كل سنة بنسمع عن كدبة أبريل، و لازم كل سنة نسمع تحليلات لولبية و تفسيرات خزعبلية لليوم دا!
لو مكنتش تعرف إيه “كدبة أبريل” دى، و معتقدش إن دا أمر وارد يعنى؛ فأحب أوضح لك إن فى أول يوم من شهر أبريل كل سنة، بيبدأ الناس يشتغلوا بعض و يعملوا مقالب فى بعض لدرجة إن بعض الشركات و المواقع المرموقة بتعمل العملة دى أحيانا و بتشتغل ناس كتير!!
طيب.. أنا النهاردة مفضى نفسى مخصوص علشان نشوف سوا ليه الناس بيعملوا مقالب فى بعض فى اليوم دا بالذات، و ليه يوم 1 أبريل اسمه “April Fools Day”، و نحاول نعرف الحكاية دى جت منين !!
مبدئيا، خلينى أوضح لك إن الموضوع دا مش واضح أوي فى كتب التاريخ، و إن الموضوع له كذا رواية؛ لكن أكثرهم انتشارا و منطقية هى رواية “البابا جريجور الثالث عشر” أو “Pope Gregory XIII”
سنة 1582، أصدر “البابا جريجور الثالث عشر” مرسوم بتغيير التقويم فى أوروبا من “تقويم جوليان” (أو Julian Calender) اللى كان عامله “يوليوس قيصر” لـ”تقويم جريجور” (أو Gregorian Calendar)، أو “التقويم الميلادي” اللى نعرفه دلوقتى …
التقويم الجديد بتاع “جريجور” دا كان عبارة عن شوية تعديلات لقانون “يوليوس قيصر”، أهمها إنه اعتبر السنة 365 يوم و 5 ساعات و 49 دقيقة، بدل ما كانت 365 يوم و 6 ساعات فى تقويم يوليوس؛ و دا خلى التاريخ يتقدم 10 أيام !!
كمان تقويم “جريجور” اعتبر بداية السنة من شهر يناير، مش من يوم 25 مارس زي تقويم يوليوس!!
(حسب تقويم يوليوس، كان شهر “1” هو شهر أبريل، و كانوا الناس بيحتفلوا بالسنة الجديدة أسبوع؛ يعنى من 25 مارس لغاية 1 أبريل!!)
طبعا زي ما إحنا عارفين إن فى القرون الوسطى كانت أوروبا كلها موصلة نت من TE Data؛ و بالتالي خبر زي دا أخد وقت كبير جدا علشان ينتشر فى أوروبا لأنهم كانوا بيعملوا خطوط فايبر أيامها علشان النت يبقى أحسن و.. إحم.. ما علينا 
😂
المهم إن أماكن كتير انتشر فيها الخبر دا كان فيها مؤيدين للتقويم الجديد و معارضين ليه؛ و بالتالي المعارضين راحوا احتفلوا بالسنة الجديدة فى شهر أبريل عادي زي كل سنة!
الناس اللى اعترفوا بالتقويم الجديد سموا الناس اللى بيحتفلوا براس السنة فى أبريل “April Fools” أو “حَمقَى أبريل”
و فضلوا كذا سنة يعملوا فيهم مقالب و يخدعوهم بحاجات تبين إنهم مغفلين لغاية ما بقى الموضوع دا عادة بيعملها الناس فى بعض يوم 1 أبريل من كل سنةّ
من الحاجات الظريفة جدا إن فى فرنسا و إيطاليا و بلجيكا و سويسرا الناس اللى كانوا بيقعوا فى خدع 1 أبريل دول بيسموهم “April Fish”، و فى فرنسا كانوا بيلزقوا على ضهرهم سمكة ورق فى إشارة لإن الناس دول سهل اصطيادهم زي السمك!!
كمان شركات و مواقع تقنية كتير بتعمل خدع أبريل كل سنة و توقع الناس فيها!
2014 مثلا، شركة توشيبا قالت إنها ابتكرت كمبيوتر فى صورة “جوانتى”
2013، فريق تطوير Gmail عمل فيديو بيقول إنهم هيغيروا ألوان Gmail للون الأزرق
نفس اليوم جوجل أعلنت عن مشروع اسمه Google Nose، و دا بيخليك “تشِمّ” الصور اللى بتطلع فى نتايج البحث!
2014، نوكيا قالت إنها هتنزل نسخة بشاشة لمس من موبايل نوكيا 3310 بيشتغل بنظام Windows Mobile 8.1 !
2015، سامسونج قالت إنها هتعمل موبايل اسمه Galaxy Knife ممكن تستعمله كسكينة علشان طرفه حاد و رفيع جدا!
نفس اليوم، سونى أعلنت عن حاجة اسمها PlayStation Flow، و دا Controller بيمكنك من التحكم فى الألعاب اللى تحت المياه لو انت بتعوم فى حمام سباحة!
من أظرف الـPranks على الإطلاق، سنة 1957، شبكة BBC أذاعت خبر إن المزارعين السويسريين بيحتفلوا بإنهم حققوا أرقام قياسية فى محصول “المكرونة الاسباكيتى”، و إنهم جمعوا كميات مهولة من المكرونة من على “شجر الاسباكيتى”!
مش دى المشكلة خالص! المشكلة إن مئات الناس كلموا البرنامج اللى أذاع الخبر علشان يسألوا على طريقة زراعة المكرونة الاسباكيتى!
بعد الخبر دا بسنين كتير.. شبكة CNN صنفت الخبر دا على إنه أكبر بيان كاذب طلع من وكالة أنباء محترمة!
