للمبتدئين || كيف تمنع فايرس كورونا من الدخول الى جسدك

علشان تصاب بفيروس الكورونا لازم يدخل من ال 3 منافذ دول ،
غير كده مش هيدخل

يعني إيه ؟

يعني الفيروس مبيتنقلش من الجو ، مبيتشمش ،
مفيش كائن هلامي في الهوا هنشمه ويموتنا ،
دي شائعات ،
الفيروس كمان مبيخترقش الجلد
يعني من الآخر علشان تصاب بالفيروس ،

لازم تكون خالطت مريض عن قرب وتعرضت للرذاذ الصادر منه
أو

لازم تكون لمست/قبلت/ عانقت شخص ( أو جسم صلب ) عليه الفيروس ،
وبعدها رفعت إيدك لأنفك أو فمك أو عينيك ،
وبعدها الفيروس بيبدأ يخش لجهازك التنفسي علشان يهاجم جسمك …

من هنا فكل الكلام اللي جاي ده لو التزمت بيه بنسبة كبيرة ،
فأنت هتحفظ نفسك من الإصابة بالفيروس بنسبة كبيرة ،
ومش بس بتحفظ نفسك وإنما بتحقظ آلاف وربما ملايين البشر

1- متحطش إيدك خالص على بوقك أو مناخيرك أو عينيك

ولو مبتقدرش تتحكم في ده انتقل لرقم 2

2- اغسل إيدك بالماية والصابون لمدة 20 ثانية على الأقل

حك إيديك الاتنين جامد بحيث تزيل أي جراثيم عليهم ،
دول متوفرين عند أي حد ،
مش لازم ديتول ، مش لازم كحول ، ( لو وُجد فأهلا وسهلاً )
لكن الماء والصابون كافيين جدآ

3- بلاش سلام ولا تقبيل

طاب لو سلمت أو قبلت ؟
متحطش بعدها إيدك على عينيك أو بوقك أو أنفك ،
اغسلها 20 ثانية الأول

4- بلاش خروج من البيت

ولو خرجت بلاش تلمس أجسام غريبة ،
حافة كرسي المترو ، ماكينة التذاكر ، متسندش إيدك على السلم الكهربا ، متحطش إيدك على السنّادات اللي فوق ،
بص من الآخر ،
أول ما تخرج من بيتك حط إيدك في جيبك ومتخرجهاش إلا للضرورة القصوى ،
أظن بسيطة دي

5- متعطسش غير في منديل وبعدين ارميه على طول 

معاكش منديل … يبقى اعطس في كمك ،
آه متتكسفش ،
حط وشك في كوعك على الهدوم واعطس فيه ،
بس اوعى تعطس أو تكح في إيدك … دي أسرع وأخطر وسيلة لنقل الفيروس

6- الكمامات ضرورية الاستخدام وخاصة خارج المنزل 

المناديل ومطهر كحول ( تركيز 70% على الأقل ) مفيدة

7- لو حسيت بأعراض الفيروس ؟

ومن اهمها حديثا فقدان حاسة الشم والتذوق ارتفاع درجة الحرارة فوق 38.50 ومستمرة ، السعال ( الكحة الناشفة المستمرة ) ، الرشح ، وأعراض الإنفلونزا التانية ،
يبقى اعزل نفسك ،
وبلاش سلام ولا خروج من البيت خالص
ولابد من استشارة طبيب او التوجه لمستشفي الحميات أو أحد المستشفيات

8- لو عملت كل اللي فات ده الفيروس مش هيهزمك بإذن الله ،

ولو حصل وأصبت بالفيروس فالإحصاءات لحد دلوقتي بتقول إن نسبة الشفاء منه عالية
وبعدين بتزيد في المرضى مسبقًا بأمراض مزمنة زي الضغط والسكر وخصوصاً المدخنين
إحنا في معركة مع الوقت ،
بنحاول نكسب وقت لصالح البشرية ،
هنلاقي علاج أو لقاح بإذن الله ،
لكن لحد ما ده يحصل …
فدورنا هو …
تقليل عدد الإصابات لأدنى حد ممكن من خلال اتباع الإجراءات اللي فاتت دي والتزام الجلوس في المنازل لمده 2 اسبوع

دمتم سالمين
حفظكم الله من كل مكروه وسوء