ملخص الحرب العالمية الأولى

تلخيص أي حرب ماينفعش يتجاب في سطور قليلة ، لكن هنا هنحط زتونة الزتونة والحاجات اللي هترسملك الصورة الكلية للحرب بدون تفاصيل كتير  أما لو بتحب التفاصيل فالمقالات دي هي مرادك. … توكلنا على الله .

أطراف الحرب :

دول المركز : ( الامبراطورية الالمانية والنمساوية والعثمانية وشوية دول تانية صغيرة )
دول الحلفاء : ( الامبراطورية البريطانية وأمريكا وروسيا وفرنسا و وصربيا وإيطاليا واليابان وشوية حلفاء لهم )

كان يا ما كان ، كان فيه زمان امبراطورية اسمها الامبراطورية النمساوية ، الارض بتاعتها دلوقتي على كام دولة منها النمسا والمجر ، الامبراطورية دي حبت تبحبح عن نفسها شوية فقامت داخلة واخدة البوسنة والهرسك ، الكلام ده زعل مملكة صربيا ، واللي خلاهم يغتالوا ولي العهد النمساوي ومراته عن طريق جماعة سرية اتعرف بعدين انها تبع الحكومة ، حطت النمسا 10 شروط مجحفة على صربيا وافقت منهم على 8 ولئلئت في اتنين فالنسما اعلنت عليها الحرب .

النمسا حطت قواتها قرب البوسنة والهرسك ومهددة شبة جزيرة البلقان ، روسيا بتعتبر صربيا بنتها اللي عالحجر ، قامت شاحنه قوات جزئية قدام النمسا ، قامت المانيا قالتلها لمي نفسك ياروسيا وإلا هحط عليكي ، فمسمعتش الكلام فالمانيا راحت باعته قوات جزئية هي كمان لدعم الموقف النمساوي وعشان تمنع التوسع الروسي ، راحت روسيا باعته قوات لكامل المنطقة – بيسموها التعبئة الكلية – فراحت المانيا معلنة عليها الحرب الكاملة الشاملة .

المانيا عشان توصل للمنطقة دي لازم تعدي على دول في طريقها ، فدخلت لوكسمبورج ، وكمان فرنسا ، واما ملقتش حد زعلان يالله كمان على بلجيكا ، الناس دي قاومت دخول الجيش الالماني بلادها بس ولا هم ولا ضعفهم يقدروا عالجيش الالماني فائق التسليح ليلتها – الليلة وكل ليلة 😀 – فطبعا الدول دي برضه بقت في الحرب ضد المانيا والنمسا سوا ، بريطانيا قالت لألمانيا خلي بلجيكا عالحياد وماتدخليش فيها عشان دي معايا ، المانيا قالتلها – خليكي على جنب يادولة ياعجوزة – قامت بريطانيا معلنه الحرب هي كمان على المانيا وحلفائها .

الكل متأهب كده لضرب النار .. خش يامعلم .

النمسا دخلت على صربيا بتقلها ، فصربيا بدعم الجيش الروسي طحنوها .

المانيا لفت لهم بسبع جيوش عن طريق بلجيكا وفرنسا ولكسمبورج ، فراحت روسيا داخله المانيا من ورا ، راحت المانيا راجعالها وادو الجيش الروسي علقة مافاقش منها الا بعدين .

نيوزلاندا اللى هي تبع استراليا اللي هي تبع بريطانيا 🙂 لقت المانيا مشغولة في الحرب قامت واخده جزر جنبها تبع المانيا ، واليابان هاصت في الهيصة وخدت هي كمان جزر تبع المانيا في الصين ، فراحت المانيا معلنة عليهم الحرب وبعتتلهم سفن حربية المانية ونمساوية تربيهم .

فرنسا وبريطانيا لهم بلاد محتلينها في افريقيا وزييهم المانيا ، قاموا واخدين جيوش من البلاد دي ومطلعينها على بلاد المانيا زي الكاميرون ، وبرضه ما قدروش ياخدوها عشان القوات الالمانية هناك كانوا مزبطين الاهالي فحاربوا معاهم .

