أخر سنتين شهدت رجوع كثير من المصريين من الخليج ومعظمهم بيرجع يستثمر فلوسه وبيعمل بيزنس ودى مجموعة نصايح ليهم مع التركيز علي النصيحه رقم (10).
1- مصر دلوقتى مش زي مصر اللي سيبتها حتي لو مسافر من 5 سنين فأكيد السوق إتغير.
2- مصر اللي انت راجع تشتغل فيها مختلفه تماما عن مصر اللي بتنزلها أجازة كل سنه، الاتنين مختلفين تماماَ.
3- المصريين اللي انت بتقابلهم في الأجازة كل سنه مختلفين تماما عن نفس المصريين اللي هتشتغل معاهم.
4- فلوسك اللي انت شقيت وتعبت فيها مش هاتتكرر بسهوله، فكر كويس قبل ماتاخد أي قرار فيه فلوس .
5- فلوسك مهما كنت معتقد إنها كتير فهي مش كتير فخد بالك وبلاش المغامرة الغير محسوبة.
6- السوق المصري مختلف تماما عن السوق الخليجي حتي في نفس الصناعة سواء في نوعية المستهلك أو حجم وشكل المنافسه.
7- السوق المصري فيه فرص كتير بس معظمها غير مناسب ليك فخد بالك.
8- علاقاتك السابقه تقريبا انتهت والناس اللي كنت تعرفهم في البيزنس اتحركوا بشكل كبير فبلاش تعتمد علي شبكة العلاقات القديمة وإبدأ في تكوين شبكة علاقات جديدة.
9- السوق المصري ممكن يظهر إنه سوق بسيط والناس اللي فيه هواه لكن بالتجربة هاتكتشف العكس تماما، السوق المصري سوق معقد وبيحتوي علي كل الطبقات والناس اللي شغاله إتعلمت وعندها خبرة لم تحصل عليها بسهوله فبلاش تعمل ناصح.
10- أهم نصيحه هى إنه مش فرض عليك أول ما تنزل مصر تعمل مشروع لأنه غالبا هيفشل نظراَ لفقدانك حساسية السوق المصري الأفضل إنك تشتغل لمدة سنتين جوا السوق ولما تلاقي فرصه واضحه وصريحه ومناسبة لامكانياتك المالية والشخصية وقتها ممكن تبدأ في مشروعك الخاص.
أنا عارف إنك اتغربت كتير علشان لما ترجع مصر تعمل مشروعك الخاص بس علشان خاطري حتي لو بقالك 20 سنه في الغربه خليهم 22 سنه واشتغل سنتين لإن السنتين دول هايسهلوا عليك 20 سنه هاتشتغلهم في مصر وممكن يكونوا سبب نجاحك وممكن يكونوا سبب إن فلوس الغربة اللي تعبت فيها ما تضيعش وفي النهاية ما تستعجلش وربنا يوفقك ويباركلك في مالك ونورت مصر 😀
