ورايا
6- لازم تكون العيادة بتاعتك فيها زباين مستنية برة ، بحيث ان هو / هي ييجي ينتظر برة فترة لا تقل عن نص ساعة خمس ساعات عشان يدخل لك .. إن شالله لو هتجيب زباين Fake أو تجيب مانيكانز تحطها ع الكراسي .. اوعى تدخله من برة عليك على طول ليحسبك دكتور خبؤة ومبتعرفش ، ده غير انه ممكن يجيله برد لو دخلّك ع طول ، لازم يقعد برة شوية ياخد على جو المكان
7- متكتّرش مع العيان ، متاخدش وتدّي معاه فـ الكلام ، متديلوش تفاصيل مرضه المملة و تعمل زي واحد صاحبنا خيبان بيقعد يشرح للعيان ميكانيزم المرض والباثوفيسيولوچي بتاعه ، بيشرحله طبّ البيه فـ العيادة 
😂 .. لأ ، هما كلمتين وبس ، ومتخليهوش ياخد راحته فـ الكلام ، بيّن على وشك علامات الإمتعاض والزهق إذا فتح فـ جملة جديدة أو سأل سؤال أو كحّ من غير استئذان .. متتعبش نفسك وتقوم تكشف عليه أصلا ،، هيفتكرك فاضي بقى وخاوي وموراكش حاجة ،، وانت لو دكتور كويس هتجيب هو عنده ايه من دخلته ع الباب بالـ Clinical sense ” العيان لوچيك ”
8- الكشف أبو عشرين وتلاتين ده سيبك منه وانساه ، خليك ف الكشف ابو 300 و 400 اي نعم مش هيجيلك حالات بس تبقى خدت وضعك ، لو رخيص هيجيلك العيان باشا وهو مش واثق فيك وهيمشي وهو مش مقتنع ، وممكن يقطع الروشتة وهو خارج او يرميها م الشوباك .. خلي الكشف غالي يدفع فيه دم قلبه وهو هيقوم من تحت ايدك زي الرهوان وهيجيب العلاج اللي انت كتبته ف الروشتة بالاسم ويمشي عليه بالحرف ، وياسلام لو كنت برنس بقى وكتبت صنف ناقص ف السوق ودوّخته عليه .. ساعتها هيبقى ده بالنسبة له أكسير الحياة اللي خبرتك العميقة في الطب أفرزته له وادتهوله على طبق من خشاف 
😁
9- خلّي عندك عربية ، يُحبّذ طيارة اف 16 ، ومتمشيش فـ الشارع كتير .. الدكتور اللي بيلتحم مع الناس في المواصلات ويتزنق معاهم فـ المترو ، وبيمشي فـ الأسواق عادي كده مع الشعب ؛ هو دكتور على ما تُفرج ، جعان عدمان سنكوح ولو عمَل عجين الفلاحة .. بلاش مسخرة وقلة قيمة ياراجل !! 
😒
10- لو بعد النصايح دي مابقيتش دكتور كويس برضو ، بعد استبعاد كونك انت المشكلة واخلاء مسئوليتي ، يبقى أكيد فيه item ما ناقص أنا ناسيه ، كان المفروض يتحط هنا مكان رقم 10 بس حاولت أفتكره ماجبتوش