المانيا نخورت شوية في اساس تماسك الهند وافغانستان اللي كانت مهيمنة عليهم بريطانيا ، ودعمت المانيا حركات هندوسية انفصالية هناك ، بس بسم الله ماشاء الله الحكومة الهندية واللي كانت على مشارف ثورة ضد بريطانيا بعتت لبريطانيا عدد كبير من الناس تحارب معاها ضد المانيا فاق عدد البريطانيين نفسهم – اه والله شفت ازاي الهنود ساعتها ! – وكمان بعتوا معاهم اسلحتهم واكلهم وشربهم .

الجيش البريطاني الفرنسي حاولوا يدخلوا الاراضي الالمانية او اللي محتلها المانيا بس المانيا كانت عملت تكتيك جديد في الحرب وهو حرب الخنادق المحمية بالدبابات والطيارات فمحدش عرف يخترقهم .

المانيا لقت الضرب عليها من كل ناحية قالت بس بس .. اهدوا عليا بقى .. وقامت مطورة سلاح جديد وهو سلاح الكلور الكيماوي السام ، وبهدلت بيه الجيش البريطاني الفرنسي في الغرب والجيش الروسي في الشرق .

راحت بريطانيا وفرنسا داخلة بتقلها في معركة اسمها ( السوم ) فخسروا المانيا 500 الف عسكري ، والجيش البريطاني خسر 420 الف والجيش الفرنسي 200 الف ، اعتبروا ده انتصار للجيش البريطاني الفرنسي برغم ان خسايرهم اكبر بس كان الجيش الألماني اتدحدر لورا سنة صغيرة وبعدها على طول كانوا خلاص هيكسبوا بس الدنيا مطرت سيول ومقدروش يخترقوا خنادق الالمان المتحصنة .

الاسطول البريطاني وقتها كان اكبر الاساطيل ومن بعده الأميركي ومن بعده الألماني ، فبريطانيا سدت جهة الغرب عن ألمانيا في البحر المتوسط بحيث مايجلهاش اي تعزيزات او حتى اكل ، راحت المانيا مطورة حرب جديدة وسمتها حرب الغواصات رغم ان ماكنش فيه غواصة واحدة قبل كده بتحارب وسلحت غواصتها بالطروبيدات واشتغلت على الأسطول البريطاني من تحت .. غرقت لها سفن كتير ، واما المانيا لقت الموضوع حلو ، بقت تغرق عشوائي لأي سفينة رايحة ولا جاية على بريطانيا او حتى في الحيط الاطلنطي ، فغرقت سفن تبع امريكا جاية من المكسيك ، فامريكا قالت لألمانيا بالحسنى ، وألمانيا طنشتها / فامريكا اعلنت عليها الحرب هي كمان !

فاكرين النمسا وحربها في صربيا ، اما لقت نفسها مش قادرة عليها راحت مستعينه ببلغاريا وراحوا قضوا على صربيا بالكامل ، ففرنسا حبت تساعد عن طريق اليونان بس حكام اليونان قال لأ احنا محايدين ، وفي خطوة ماتتصدقش النمسا رجعت وسابت بلغاريا لوحدها في صربيا قامت قوات المحور حاطه عليها منفرده فما قامتش لها قومة بعد كده واليونان برضه خدت نصيبها من العلقة عشان ماساعدتش في الاول .

في الحرب بيدخل ناس للتوجيب وناس للمصالح ، التوجيب والمصالح كانت من الدول العظمى والمصالح بس كانت من الدول اللي بعافية ، وهم زي الدولة العثمانية ، وايطاليا ورومانيا .. المانيا اتفقت مع الدولة العثمانية تدخل تحارب وهتديها اللي فيه القسمة ، فدخلت حطت عالارمن اللي كانوا الروس بيحموهم وارتكبوا مذابح ولا مذابح الامريكان في الهنود الحمر ، وكمان راحوا عالدول اللي اعلنت انفصالها عن الدولة العثمانية زي مصر وولائهم بقوا الانجليز ، بس العثمانيين فشلوا في حربهم دي .

