السّفر أحد أسباب المعاش التي بها قوامه ونظامه ، لأن الله تعالى لم يجمع منافع الدنيا في أرض بل فرقها، وأحوج بعضها إلى بعض ، ومن فضله أن صاحبه يرى من عجائب الأمصار وبدائع الأقطار ومحاسن الآثار ما يزيده علما ويفيده فهما بقدرة الله عز وجل وحكمته ويدعوه إلى شكر نعمته، ويسمع العجائب ويكسب التجارب ويفتح المذاهب ويجلب المكاسب ويشد الأبدان وينشط الكسلان ويسلي الأحزان ويطرد الأسقام ويشهي الطعام ويحط مسورة الكِبر، ويبعث على طلب الذِكر.
1 – قبل ما تييجي حاول تسأل كويس جدا على الشغل و ظروفه و إلتزام الشركة في الأمور المادية لأن أخطاء الإختيار هنا صعب إصلاحها أو استدراكها. و لن تجد وقتها إلا النصيحة الأبدية ( استحمل )
2 – أول ما تنزل من الطيارة حط شنطتك و على أقرب مدرسة مرور و طلع رخصة … أي ان استخراج رخصة هي واحدة من أهم أولوياتك بعد السفر وخد بالك من النقط دي :
- بلاش نصاحة في شرا العربيات
- بلاش مستعمل ….
- اشتري جديد بالتقسيط
- لو مش عاوز شوف كسر زيرو ….. بس بلاش مستعمل
3 – قبل ما تيجي إفتح حساب في بنك في مصر لو لسه ما عندكش حساب ….و لما تيجي هنا و تفتح حساب عشان ينزلك عليه مرتبك
- افتح حساب تاني خليه للتوفير
- خلي الأولاني لمصاريفك الشخصية
- لو الفلوس فضلت تحت إيدك هاتسيح يعني هاتسيح
- مش محتاج أقولك بلاش تعمل فيزا أو ماستر كارد أو أي كريدت كاردز.
- بلاش قروض من بنوك …… بلاش أبوس إيدك
4 – حط لنفسك ميزانية شهرية للتليفونات و النت ولا تتجاوزها … و تذكر دائما إن كل اللي عاوز تكلمهم ممكن تكلمهم على النت ببلاش
5 – لو بتدخن حاول تبطل حرام تحرق فلوسك مع عمرك و صحتك .. متبقاش غربة و خراب صحة و خراب ديار
6 – و لو إني لا أطيق الجمعيات أو الأقساط إنما لا سبيل لكلبشة رجلك هنا إلا أن تتورط في قسط شقة أو جمعية كبيرة ….. لكن بما لا يزيد عن نص مرتبك لو كنت أعزب أو تلته لو كنت متزوج لأن محدش ضامن الظروف
7 – عطفا على ظروف رقم 6 خلي دايما مبلغ على جنب للطوارئ .. احفرلهم بلاطة أو حطهم تحت المرتبة أو في جيب جاكت مرمي في الدولاب ….. خليهم لأي طارئ سخيف لأنك للأسف ممكن ما تلاقيش حد تميل عليه وأنت فالغربة
8 – لو عزبنجي و عندك وقت حاول تتعلم تعمل أكل .. أي أكل لو شوية مكرونة أو شوية رز و خضار .. عارف إنك فاشل و ما بتعرفش تقلي بيضه .. الأكل بره هنا هو أعك و أوحش من مصر فحاول تحافظ على صحتك و فلوسك …… كمان وقوفك في المطبخ و فعل الطبيخ نفسه بيرفع معنوياتك و بيحسن حالتك النفسية
9 – لو متجوز خلي الأكل بره بالكتير يومين في الأسبوع .. لأن الأكل يظل من المتع القليلة المتاحة فالخارج
10 – لو بتدور على سكن فتش على نضافته …. شيك على الميه ….. شوف فواتير النور …. شوف العداد مشترك و لا لأ. …. راجع السباكة و الكهربا اسأل على جيرانك …. حاول تشوف سكن تدفع إيجاره شهريا أو كل 3 شهور عشان ما تتزنقش لو كان مطلوب منك إيجار نصف سنوي
