بعد اقتراب عدد الإصابات من تخطي حاجز 20000 حالة مصابة بفيروس كورونا وتكدس مستشفيات العزل، أصبح العزل المنزلي من أهم خطوات العلاج، لذلك توضح طبيبة حجر صحي بمطار مرسى مطروح الدولي خطوات تجهيز غرفة عزل بالمنزل
- اولا وحضرتك بتختار الغرفة خليك حريص أن يكون فيها مصدر للشمس لانها مهمة جدا
- ثانيا هتحط ف الغرفة أكياس زبالة بقدر كافى
- ثالثا هتحط فيها جونتات وماسكات ومناديل وكحول بقدر كافى
- رابعا هتحط فيها فوط وملابس وملايات للشخص المعزول بقدر كافى
- خامسا لو فيه امكانية لوسيلة للتسلية للشخص المعزول زى شاشة تليفزيون أو لاب توب
- سادسا العلاج اللى الشخص هيستخدمه
- سابعا ترمومتر ديجتل
- ثامنا لو تقدر تفصل الحمام اللى هيستخدمه الشخص المعزول عن باقى الاسرة يبقى تمام جدا
طب ازاى نتعامل مع الشخص المعزول داخل الغرفة؟
حضرتك هتقدمله الاكل الكافى يوميا ف اطباق كرتونية من اللى بتستخدم مرة وتترمى ف كيس قدام الغرفة وف نهاية كل يوم الشخص هيحط كل البواقى ف كيس ويربطه ويحطه ف كيس تانى ويحطه قدام الغرفة حضرتك وانت لابس كل سبل الوقاية هتاخد الكيس ترشه كلور من برة وترميه ف الاماكن المخصصة فورا
ازاى هيروح الحمام ؟
قبل ما يخرج هيتصل بحضراتكم هتفضوا الطريق للحمام وهو خارج بالماسك والجوانتى وأيده جانبه مش بيلمس اى حاجة هيستخدم الحمام وبعدين حد من حضراتكم هيلبس الوقاية ويطهر الطرقة والحمام بتركيز الكلور اللى متفقين عليه
طب ازاى هتابع حالته الصحية ؟
هيبقى معه تليفون وهنعلمه يقيس الحرارة بالجهاز الدجيتل ويبلغنا الحرارة كل ٨ ساعات ولو فيه أى أعراض جديدة
طب افرض أنه اللبس اللى معه احتاج غسيل ؟
هيحطه ف كيس بلاستيك ويقفله كويس وهيحطه قدام الغرفة وحد منكم هيلبس لبس الوقاية وياخد الكيس يجرى بيه ع الغسالة وبعد ما يغسل الهدوم الغسالة تاخد دورة كلور التعقيم
الغسيل بالنسبة للبس المريض درجة الحرارة العالية والمسحوق كافيين جدا للتعقيم
بالنسبة لتعقيم الغسالة نفسها بعد غسيل المريض دى دورة الكلور اللى بقول لحضراتكم عليها اننا هنشغل الغسالة ع اقصر برنامج وهى فيها قطعة قماش وحدة مش محتاجنها ونحط مع المسحوق كلور
طب افرض وحشنا؟
فيه اختراع اسمه الفيديو كولز هدفك ف العزل المنزلى أن باقى أفراد الأسرة ما تتصابش عشان مش كل ما واحد يقرب يخف الإصابة تتجدد معلش نتحمل شوية
من خلال الفيديو هتحولوا تشركوا بيه الشخص المعزول ف كل حاجة بتعملوها عشان نفسيته
ربنا هيزيح الغمة بس خدوا بالاسباب شوية رجاءا