ايطاليا ورومانيا كانت موقعة على التحالف مع المانيا والنمسا في الاول بس معملوش معاهم اي حاجة فاما المانيا قلقت من ايطاليا قالت لها ادينا تونس ومش عايزين منك حاجة تاني ، فاما قعدت ايطاليا تفكر ، دخلت عليها بريطانيا وقالتلها حاربي معانا احنا ونديكي الساحل النمساوي بحاله يبقى بتاعك ، فايطاليا نفضت لالمانيا والعهد بتاعها ودخلت تحارب النمسا ، وعشان الجبال اللي قابلتها وتفوق النمسا والمانيا فيها ..

فايطاليا خسرت كتيييير جدا من جيشها برغم انه الاكثرا عددا ، لكن في الاخر وبعد ما الناس كلها تعبت من الحرب ، خدت ايطاليا الساحل النمساوي ، وكمان رومانيا نقضت العهد ولقت الجانب الروسي افضل لها فحاربت معاه وخدت حتة من الفتة في النمسا بعد تقهقرها ، لكن سابتها ومضت معاهدة سلام مع النمسا بعد طلوع روسيا من النمسا .

روسيا كانت كبلد اقتصاده تعبان وابتدت تجوع من الحرب ، فالمانيا قدرت ترجعها تاني مطرح ماكانت بس بهزايم وبهدلة فخدت منها بولندا وفنلندا ودول البلطيق واستقلال أوكرانيا وكمان حصلت الثورة البلشفية الشيوعية فقضت على اي طموح لمكسب روسيا في الحرب ، وهم وقفوها اساسا .

القوات البريطانية الفرنسية جابت قوات استرالية عشان تجتاح منطقة الشام بالخليج العربي عشان تشل حركة العثمانيين وامداداتهم ، فالدولة العثمانية دحرتهم في البداية وحاولت تنزل لحد قناة السويس عشان تقطع الامدادات عنهم من ولايتهم في افريقيا ، بس القوات المصرية الانجليزية انتصروا عليها في شرق مصر وغربها.

قبل ما امريكا تدخل الحرب دي ، كانت ألمانيا مكلمة الرئيس الامريكي في الوساطة لعمل هدنة للحرب ، بس البريطانيين ماوافقوش عشان عارفين ان الالمان هيعيدوا لم نفسهم وهيبقوا اقوى ، واما المانيا اتغاشمت وبقت بتضرب مصالح امريكا بغواصتها ، دخلت امريكا الحرب وبقت الكفة في صالح بريطانيا وفرنسا ، وكمان لما انهزمت بلغاريا وضعفت معاها النمسا ، فمبقاش غير المانيا الكل بيحط عليها برا وبحر وجوا .

اضطرت ألمانيا والنمسا في النهاية للاستسلام والقبول بمعاهدة فرساي اللي بتحق عليهم عقوبات اقتصادية وعسكرية تخليهم يعوضوا الدول اللي حاربتهم عن الخساير وكمان تحد من جيوشها وتسليحها ، ودي حاجات شلت الاقتصاد الالماني لسنين وسنين لحد ما جالهم هتلر بالحرب العالمية الثانية ودفعهم اللي اتدفع لهم بس اغلى شويتين تلاتة واحتل بلادهم نفسها .

كوارث (نتائج) الحرب العالمية الأولى :

• وفاة وإصابة أكثر من 37 مليون بني ادم .
• تفكك كلا من : الامبراطورية العثمانية والروسية والنمساوية المجرية .
• نشأة عصبة الأمم لحفظ السلام العالمي ( ما قبل منظمة الأمم المتحدة ) واتفستكت في الحرب العالمية التانية .
• حدود سايس بيكو وتقسيم منطقة الشرق الاوسط على بريطانيا وفرنسا وايطاليا والوطن العربي نفسه بقى تحت الانتداب الغربي .
• الانفلونزا الوبائية اللي انتشرت في العالم كله نتيجة لضعف مناعة الناس بعد الحرب .
• وعد بلفور و انشاء وطن قومي لليهود في فلسطين .