لماذا يستقيل أفضل موظفينك ؟!!

شركات كتير بتواجه نفس المشكلة وبشكل متكرر، وهي إن أفضل الموظفين فيها هما اللي بيمشوا، يعني كل ما يجي حد متميز وشاطر، شوية ويقوم مقدم استقالته ويروح شركة تانية، طيب ليه غالبا ده إلي بيحصل؟ ليه المتميزين دايما هما إلي بيستقيلوا؟ وإزاي الشركات تقدر تتعامل صح مع القصة ديه؟

طيب خليني أقولكوا على أهم الأسباب اللي تخلي أحسن موظفين في الشركة هما إلي بيستقيلوا باستمرار :

1- المديرين هما السبب الأول، أيوه زي ماقريتوا كده، دراسات كتير اتعملت في النقطة ديه أكدت إن الخلافات وعدم التوافق مع المدير هو السبب الأكبر اللي بيخلي أفضل موظفين شركتك يستقيلوا، وبتيجي الخلافات ديه أسباب مختلفة زي: مديرين مش بيعرفوا يدوا الموظف التقدير الصح لشغله، ويقللوا منه، أو مايهتموش خالص بالجانب الإنساني في حياة الموظف ويركزوا بس على تحقيق التارجت.

ممكن كمان تلاقي مديرين بيرهقوا الموظفين الممتازين ويكلفوهم بأعمال إضافية، فده بيخلي الموظفين دول يحسوا إنهم بيتعاقبوا على كفاءتهم، وهنلاقي برضه موظفين كويسين بيستقيلوا لأن المديرين بيدوهم في الأول وعود كتير تقنعهم إن الشركة ديه مناسبة وهتطور مهاراتهم وهترقيهم، وبعدين الوعود ديه ماتتنفذش، وساعتها الموظف المجتهد والطموح مش بيرضى يكمل في الشركة.

2- عدم وجود إمكانية للنمو والترقي داخل الشركة، بيخلي الموظف الشاطر والطموح يستقيل ويدور على شغل في مكان تاني أفضل.

3- القواعد الكتير “الغبية”، أيوه الغبية، يعني قواعد لا تصب في مصلحة العمل إطلاقا، وبتخلي الموظف يحس إنه متراقب، وإنه مش براحته في الشركة، زي مثلا ضرورة التواجد في الشركة لعدد ساعات محددة من غير أي فايدة بتعود على الشركة، أو مراقبة حركة الموظفين جوه الشركة، أو منع الأكل أو المشروبات اللي بستاعد الموظفين على التركيز.

4-المساواة بين جميع الموظفين بتحسس المجتهدين والمتميزين منهم بالظلم وعدم التقدير.

5- عدم وجود قواعد واضحة ودقيقة لمكافأة المجتهد أو عقاب المسيء.

6- عدم توضيح الصورة الكاملة للموظف لما تيجي تكلفه بأي مهمة، وطبيعي الموظف المتميز بيشيل المسئولية بزيادة وبيكون هدفه النجاح فيها، فلما تصعب عليه ده وماتشرحش كل التفاصيل الضرورية، طبيعي الموظف ده يهرب لأي فرصة أفضل تقابله.

7- عدم الاهتمام بالجانب الترفيهي للموظفين المجتهدين، لأنه كلما زاد اجتهاد الموظف بيكون محتاج أكتر إنه يرتاح أو يفصل شوية.

لو بصينا عندنا في مصر هنلاقي دراسة أكدت الكلام ده، وهي الدراسة اللي عملتها شركة “أكيومن كونسلتنج” عشان تعرف سبب استقالة المصريين من أشغالهم، وفعلا لقت إن السبب الرئيسي في الاستقالة مش ضعف المرتبات، لكن طلع “المديرين”، وأكدت الدراسة إن أغلب المصريين المتميزين في عملهم بيستقيلوا بسبب مديرينهم.

طيب لو إنت بقى مدير شركة أو قسم معين، تعمل إيه عشان تواجه المشكلة ديه وتقلل من تكرارها عندك؟.. أقولك

– ماترهقش موظفيك المتميزين بالعمل زيادة عن الحد الطبيعي، ماتستغلش تميزهم وتخليهم يكرهوا الشغل، بلاش تعاقبهم عشان هما شاطرين.

– كافئ الموظف المجتهد والمتميز ماديا ومعنويا، لازم تدي دافع للموظفين المتميزين عندك عشان يكملوا معاك.

– ركز مع الموظف الشاطر وطّور مهاراته، وإديله فرصة يكبر ويترقي ويوصل لمكان أعلى في الشركة.
– تواصل بشكل مستمر مع موظفيك، وخلي علاقتك بيهم كويسة، وحاول قدر الإمكان تراعي ظروفهم بشكل إنساني، لأن العلاقة السيئة مع المدير هتخليهم يستقيلوا بسرعة.

– الاهتمام بالجانب الترفيهي للموظفين وده بيتحقق بأكتر من صورة زي عشاء للموظفين، أو رحلة في الويك إند، أو أنشطة ومسابقات داخلية بين أقسام وموظفي الشركة.

– حط موظيفنك المتميزين في تحديات جديدة دائما، الموظف الشاطر بيحب دائما يطور نفسه وكمان ينجح في مهام جديدة عليه ويثبت نفسه فيها.

في النهاية لازم إنت كمدير تبقى واخد بالك إنك لو عايز تحتفظ بالموظفين المتميزين عندك، لازم تغير طريقة تعاملك معاهم، وتديهم طاقة إيجابية وتقدير تخليهم عايزين يكملوا معاك.