11 – أبوس رجلك بلاش تسترخص في عفش بيتك هايبقى بيتك لمدة 11 شهر كل سنة هات تكييفات جديدة …. تلاجة جديدة …. غسالة جديدة … ممكن بوتاجاز مستعمل …. هات عدد 2 أنبوبة بوتاجاز …
هات غرفة نوم تكون بسيطة صغيرة سهلة الفك و التركيب و النقل عشان ممكن تنقل من سكن لسكن تاني أضيق أو أصغر
12 – حلي حياتك جوه بيتك .. ما تستغربش لو زوجتك قالتلك نجيب انتيكات .. اعمل ستاير …. هات زرع .. اعمل اوضة لابنك أو بنتك زي أوضتهم في مصر .. اعمل لبيتك طعم حتى لو هاتصرف شوية .. لكن ده هايرفع معنوياتك و هايسعد زوجتك
13 – حاول تقلل من دائرة إختلاطك مع الجيران أو زملاء العمل…خلي عندك حياة اجتماعية لكن تحكم فيها إنت غالبا مش هتلاقي وقت أساسا
14 – خلي عندك على الأقل يومين أو تلاتة في الأسبوع تقضي فيهم وقت خارج البيت
15 – بلاش يبقى كل الخروج مولات .. المولات هي أماكن سخيفة قابضة للصدر منتهكة لعرض الجيوب مثيرة لسلوكيات استهلاكية … مستفزة بسلعها و أسعارها الفلكية
16 – ممكن الخروج يكون تمشية في الشارع بالعربية .. على كورنيش لو في كورنيش ….. صحرا لو في صحرا .. . خلي المول مرة واحدة و خلاص
17 – قبل ان تنسى …… راجع رقم 1 للأهمية
18 – حاول تكون متميز في شغلك عن طريق القراءة أو خد كورسات حتى لا تقع في شراك الملل و الروتين و تتحول لموظف كل همه يخلص اليوم و الشهر و السنة عشان ينزل أجازة
18 – انزل إجازة كل سنة .. لازم تفصل و تنفصل على جو و دوامة الشغل .. لازم تحتفظ بآخر ما يربطك بمصر
19 – حاول تخلق اتصال بشكل يومي بأهلك في مصر إن لم تستطع فإن شا الله حتى برسالة واتساب أو دقيقة موبايل
20 – حاول تبعد أهلك في مكالماتك عن مشاكل شغلك و متاعب حياتك بره .. هما عارفين إنك مش مبسوط و مفيش داعي تزود قلقهم عليك
21 – احتفظ لنفسك بآراءك السلبية عن الشغل و البلد و أهلها و اعلم ان كتر الشكوى لن يغير شيئا .. خذ حذرك من فضول الكلام أمام من لا تعرف
22 – لا سياسة في الغربة و لا غربة في السياسة .. لا كلام في سياسة البلد اللي بتشتغل فيها أو حتى سياسة بلدك .. اجعل ردك دائما و أبدا على أي محاولة لجر الرجل أو الاستفزاز أو محاولة معرفة ميولك السياسية … بجملة واحدة هي ( اللهم ول من يصلح ….و أصلح الأحوال )
23 – بلاش تفتح صدرك في أي خلاف أو نزاع .. لا تظن أن القانون – و هو للعلم فعلا موجود – لا تظنه سيحميك على طول الخط لأن من يطبق القانون في النهاية بشر قد ينحازون لبني جلدتهم فقد ينحازون ضدك .. لا تجعل الأمور تتأزم لتصل لموقف تختصم فيه مواطنا لأن النتيجة ليست مضمونة
24 – عيش حياتك و ابحث عما يسعدك في حال الغربة لأن وجودك هنا أصبح للأسف هو القاعدة و شهر الأجازة في مصر هو الإستثناء .. فلا تضيع القاعدة بحثا عن الإستثناء العارض
25 – الأخيرة عش في غربتك كأنك سترحل أو ستتركها غدا .. حاول أن تصنع بديلا في بلدك لأنه مفيش غربة هاتدوم للأبد و لأن مفيش حاجة مضمونة
لو عندك ملاحظة أو تجربة عن السفر والغربة .. فيد غيرك بيها .. تعليقك مهم
-
انا اسف قالولى الغربه يامايا بتعلم دروس الحياه هشام الجخ
